السلام عليكم و رحمة الله
طبعا انتوا عارفين اني بعت عربيتي الفيكترا .. قبل ما أبيعها لاحظت حاجه رخمه في عداد الحراره.
لما بتكون العربيه بارده و أدور و أمشي .. بتمشي كويس جدا .. لحد ما الحراره توصل 90 تقريبا .. و تفضل حوالين 90 حسب سواقتك لو ماشي بسرعه تقل .. و لو وقفت توصل ل 92 تقريبا.
لو وقفت بالعربيه و نزلت أشتري حاجه من سوبر ماركت مثلا .. و رجعت دورت الاقي مؤشر الحراره وصل ل 90 مثلا و الموضوع ماشي طبيعي.
المشكلة بتحصل لما أقف و أنزل من العربية أقل من 5 دقايق أرجع و أدور العربية الاقي عداد الحرارة على صفر .. لازم أخبط عليه أو على التابلوم من فوق عشان يرجع واحده واحده لمكانه .. الموضوع ده مبيحصلش الا لو وقفت أقل من 5 دقايق.
أنا كنت سألت منصور الكهربائي اللي شغال عند صابر و قال لي ان الملف بتاعه وحش .. لما بيسخن بيعمل كده.
أنا طبعا قلت للي اشترى العربية على الموضوع ده قبل ما أبيعها .. و هو كلمني من كام يوم بيسألني يعمله فين .. أنا دلوقتي عاوز اعرف الاتي:
1. هل دي مشكلة ملف فعلا؟
2. أجيب ملف لوحده ولا لوحة عدادات كامله؟
3. عاوز حد محترم يفك التابلوه من غير ما يكسر الهوايات .. عشان انتوا عارفين ان اللي كان شغال مع صابر كسر هوايه قبل كده و اشتريت واحده تانيه.
4. يعمل له كام الملف ده تقريبا؟