مشكلة في العجل الخلفي لانوس

لاحظت المشكلة لما اكون واقف في اشارة ويكون الشارع مايل سنه بسيطة العربية لاتتحرك رحت للميكانيكي رفع العجل الخلفي ودوره بايدة كان العجل يلف وبعدين يبقى تقيل شوية وبعدين يلف وده للعجلتين الخلفيتين الميكانيكي قال ده بسبب بودرة تيل وفك الطنابير وكان فيه بودرة تيل كتير فعلا ونضف وركب الطنابير للعجلتين
المهم المشكلة راحت بدرجة بسيطة ولكن لسة محسوسة رحت للميكانيكي تاني قال نودي الطنابير للخراط بصراحة انا قلقان العربية عاملة 35 الف فقط اقوم اخرط طنابير وهي المشكلة فعلا من الطنابير ولا حاجة تاني مع العلم بان العجل الخلفي بيسخن بس موش جامد والطاسة بتكون تقريبا بارده
هل المشكلة فعلا في الطنابير ولا في التيل ولا في الماستر ولا حاجة تاني
وهل غلط اني اطنش وامشي على كدة

مشكلتك
1 - طنابير بها عالي وواطي
2 - خطاء في تركيب التيل والرجلاش

لو (( 1 )) الخرط لن يصلح ويجب تغيير الطنابير
لو (( 2 )) روح لميكانيكي بيفهم يظبطهم

متطنش لحسن تقفش منك وهتبقي مشكلة كبيرة

شكرا على الرد
التيل ماتفكش قبل كده خالص
لما فك الطنابير مكانش باين فيها عالي وواطي ولا حتى لما مشيل ايدي من الداخل ولا ده لا يعرف بمجرد النظر او اليد
مش ممكن يكون العيب من البلي لأني سعات باسمع صوت من العجل الخلفي بس موش على طول الصوت كدة زي مايكون الكاوتش مريح شويه
وهل الخطورة انها تقفش بس ولا ده حمل على الاسطوانة زي الميكانيكي ما قال

خلى الميكانيكى يقلل الرجلاش بتاع التيل شوية

انت محسسني ان انا اللي بتكلم

انا واجهت المشكلة دي بالظبط و لسه مصلحها من يومين بس انا الموضوع عندي اهملته فتطور

بص ياباشا
الموضوع مقسوم لكذا جزء
1- طنابيرك اخبارها ايه ؟ لازم ميكانيكي بيفهم يشوفهم و لو فيهم عالي و واطي غيرهم فورا و تغيير الطنابير بيتم معاه تغيير بلي العجل الخلفي اجباري مش اختياري عشان ظرف البلي القديم بيبقي محشور في الطنبورة القديمة
و ملحوظة صغيرة : مش اي حد يركب بلي العجل الخلفي عشان له رجلاش معين يعني لو الراجل قرص عليه بيحرق البلي و لو سابة مهوي شوية البلي بيبوظ بسرعة عشان العجل بيبقي فيه بوش

2- الماستر عندك عامل ايه ؟ اقصد الماستر الخلفي و هم 2 واحد في كل عجلة:
طيب الميكانيكي بيكشف عليهم ازاي ؟ بيفك الطنبورة و بيبص علي الماستر بيشوفة جايب زيت ولا لا
حاجة كمان و دي مفتاح المشكلة اللي كانت عندي : الماستر قافش ولا لا
انا عندي الماستر كنت بضغط عليه بصوابعي مش بيرضي يدخل لجوة و لما فكيته دقيت عليه و مرضيش يتحرك و لو المشكلة عندك ماستر فرامل غيره فورا لانه اتسبب ان الفرامل كلها تسيب عندي لانه خلاها تقفش و الزيت سخن و بالتالي الفرامل سابت
اغلب الميكانيكية مبيشفوش الماستر قافش ولا لا و ده غلط شائع بينهم هم بس بيشوفوا الماستر جايب زيت ولا لا و ده اللي دوخني

