الموضوع: كيف اختار سيارة مستعملة ... ؟

السلام عليكم ..

أنا محتار جدا في اختيار سيارة مستعملة ...عشان معنديش خبرة في الموضوع ده ..
السؤال اللي محيرني .. الواحد يشتري عربية منتشرة جدا زي ال سيراتو مثلا ولا يجيب حاجة نادرة شوية ؟

الفكرة إن العربية المنتشرة أنا فاهم إنها تتباع أسهل بس ..بما إن في عرض كتير فـالسعر بيكون مضروب ...و واقع .؟؟!!

و العربية اللي عليها طلب كتير والعرض قليل بتكون غالية في اعادة البيع ....

أرجو المساعدة في الوصول ل مفهوم صحيح

شكرا

شوف يا سيدى لو انت عاوز تشترى عربية تركبها سواء جديدة او مستعملة اكيد عاوزها على قد جيبك وعلى حسب دماغك بمعنى انت حاببها كبيرة او صغيرة هاتشباك او سيدان متور كبير او صغير المانى ولا يابانى ولا كورى ولا صينى كماليتها اية ؟ دا برضة سؤال مهم
بالنسبة بقى لأعادة البيع بص احنا هنا فى مصر عندنا عربيات ممكن تبقى عاملة زى الجنية الذهب رغم انها اى كلام ومتتركبش وعربيات تانية رغم انها ممتازة لكن ملهاش سوق ودا نتيحة عدة عوامل
اولا الصيانة طبعا هنا الصنايعية كلهم كفتجية ومش فاهمين حاجة فبالتالى اى عربية تتمتع بالتكنولوجيا الحديثة وشغل كمبيوتر وكلام من دا محدش بعرف يصلحها
ثانيا قطع الغيار ودى بقى بتشمل قطع الغيار الداخلية الات الجر والعفشة وكدة يعنى
وكمان قطع الغيار الاكسسوار زى الفوانيس والاكصدامات والاكر والزجاج والحجات دى ودى ناس كتير بتهتم بأسعارها يعنى ممكن تلاقى عربية فانوسها ب 20 جنية وعربية تانية فانوسها ب 2000 جنية والحجات دى مهمه لأنها معرضة ديما للكسر
ثالثا الشكل ود كان زمان مش حاجة مهمة لكن دلوقتى بقى مهم جدا لدرجة ان فيه ناس كتير بتشترى العربية عشان شكلها رغم انها عربية سيئة
رابعا الكماليات ودى بقت من اهم الحجات دلوقتى البور التكيف السنتر الانذار الاتوماتيك الخ
دى كلها حجات مؤثرة فى عملية البيع والشراء
طيب اشترى اية ؟
بص لو انت مهتم بموضوع اعادة البيع يبقى هات عربية منتشرة سعرها مش بينزل بسرعة بس فى نفس الوقت تكون مناسبة لإحتياجاتك وطبعا لو انت مش ناوى تخلى العربية معاك فترة كبيرة يبقى خسارتها حتكون اقل دا كمان ممكن تشترى عربية وتبيعها بنفس السعر ويبقى انت ركبتها ببلاش اهم حاجة فى الموضوع حالة العربية لأن انت ممكن تجيب عربية وتقعد تصرف عليها تصليح وبتاع وكلام من دا عشان كدة افضل حاجة انك تشترى عربية حديثة مش اقل من 2008 وكمان ابعد عن الحجات اللى راشة دواخل نهائى او مخبوطة او فيها مشاكل كمان بلاش العربية الفابريكا برة لية لأن فى الغالب حتتحك منك وتتخربش وفى الاخر حترشها يبقى انت كدة خسرت برضة وفى البداية والنهاية متفكرش كتير فى موضوع اعادة البيع انما فكر انت حابب تركب اية ومميزاتها اية وربنا يرزقك الخير