ايه تفسير الدخان دا يا جماعة؟

**Khaled Lanos** · 20-11-2012 10:53 PM

المشاركة الأصلية كتبت بواسطة MITSUKERO

لا كاوتش الصباب بيبقي دخنه بيضاء الصبح و نقص زيت مع الحرق علي العربية و الجري بيها علي سرعات عالية فقط مش دخان طول النهار خالص

الموضوع كدا شكلو طلع بجد

أنا قيست الزيت النهارده على العصرية كدا لقيته فعلا ناقص شوية 1.0L

الزيت فيسكو 5000 ومشيت عليه يجي 800 كيلو تقريبا لسا مغيره مكملش شهر..

طيب مفيش اختبار دقيق مثلاً اقدر اعمله عشان أتأكد 100% اذا كان العيب من كاوتش الصباب ولا لأ؟

وبعدين ممدوح باشا قال ان لو عيب جلد صباب هتلاقي زيت على سن البوجيهات.

وكمان هو مش المفروض لو عندي مشكلة جلد صباب يبقى الشكمان ميعرقش زيت؟!!

وعلى فكرة أنا بحرق من حين لآخر مش دايما يعني كل فين وفين ولما بحرق مش بعدي 5rpm
مش عارف بقى هل النقص دا يمكن عشان حرقت على الغيارات؟

أنا متدايق جدا وخلاص انا اتقفلت من العربية بجد

**mahmoud_anwar** · 20-11-2012 04:59 PM

بص ياباشا بعيدآآ عن الافتا
انتا دورت العربية والجو كان ايه سقعة وكان الصبح ولا بليل لي ان الي عندك ده ملهوش غير تفسير واحد بس وهيا بخار مش اكتر
اما بي النسبة للمدافع الي بتسمعها من الشكمان فا حضرتك غير طقم كهرباء سلك بوجيهات وبجيهات جديدة

**Khaled Lanos** · 20-11-2012 11:15 PM

المشاركة الأصلية كتبت بواسطة wassof

بص ياباشا بعيدآآ عن الافتا
انتا دورت العربية والجو كان ايه سقعة وكان الصبح ولا بليل لي ان الي عندك ده ملهوش غير تفسير واحد بس وهيا بخار مش اكتر
اما بي النسبة للمدافع الي بتسمعها من الشكمان فا حضرتك غير طقم كهرباء سلك بوجيهات وبجيهات جديدة

بص ياباشا انا دورت العربية 6ونص الصبح في عز البرد والدخان قعد يجي ربع ساعة كدا لحد مال العربية سخنت واختفى ومظهرش طول اليوم..

بالنسبة لطقم الكهرباء انا هغير بوجيهات الاسبوع الجاي ان شاء الله ولو الدنيا مظبطتش هغير الأسلاك وهبلغكم بالأخبار.

وعلى فكرة انا قيست الزيت النهارده وفعلا لقيت شوية ناقصين

**AlGazar2** · 21-11-2012 12:23 AM

فى الغالب الزيت هوه المشكله لانه خفيف و بيبقى عايز ماتور جديده و سليم لغايه 100 الف مثلا بعد كده بيبقى الزيت الى العربيه بتستخدمه معدنى

و شوف كده لو العربيه عندك بتنشع زيت حوالين غطا التاكيهات او على الماتور ممكن ده سبب النقص لانه لو كاوتش صباب او شنبر الماتور تقريبا هاتحطله لتر او لتر و نص زيت كل اسبوع او اتنين

غير الزيت ده لزيت لزوجته اعلى و مش هيعمل معاك كده

**MITSUKERO** · 21-11-2012 09:39 AM

بص ياباشا عشان انت هتتعب نفسك و الموضوع ده مقتول بحثا

اول حاجة بص علي تسريب الزيت في كل حته و بص في الاماكن المختفية زي اويل سيل الكنك الامامي و الخلفي و درجة التسريب و اويل سيل موبينة و جوان غطاء التكهات و غيره و غيره

خلصت الحاجات دي كلها ابتدي بقي في الشك في كاتوش الصبابات (و ده انا متأكد انه عنده من وصفك) ده بيظهر الصبح بتلاقي في الاول دخان ابيض خفيف و بعدين يزيد شوية و بعدين يبطل و لو حرقت علي العربية الزيت يقل و ده بيخلي نسبة تأكل الزيت قليلة مش بالمنظر المخيف و لو بتمشي عادي مش هتحس ان الزبت بينقص

طيب الشنبر او الشمبر : هتلاقي الزيت بيقل بصورة ملحوظة و الدخان مستمر بنسب متفاوته

طيت تتأكد ازاي ؟

فك خرطوم العمة العريض اللي داخل للبوابة و بص علي البوابة لو لقيتها معرقة زيت يبقي فيه حاجة من الاتنين اللي فاتوا دول عندك

المعلومات دي مجمعها من اكتر من صنايعي و ممكن يكون فيها حاجة غلط بس ده كل اللي اعرفه و اسأل تاني و لو تروح لمحمد عبده يبقي افضل لانه فاهم جدا

والله اعلي و اعلم