السلام عليكم
كنت عايزة اعرف من حضراتكم بعض المعلومات عن الكليو الأوتوماتيك..
انا مشكلتي حالياً في العربية عندي انها مانوال و انا بامشي بيها كتير و طبعاً زحمة مصر الرائعة زهقتني.. فبدأت أدور على أوتوماتيك في رينج سعر معقول..و بصراحة انا مش باقتنع بالكوري , و الياباني مبالغ أوي في سعره, ففكرت في الرينو عربية أوروبي و نضيفة و على رأي احد مالكيها "حمالة أسية"
كنت عايزة بس قبل ما اتوكل و ابدأ اجراءات بيع العربية اعرف كام حاجة..
مبدئياً العربية مفروض انها 1400 سي سي, بس كنت قريت كلام هنا عن انها بتبدأ من موديل 2005 و حد قال فيه منها 2004, و شوية اختلافات في الهورس باور بين الموديلات فكنت عايزة بس افهم الدنيا دي ماشية ازاي..
بالنسبة بقى للأسئلة..
1- هل الأوتوماتيك فيه مشاكل؟؟ معروف ان الفتيس الأوتو مش أي حد بيفهم فيه فمهم عندي النقطة دي.
2- هل العربية بشكل عام اعطالها كتير ولا لأ؟ يعني لو الصيانة منتظمة هاتمشي تمام ولا كل يومين عند الميكانيكي أو الكهربائي؟ و فيه مشاكل common فيها ولا لأ؟؟
3- قطع غيارها معمرة؟؟ و أسعارها over و لا في الرينج الطبيعي؟؟
4- هل عفشتها بتستحمل الطرق اللي فيها مطبات و حفر كتير و لا ممكن تتبهدل بسرعة؟؟
5- هل أي ميكانيكي شاطر يقدر يشتغل فيها ولا لازم مركز متخصص؟؟
6- طبعاً انا مش بتاعة جري, يوم ما جبت ال 140 كنت مكلبشة في الدركسيون كانه هايطير :biggrin: , بس عايزة اعرف ثباتها كويس ولا لأ ؟؟ و الفراااامل بتاعتها قوية و تسعف ولا؟!!
6- أخر حاجة و معلش على التعب, رينج السعر لو حالتها كويسة جداً؟؟ و فين الأماكن اللي ممكن اكشف فيها عليها؟ "ميكانيكا و عفشة و ناقل و الحاجات دي"؟؟
معلش على الإزعاج,, اسئلتي كتير انا عارفة بس مش هاغير عربية كل 3 شهور :dumb: بس عشمي فيكوا بقوا تستحمولني =)