3- خراطيم الفرامل الخلفية اكشف عليهم

نصيحة من اخوك اللي اتلسع في 1275 جنية تصليح : اوعي تستني و اكشف علي الحاجات دي فورا قبل ما المشكلة تكبر لان عندي ابتدت زيك بالظبط و لما سبتها التيل خلص و الفرامل سابت و الدنيا باظت

و يفضل تروح لمحمد عبده لانه فاهم جدا

و ربنا معاك

شكر يا MITSUKERO
انا النهارده رحت عند ميكانيكي تاني فك الطنابير وقال كويسين والتيل كمان كويس فيه سمك كبير وقال المساتر كويسين بس عن طريق النظر مش ناشعين زيت
ازاي اختبر انهم موش قافشين لازم يتفكو ولا وهما راكبين
واللى محيرني ان العجل موش قافش تماما بيلف كويس ييجي في حتة تلاقيه تقل وبعدين يرجع يلف كويس
انا على فكرة موش باخرج بالعربية كتير هل ممكن لما العربية ماتمشيش كتير يحصل حاجة في المساتر أو خراطيم الباكم ولا مثلا علشان بكون شادد فرامل اليد وهي راكنة يكون حصل مشكلة بس اعتقد ان فرامل اليد ملهاش علاقة بالمساتر :dumb:

اخبار واير فرامل اليد عندك ايه

بص ياباشا

فك الطنبورة و فك التيل و اضغط بأيدك علي الماستر من الجانبين بتوعة و شوفة هيدخل معاك ولا لا

لو لقيته قافش يبقي غيره فورا

اغلب الميكانيكية لما بيلاقوا الماستر مش جايب زيت مش بيكشفوا يشفوه قافش ولا لا

اقتباس:

---

المشاركة الأصلية كتبت بواسطة tarek_2005

اخبار واير فرامل اليد عندك ايه

---

كويس يعني لا يمكن اطلع بالعربية وهو مشدود

اقتباس:

---

المشاركة الأصلية كتبت بواسطة mitsukero

بص ياباشا

فك الطنبورة و فك التيل و اضغط بأيدك علي الماستر من الجانبين بتوعة و شوفة هيدخل معاك ولا لا

لو لقيته قافش يبقي غيره فورا

اغلب الميكانيكية لما بيلاقوا الماستر مش جايب زيت مش بيكشفوا يشفوه قافش ولا لا

---

يعني لازم يفك التيل كمان ولا ممكن والتيل راكب وازاي اخليه يكشف على الخراطيم بتاعة الباكم

اقتباس:

---

المشاركة الأصلية كتبت بواسطة szrateb

كويس يعني لا يمكن اطلع بالعربية وهو مشدود

---

ولما بتنزل اليد وارفع العربية من الخلف العجل بيلف بسهولة

اقتباس:

---

المشاركة الأصلية كتبت بواسطة szrateb

يعني لازم يفك التيل كمان ولا ممكن والتيل راكب وازاي اخليه يكشف على الخراطيم بتاعة الباكم

---

ممكن منغير ميفك التيل بيفك الطنبورة ويضغط علي التيل للداخل بيعرف الماستر قافش ولا لاء

اقتباس:

---

المشاركة الأصلية كتبت بواسطة tarek_2005

ولما بتنزل اليد وارفع العربية من الخلف العجل بيلف بسهولة




ممكن منغير ميفك التيل بيفك الطنبورة ويضغط علي التيل للداخل بيعرف الماستر قافش ولا لاء

