السلام عليكم

طبعا العربية كالعادة بتحب تعمل احلي واجب في احلي وقت فقالت انكد عليه بأيه انكد عليه بأيه و هووب البطارية باظت

الموضوع و ما فيه ان لقيت مراتي بتكلمني الحق العربية بطفيها في البنزينة مش راضية تدور !!! قولتلها بصي دوري و اسمعي زنة طرمبة البنزين قالتلي لا ده الجرس بتاع الحزام ضعيف و العربية بتعمل حاجات غريبة قولتلها يبقي البطارية

الراجل اللي في البنزينة طلع جدع و وقف عربية و عمل توصيلة و جت لحد البيت مشوار بتاع 70 كيلو قولت اكيد لو البطارية كانت فضت شحن لاي سبب هتكون شحنت بس عشان ابقي مطمن مش هطفيها غير في محل بطاريات

طلعت علي السوق علي محل بطاريات اعرفة قولت برضة اقيس شحن الدينامو و لقيته تمام فبقولها بطلي كده و اول ما طفت لقيت الراجل بيقولي البطارية بايظة !!! فبقولة عرفت منين قالي الجهاز اللي بيقول جرب تدور و هوووووب مفييييييييييييييييش البطارية ماتت !!!

جبت الضمان من التابلوه و بشوف تاريخ الشراء لقيته شهر 8 سنه 2010 يعني سنتين و 3 شهور

قولتله غير و امري الي الله بكام ياعم قالي ب 435 البطارية اي سي ديلكو 55-30 زي اللي كانت راكبة بالظبط

قولتله توكيل علي الله

دلوقتي بقي البطارية دي بالظبط عاشت في عربيتي الانسر 4 سنين و نص اشمعني هنا سنتين و 3 شهور يعني !!!! نفس النوع و نفس الامبير !!!!! و كمان فيه بطارية بتموت فجأه كده !!!! مش بتعمل اي حركة الاول و بعدين تموت !!! دي حتي مرخمتشي في الدوارة !!!!

انا عارف ان سنتين عمر كويس للبطارية بس ال اي سي ديلكو عمرها طويل شوية المفروض يعني

يلا بقي الحمد لله

قولت افضفض بدل ما افرقع كده 1700 جنية في اقل من اسبوعين