الموضوع: اسئلة مهمة لوحوش الميجان قبل ما اشتري و اكون وحش زيكم 

المشاركة الأصلية كتبت بواسطة moh_zaher555

السلام عليكم
عندي شوية اسئله لوحوش الميجان الي نفسي اكون منهم بعد م اشتري الميجان
المعلومات دي هي الي فضلت محيراني بعد ما دورت ف المنتدى و لسا بحاول افهمها قبل الشراء و الي اتمنى انها تفيد اي حد مقبل على نفس الخطوه
أخيرا و قبل ما ندخل في الاسئلة عايز اشكركم على المجهود الرائع الي مخلي الصفحه دي دايما منوره و تشجع اي حد انو يشتري الميجان عشان يكون جزء من المجموعه دي و اكيد دايما هيلاقي المساعده ..... المفروض وكيل رينو يشكركم على الدعم دا و الي بيصب ف الاخر ف نسبه مبيعاته ......> j
أولا: عايز اعرف الفرق بين الموديلات الاوتوماتيك دي (2005 – 2006 – 2007 - 2008) من حيث:
1- عيوب التصنيع (ايه هيا العيوب دي؟ وايه افضل الموديلات من حيث قلة العيوب؟)
راجع الموضوع ده
أعطـــــــال الميـــــجان ii من مـــلاكهـــا و إصلاحــــها (::: أعطـــال الميجـــان من مالكى السيارة :::)


2- الكماليات الي بتنزل معاها (options)
محدش هيقدر يقولك بتأكيد 100% خصوصاً من موديلات 2007 و أنت طالع
بس العادي
تكييف بكر/تاتش حسب الفئة
جنوط حديد/سبور حسب الفئة
فتيس أوتو ستيبترونيك
4 أزاز كهرباء مع وحدات رفع
abs
6 أيرباج
ردايو و مشغل أسطوانات مدمجة اوديو / mp3 حسب الموديل
حساسات إضاءة و مطر
مرايات ضم حسب الموديل
تحكم فى الكاسيت من خلف الطارة

3- اسعار قطع الغيار (هي هي ولا في فرق؟)
ثانيا: العيوب الي كانت موجوده في موديل 2005 هل تم علاجها فب موديل 2006 الشكل القديم (بدون الفيس لفت) ولا الشكل الجديد ولا لا دا ولا دا و تم معالجتها في 2007؟
ثالثا: ايه الموديل الي تنصحوا بشرائه؟

أسعار قطع الغيار واحدة للكل
موضوع العيوب ده أنا ليا وجهة نظر فيه

معظم قطع الغيار اللى كان فيها عيوب كانت لقطع إستهلاكية.......لو مكنتش معيوبة زمان عمرها الإفتراضي خلص و أتغيرت........و لو كانت معيوبة هتلاقيها برضه أتغيرت

نصيحتي أنك تدور على موديل عالي بقدر الإمكان علشان الكيلومتر و الحالة العامة.....بس لو لقيت موديل 2005 أو 2006 حالة حلوة شوفها برضه.

اسئلة بخصوص الكماليات / الاوبشن

- كم عدد الايرباجز الموجوده في موديلات الميجان دي؟ و هل عددها بيتغير حسب الفئه؟ بشوف اعلانات مكتوب فيها 6 ايرباجز و اخرى بتقول 8!!

6 أيرباج فى كل الموديلات حتى المانيوال أول فئة

- الكماليات (الاوبشنز) الي موجوده في كل موديل هل تعتمد على الفئه فقط (بيز لاين – هاي لاين – توب لاين) ولا بتعتمد على الموديل كمان. وايه هيا الكماليات الموجوده في كل فئة؟ (زي الطارة الماتي فنكشن – مثبت السرعة – جنوط عريضه 17 – سقف البانوراما – تكييف تاتش – نوع الفرش الداخلي قماش او جلد )

الكماليات من أول 2005 لحد 2007 تقريباً تحتلف حسب الفئة فقط
و من أول 2008 فيه شوية حاجات شالوها من فئات و خلوها فى الفئات الأعلى.....زى المرايات الضم و غطاء الموتور
الجنوط 15 حديد أو 16 سبور........مفيش 17 أصلى فى مصر.

شوف الموضوع ده برضه
http://www.nilemotors.net/nile/6450-2008.html

- بخصوص البانوراما: هل معنى ان الميجان فيها فتحة سقف انها بانوراما؟ ولا في موديلات – فئات بفتحة سقف عادية زي الموجوده ف اي عربيه؟

يعنى ايه بانوراما ؟ يعنى فتحة سقف أكبر من الطبيعي شوية و واخدة تقريباً تلت السقف أو نصه كمان............يعنى ميجان بفتحة سقف = ميجان بانوراما.

البانوراما عموماً اعلى فئة فى الميجان..........هتلاقي فيها كل حاجة.

أخيرا عندي اسئلة بخصوص الكشف على السياره

بعد قراءه مستفيضه ف المنتدى عرفت ان الكشف من المهم يكون ف التوكيل علشان الواحد ميلبسش ف الحيط
- ماهي الاشياء التي يتم الكشف عليها ف التوكيل؟ هل هي كفاءة الموتور – الجسم الخارجي و العفشه – الفتيس – السنسورات و كهربة العربية ولا في حاجه كمان؟
لأ كده تمام
- هل الكشف دا مضمون ولا ممكن تكون في حاجه تانيه مستخبية؟

ممكن تكون فيه حاجة مستخبية...........بس نسبتها ضعيفة.....هتبقى نصيب بقى
حاجة تانية لازم تعرفها عن كشف التوكيل.......
التوكيل لو لقى حالة قطعة معينة 60 أو 70% من حالتها جديدة هيقولك محتاجة تغيير...........متقلقش ده عادي.....أنت بس أستلم التقرير و تعالى نتناقش فيه.

- عرفت ان تكلفة الكشف ف التوكيل حوالي 550 جنيه. في حالة طلعت العربيه مش تمام بعد الفحص و مش هشتري, المتعارف عليه مين الي بيدفع؟ صاحب العربيه ولا انا؟ .......> لأني مش هدفع كل مره اكشف فيها على عربيه لحد ما واحده تطلع تمام l و اكون خلصت فلوسي

اللى بيبيع ملهوش علاقة بموضوع الكشف حتى لو هتكشف عليها تحت السلم

عارف اني طولت ف الاسئلة بس متعشم فيكم

أى خدمة يا برنس