---

فرامل اليد بتقفش جامد والعجل بيفك لما تنزل وكمان الفرامل العادية ( جربتها لما كان بيفك العجل والعربية مرفوعة وقال لي دوس فرامل علشان يفك أول تكة في المسمار)
المشكلة ان العجل بيلف كويس وييجي في حتة يبقى جامد وبعديها يلف بسهولة وده بيبان لما اكون واقف على مطلع أو منزل بسيط جدا تلاقي العربية واقفة بس لو نازل منزل عادي ووقفت وبعدين سبت فرامل عادية أو يد العربية تمشي عادي لحد آخر المنزل
فيه حاجة لاحظتها انه لما فك الطنبورة كانت الصرة مليانة بودرة تيل هل ده عادي مع العلم ان دى أول مره افك الطنبورة والعربية معايا من الزيرو

اقتباس:

---

المشاركة الأصلية كتبت بواسطة szrateb

فرامل اليد بتقفش جامد والعجل بيفك لما تنزل وكمان الفرامل العادية ( جربتها لما كان بيفك العجل والعربية مرفوعة وقال لي دوس فرامل علشان يفك أول تكة في المسمار)
المشكلة ان العجل بيلف كويس وييجي في حتة يبقى جامد وبعديها يلف بسهولة وده بيبان لما اكون واقف على مطلع أو منزل بسيط جدا تلاقي العربية واقفة بس لو نازل منزل عادي ووقفت وبعدين سبت فرامل عادية أو يد العربية تمشي عادي لحد آخر المنزل
فيه حاجة لاحظتها انه لما فك الطنبورة كانت الصرة مليانة بودرة تيل هل ده عادي مع العلم ان دى أول مره افك الطنبورة والعربية معايا من الزيرو

---

شكلها كده طنبورة أو تيل والأقرب طنبورة
لأن معني كلامك إن التيل بيلمس الطنبورة في مكان ومكان لا وده غلط...لازم يكون الدوران متناسق
العالي وواطي مش بس بيكون من داخل الطنبورة لخارج الشفة...كمان ممكن يكون علي داير الطنبورة من الداخل

ده مجرد تحليل مني غير ناتج عن خبرة عملية

على فكره ده حصل معايا بالظبط
اولا:- خلاصه الكلام ان الطنابير عندك فيها سنه لوحه صغيره
و ديه علاجها الاساسى التغير ،،،،، و الحل المؤقت و مش وحش تروح عن مخرطته متخصص فى الطنابير مش اى مخرطه و يحاول يساويها .
ثانياً:- عشان تتاكد من المساتر الخلفيه لما تمشى بالعربيه فى الزحمه مع استخدام كتير للفرامل حط ايدك على الطنابير بس بحرص لو سخنه اوى يبقى المساتر تقيله و غيرها و ده اللى انا عملته بالظبط
لحد لما ربنا يسها و اغير الطنابير جديده و تيل جديد
يا رب اكون افادتك

اقتباس:

---

المشاركة الأصلية كتبت بواسطة tefa22m

على فكره ده حصل معايا بالظبط
اولا:- خلاصه الكلام ان الطنابير عندك فيها سنه لوحه صغيره
و ديه علاجها الاساسى التغير ،،،،، و الحل المؤقت و مش وحش تروح عن مخرطته متخصص فى الطنابير مش اى مخرطه و يحاول يساويها .
ثانياً:- عشان تتاكد من المساتر الخلفيه لما تمشى بالعربيه فى الزحمه مع استخدام كتير للفرامل حط ايدك على الطنابير بس بحرص لو سخنه اوى يبقى المساتر تقيله و غيرها و ده اللى انا عملته بالظبط
لحد لما ربنا يسها و اغير الطنابير جديده و تيل جديد
يا رب اكون افادتك

---

شكرا على الرد طيب الطنابير عندي بعد مشوار ساعة في الزحمة بتكون سخنة بس موش قوي يعني موش بتلسع والسخونة بتكون بسيطة قوي على الطاسة هل ده عادي
و2 ميكانيكية قالو الطنابير كويسة واحد الأعضاء قال ان خرط الطنابير بيبوظها موش عارف اعمل ايه؟