عاوز صنايعي أو مركز بيعمل شغل زرجينة

**reallistic** · 15-11-2012 02:01 PM

أنا معايا بونتو 94
عاوز صنايعي محترف أو مركز متخصص لعمل شغل زرجينة و ضبط أبعاد و مقاسات
بس أهم حاجة يكون الشغل بإحتراف و على أساس حسابات و مقاسات أصلية
أنا من الهرم - جيزة لو يكون في النطاق ده يبقى تمام
إنما لو شغل على أبوه و تمام التمام مستعد أروح أي مكان حتى لو فين
ولاّ الأفضل أروح التوكيل ؟؟؟
و هل فيه كذا توكيل لفيات ؟ لو فيه أنهى أفضلهم ؟
أنا أول ما جبت العربية مستعملة من حوالي 5 سنين
كنت رحت بيها توكيل في أبو رواش مش فاكر أسمه !

منتظر مشاركاتكم و شكراً مقدماً ...

**DONYO** · 18-11-2012 11:15 AM

بص يا باشا انا اعرف سمكري محترف من سوريا وهو 10/10 هو اسمة وسيم وشغال في ورشة في شارع العمدة بالكوم الاخضر بالهرم في اول الشارع من اول ما تخل من شارع ترسا على ايدك الشمال
انا شفتع مل زرجينة لعربية لادا 2107 وكان شغل محترم دة غير اني عملت عندة شغل في شنطة العربية مرة وكان ممتاز
مع تحياتي

**misoalex** · 23-11-2012 07:17 AM

الموضوع ده حيفيدك جدا واعتقد انه فيه طلبك بالظبط

http://www.nilemotors.net/Nile/308269-a.html

**reallistic** · 06-12-2012 03:24 PM

ألف شكر يا جماعة
و عاوز أعرف حاجة
دلوقتي أنا العربية مشتريها مستعملة من فترة
و كنت عارف أنه كان فيها خبطة من تحت قدام في رصيف ناحية تقريباًَ اليمين
و لما مرة رحت لعفشجي و كنت بأغير مساعدين
قاللي أن الكوبلن ناحية اليمين راكبله وردة علشان مايطلعش من مكانه بسبب أن الحوض مفتوح شوية
و بعدها كنت بأدردش مع الميكانيكي أني عاوز أعمل زرجينة و أظبط الحوض
قاللي لازم الموتور يطلع و بعد كده يتعمل زرجينة و بعدين الموتور ينزل
فهل فيه إمكانية أن العملية دي تتعمل من غير ما الموتور يطلع
لأنها هاتبقى شغلانة كبيرة و الوقت عندي مش هايسمح بكل ده
هل عند سمير علي ممكن العملية دي تتعمل من غير حوار رفع الموتور ؟؟؟
يعني لو العفشة بس قدام تتفك كلها و تتعمل الزرجينة و بعد كده تتركب
هل ممكن ؟

حاجة تانية عاوز أعملها بعد عمل الزرجينة و هي بار شداد
بس عاوز أجيب بار جاهز نضيف حاجة مستوردة
هل حد عنده الكلام ده ؟ ولاّ مافيش غير أني أعمله عموله ؟