الموضوع: صورة لسياة نص نقل تحمل 40 تلميذ-كارثة اخري في الطريق يا سادة

انزل شارع الهرم شوف التكاتك اللى مركبه فوق ال 10 عيال الصبح مناظر تقرف وحاجه اخر قلة ادب

99% من الناس اللى موديه ولادها مدارس خاصه و معندهاش عربيات توديها بيها و نجيبها أو ممعهاش فلوس تدفع فلوس الباصات أو المدارس الحكوميه اللى فيها ولادها بعيده عن بيتها بتتفق مع اى عربيه او ميكروباص او حتى توكتوك يودى العيال و يجيبها من المدرسه .. العيب مش على الاهالى لان مفيش قدامهم اى حدل تانى علشان ولادهم تتعلم .. المشكله دلوقت فى الحكومه مش فى الاهالى و اللى هيتكلم هيقولوا هو يعنى ذنب الرئيس مرسى او ذنب رئيس الوزراء هشام قنديل و فى الاخر هترسى على عامل المزلقان و سواق القطر و تتقفل القضية و كلها كام يوم و تيجى مصيبة جديده و ننشغل فيها .. يا جماعه النهارده الناس كلها بتتكلم على ماتش الاهلى بتاع امبارح او على حفله البابا الجديد و محدش جايب سيره الحادثه دى و لا كأن احنا عندنا عيال و كان ممكن جدا جدا باص المدرسه اللى بادفعله الفين جنيه علشان ينقل اولادى يكون مكان الاتوبيس اللى ده ..

المضطر يركب الصعب

يا أخي والله الواحد مش عارف يقول إيه.... أنا ساكن في بشتيل وعلشان أقدم للإبنتي في مدرسة تجريبي... طلع أقرب مدرسة لسكني في شارع السودان... ولما رحت أقدم فيها قالوا لازم يكون العنوان على إمبابة.. مش بس كده ده كمان لما شفت منظر الفصل اندهشت من كثرة العدد قالوا لي 50 طالب في الفصل... أي كلام يعقل يا سادة.. طبعًا قررت أني مقدمش في منطقة إمبابة تمامًا.. طبعًا اضطررت أني أقدم تبع محل سكني إللي هو منطقة المعادي الجديدة بمساكن السعودية... بعد ما قدمت واستنيت التنسيق للمتقدمين للمدارس التجريبية في المرحلة التمهيدية بمنطقة المعادي... طلع حظي وحظ ابنتي إللي لا حول لها ولا قوة في مدرسة تجريبية في وسط مكان هاوي بعد كارفور المعادي إللي على الدائري... والغريب في الأمر والله العظيم يا سادة أن في مدرسة تجريبية على بعد 200 متر من منزل العائلة إللي في مساكن السعودية إسمها الهلال الأحمر التجريبية وإللي في الأول قدمت الورق فيها.. أي عقل وأي دين وأي مله تقول أن جنبي مدرسة وبنتي لم تقبل بها علشان المدرسة إللي جنب البيت أخذت 5 سنوات و7 شهور.. وابنتي كان عندها 5 سنوات 6 شهور و3 أيام علشان كده تنسيقها جه في مدرسة السيدة خديجة إللي خلف كارفور المعادي إللي على الدائري... بصراحة لما رحت المدرسة قلت خيرًا قدر الله وما شاء فعل.. وذلك من نظافة المدرسة إللي مشفتش زيها في مدارس إمبابة ولا الجيزة تمامًا.. ولكن والله العظيم بنتي تيجي كل يوم مغيبة تمامًا من طول الطريق وتكدس الباص إللي كل يوم معاه في مشكلة بسبب التأخير وساعات ميجيش خالص وساعات نتصل بيه المشرفة تقول أصل معلش اتخرنا في البنزينه علشان كان بيفول سولار ويقف طابور كبير ومعه الأولاد.. حسبنا الله ونعم الوكيل في التعليم بمصر والقائمين عليه... دلوأتي بنتي الحمد لله في kg2 وطبعًا أثناء الدراسة مضطر الإقامة مع والدتي ووالدي في المعادي وأرجع (خميس، وجمعة، وسبت)... إمبابة..
لحد ما ربنا ييسر الأحوال وأشوف شقة حوالين المدرسة