6 شهور جنان على الاقل للى بينوى يشترى عربيه جديد او مستعمل
شغل جنان فعلا, اللى نوى انه يشترى عربيه بيجيلوا هسس فى نفوخه على الاقل 6 شهور, سواء هيجيب عربيه جديده او مستعمله.
كل واحد فكر يجيب عربيه مثلا بـ 30 الف وياخد اونو ولا حاجه فى نفس المستوى يقولك طيب ما ازد واخش لـ 40 الف واخد لانوس مغرقه الدنيا وقطع الغيار (كالعاده الشعب بيقلد فى كل حاجه, واحيانا بتبقى ميزه), شويه تسحب معاه على الجديد ولو تقسيط ويروح داخل على الحاجات ام 60 الف, يلاقي مشاكل يقولك طيب ما اخد مستعمل نضيف بنفس المبلغ ويبقى كده وصل بالسلامه لمودلات الالفين مستريح, يلاقى الدنيا مش مظبوطه والناس بتلبس فى المستعمل وكلام عن قطع الغيار وقرف التوكيلات ويبقى خايف, يرجع للجديد بس يخش على 90 و100 الف, وتبقى عنيه على ام 130 الف, ويفكر يجيبها مستعمل, وهكذا القصه لحد ما يجيلوا نصيبوا وخلاص. دى قصه حقيقيه مش من نسج الخيال على فكره.
انا هقول قصتى ببساطه شديده لان النفوخ قرب يضرب
اولا انا معجب بالعربيه البروتون البيرسونا, كامكانيات وسعر وكمان تنفع لعيله يعنى مش صغيره, بس القرف والهبل اللى الناس بتشوفه مع التوكيل والعربيه نفسها احيانا حاجه تتعب الواحد نفسيا, وكنت ناوى اجيبها جديده ان شاء الله
المهم قررت انى ابعد شويه عنها وافكر فى خيارات تانيه واضغط الميزانيه كمان عشان مزعلش عليها لما تتبهدل, وانا مليش فى القسط, المهم نزلت مصر اجازه عجبتنى الماتركس واكتشفت ان الشعب كله معجب بيها :duh2: ومغرقه الدنيا مش مشكله المهم انها كويسه, وبعدين شوفتها معجبتنيش الكنبه اللى ورا ضيقه, العربيه كبيره من بره او عاليه بمعنى اصح لكنها صغيره ورا وكمان واطيه على الارض جدا, يعنى نفرين وزن تقيل يركبوا ورا والعربيه تزحف جنب اخوتها زى اللانوس, وبصراحه عنيا على الكارينز ومغرقه الدنيا بردوا طبعا وهى كويسه وعاليه على الارض نسبيا.
المهم فى يوم عديت جنب معرض فى كوبرى القبه ولقيت حبى القديم البرسونا, حبيت اسأل عليها بغرض الفضول مش اكتر, لقيتها جديده مش مستعمله وسعرها 96 الف, المهم قولت ابوص عليها فضولا بردوا وانا بتفرج عليها كان جنبها سيراتو 2010 بحوالى 95 الف, جميله طبعا من بره ومن جوه (انا بتكلم على الشكل العام مش حاله العربيه) بس طبعا العربيه ضربت الرقم القياسى فى عدد السرقات, ومش ثابته على الطريق حسب معلوماتى لانى مركبتهاش (عشان محدش يزعل منى :B4_033:), كل ده بقى مش مهم المهم وانا بتفرج على السيراتو لقيت عربيه تالته واقفه اسد جنبهم كدا, فولكس باسات, بقوله تبعك, قالى اه 71 الف موديل 2000 وعداد 140 الف, بصراحه وقفت ابوص ليها اكنى اول مره اشوف الباسات لانى كنت بقارنها باللى جنبها موديلات 2010 و2012, مع انها شكل قديم وطلع بعدها شكلين جداد تقريبا ولا حاجه, وساعتها افتكرت ان فى شركات كده سابقه الدنيا, مرسيدس, بى ام, وفولكس وغيرهم, يعنى مثلا تلاقى البى ام فيها abs من قرن فات والناس دلوقت بتشترى العربيات 2012 وabs اوبشن فيها جنان يعنى, غير انهم سابقين فى التصميم بتاع العربيه نفسه وشكلها الجمالى والفخامه بتاعتها.
