موقف حصلى الناهرده و مش عارف اتصرفت صح و لا لاء
الناهرده الصبح و انا فى طريقي للشغل و طالع من ميدان الساعه وداخل على تقاطعه مع طريق الاوتوستراد
طبعا الحته دى كل يوم بتبقى زحمه بالميكروباصات و الاوتوبيسات
فكان فيه ميكروباص كنت كسرت عليه وسط الزحمه علشان اطلع منه - و هو الظاهر ماعجبهوش و مصر انه يطلع منى فى الزحمه
و فى الاخر لاقيته بيشتم بالكلاكس (الشتيمه المشهوره ) قومت انا راددهاله بالكلاكس برضه ( تيت تيت تيييت تييييييييييته )
كنا ساعتها طلعنا من التقاطع الزحمه - فهو شد و بقى جنبى بالميكروباص وشتمنى بالام ---
فشديت انا كمان و شتمته بنفس الشتيمه - المهم هو جرى ووقف قدامى بالميكروباص و نزلى و جهه لغايه العربيه عندى
و قالى كالاتى " انتا بتقول على مين .... "
كنت ساعتها نزلتله انا كمان ووقفت قدامه (هو كان اقصر منى )
انا رديت عليه "بقولك ايه روح شوف اكل عيشك و خلينا نشوف اكل عيشنا و اصطبح"
هو "انا مش عاوز ازعلك على الصبح"
و خد بعضه و ركب الميكروباص بتاعه - بس مادورشى على طول غتاته علشان ارجع بضهرى شويه و اطلع منه
بس على حظه كنت جاى اشد حزام الامان فعلق منى و عقبال ماشديته كان هو زهق منى و طلع
السؤال بقى كان المفروض اعمل ايه فى المواقف دى
هل كان المفروض اتخانق معاه و لا صح انى لميت الليله بالشكل ده - هو على فكره كان ميكروباص فاضى
انا بس مدايق و حاسس انه اتعلم عليا بصراحه
بس انا مش عاوز اتخانق لأنى حخاف على العربيه لأنها عربيه والدى و عزيزه جدا عليا
ملحوظه : انا معايا مسدس صوت معدل يضرب بلى فى العربيه و معايا كلبش يستخدم كعصايه حديد حلوه