المهم قررت اعمل لفه على عربيات من نفس الوضع مستعمل, قبل ما اكمل محدش يقولى انت بتقارن بين فئات مختلفه وسنين تصنيع مختلفه, وقطع غيار قليله او اغلى, انا عارف وكل حاجه وليها عيوب ومميزات, انا بدور على عربيه عائليه وعاليه على الارض لان اللى بيحصل فى الشوارع جنان مش طبيعى وطبعا بسعر معين. المهم لقيت اتنين من المانيا واتنين من فرنسا
طبعا الفولكس الباسات ماشى معاك السعر حلاوه لحد 2002 مثلا وبعدين يضرب فجأه, قولت لا انا عاوز سعر وكمان سنه تصنيع.
نروح على سكودا A4, مع انى مش حابب شكلها (ازواق محدش يزعل) بس جامده طبعا بشكل عام, المهم هتلاقى السعر حلاوه لحد 2004 او 2005 ودى اقل عربيه سمعت مشاكل عنها من اصحابها, طبعا انا بتكلم على مشاكل عربيه مش توكيل او قطع غيار غاليه وكده.
قولت نكمل ونشوف بقيت الحبايب, روحت على الفرنساوى لقيت الرينو الميجان, هتكلم على موديل 2008 بس, عشان عشان ابقى بعدت عن المشاكل بتاعتها اللى فى النسخ القديمه خصوصا مشكله الفتيس بتاعه 2005 والنسخه بتاعه 2008 تقريبا مسمعتش ليها مشاكل, وكنت شوفت اختها الاحدث الفلوانس وركبتها, تحفه فنيه طبعا, بس بردوا العربيه اكبر مشكله فيها الصيانه صعبه ومشاكلها قاتله, بمعنى انها توقف العربيه فورا مش تمشى حتى وتستر شويه لحد ماربنا يفكها علينا بحد يصلحها, مع انى كنت معجب بالفلوانس وكنت ناوى عليها جديد كمان النسخه اللى تحت الهاى لاين عشان مش بحب الدلع الزياده :vctry:.
المهم سيبت الرينو ورحت لقرايبهم فى بيجو, لقيت 307 موديل 2008 عشان شكل جديد مع ان الاقدم تحفه, بس اهو السعر ماشى معانا حلاوه فى نفس الكلام بتاع اخواتها اللى فاتوا, وكمان كان فى مشاكل فى الدينامو الدينامو فى النسخ الاقدم واتحل او قل بعد كده.
فى عربيه كمان بس انا استبعدتها وهى الفورد فوكاس, ودى ركبتها بتاع سنه وكانت موديل 2006, وبصراحه العربيه حماله قسيه وبهدلتها ومقالتش لا, وكنت بسافر بيها اكتر من الف كم مع توقف مرتين كل مره بتاع ربع ساعه ومشتكتش ماشاء الله بس العربيه مصر شبه منعدمه, مع انى اعرف ناس معاهم الفوكاس بس مسألتش على وضعها لان مشوفتها فى شهر كامل غير مره واحده او اتنين بس فى الشوارع.
كل دول بيتكلموا من 70 الف مثلا الى 85 الف وحسب الحاله اكيد
السؤال بقى اللى بيطرح نفسه, لو مكانى تعمل ايه؟
وهل ممكن تجيب واحده من دول ولا ايه وليه؟
انا ناوى اشترى خلال شهور قليله, ان شاء الله لما انزل مصر تانى....
