الحمد لله استلمت رينو لوجان النهاردة .. اي نصيحة؟!

الحمد لله بعد ما قريت اكثر من 10 موضوعات هنا فى المنتدى عن الرينو اللوجان رحت شفتها يوم الجمعة اللى فات وعجبتنى جدا جدا من اول نظرة ولما قعدت فيها العربية حلوة جدا.. رحت حاجز والحمد لله استلمت النهاردة والعربية لونها فضى

- العربية واسعة جدا .. انا ركبت ومرجعتش الكرسى للاخر (انا طويل ووزنى زايد) وقعدت مرتاح وفى مساحة حلوة اوى للى هيقعد ورايا

- العربية كراسى اللى قدام والكنبة مريحين جدا جدا
- الشنطة واسعة اوى ما شاء الله
- العربية عالية عن الارض
- العربية شكلها من برة حلو و مقبول جدا جدا
- التابلوه شكله حلو
- مشكلة العربية الكلاكس مش فى الدريكسيون ، الزراير الخاصة بالزجاج فى المقعد الخلفى ورا الفرامل ودى مش مريحة بالنسبة لى ..

والنهاردة اما استلمتها وفى مشوار من المكان اللى جبتها منه للبيت عندى (من سور نادى الزمالك الى البطل احمد عبد العزيز) .. مبدأيا كده :

- الباور ستيرينج حلو جدا ومناسب تماما
- قاعد فى كرسى السواقة الرؤية زى الفل
- تقريبا مفيش صوت للموتور تماما (انا بعد ما ركنت كنت نازل وسايب العربية دايرة على انى طفيتها :oops:
- النقل من درجة لدرجة مبحسش باى تقل فى الفتيس

وده من اول نص ساعة سواقة فى العربية اهه ده التقييم المبدأى من وجهة نظرى ..

دلوقتى اى نصيحة بالنسبة للتليين ؟

اللى اعرفه ..

- التليين 1000 كيلو
- مشغلش التكييف طوال فترة التليين
- الrpm ميعديش ال3000 باى حال مالاحوال
- ممشيش على سرعة واحدة مدة طويلة

فهل فى حاجات كمان؟!

العربية مانيوال Full Options و1600 سى سى وجايبها من سور نادى الزمالك

شكرا

جلال

الف مبروك يا استاذ جلال وربنا يبارك لحضرتك فيها ان شاء الله ويحفظهالك من كل سوء ويكفيك شرها ان شاء الله.

النصائح انا شايف الحمد لله حضرتك ماشاء الله مذاكر كويس :) التليين زي ما حضرتك قلت بالظبط لا اختلاف وطبعاً لظروف الحر بس عشان المكيف وكده ممكن تخطف اي طريق صحراوي مثلاً رايح جاي مع طبعاً الحفاظ على السرعه 100 والار بي ام 3 - 3.5 عشان تخلص التليين على طول ان شاء الله وتقدر تشغل المكيف وربنا يبارك لحضرتك ان شاء الله وأي استفسار او طلبات احنا تحت امر حضرتك وحاضرين ان شاء الله .

تحياتي أخي الفاضل.

الف مبروك يا باشا

ربنا يباركلك فيها ويديك خيرها ويكفيك شرها

أنت كده تبقى عملت اللى عليك و زيادة شوية لأن العربيات دى بتنزل متلينة جاهزة


رامى باشا
هو لازم تكون انت أول واحد يرد على أى سؤال جديد يا باشا سيبلنا فرصة :)

الف مبروك يا باشا

و ربا يبارك لك فيها

الف مبروك و متنساش التليين

الف مبروك وربنا يكفيك شرها و يباركلك فيها
و عايزين نعرف اخبارها بعد التليين ان شاء الله
و االف مبروك

الف مبرووووووووووك

و لازم تبقى تغير النقلات كتيير و تمشى على كل نقلة شوية علشان تليين الفتيس

سؤال
تقدر تقولنا هل الماتور ناعم و لالا؟ مقارنه بالفيرنا
ولو مركبتش الفيرنا قولنا حتي ناعم بنعوه ايه؟

الف مبروك عليك العربية
على فكرة اللون الى انت مختاره احلى لون فيها

بس انا عندى سوال بخصوص موضوع التلين
هو لما افرمل مرة واحدة دا فيه غلط على العربية الى بتكون فى مرحلة التلين :Lighten:
على فكرة الكلام دا قريته هنا فى المنتدى

الف مبروك يا باشا ربنا يباركلك فيها ويديك خيرها ويكفيك شرها

الف مبرووووك وربنا يباركلك فيها

العربية معقولة بس شكلها بس هو اللى مش ولا بد وتقفيلها اى كلام بس ايه موضوع الكلاكس مش فى الدريكسيون دى غريبة امال هو فين
متهايألى انه لو فعلا مش فى الدريكسيون تبقى حاجة مزعجة جدا ويبقى ده غباء من اللى صممها بصراحة

معظم العربيات الفرنساوى كلاكسها فى دراع المساحة او دراع الاشارات ، بيكون على شكل زرار فى طرف الداراع بينضغط لجوه، شوية وبتتعود عليه

الف الف مبروك

الف الف مبروك وربنا يديك خيرها ويبعد عنك شرها

اقتباس:

---

المشاركة الأصلية كتبت بواسطة sharky

الف مبروك يا باشا

و ربا يبارك لك فيها

---

الله يبارك فى حضرتك شكرا :)

اقتباس:

---

المشاركة الأصلية كتبت بواسطة mohamed ibiza

الف مبروك و متنساش التليين

---

ودى معقولة برضه انسى التليين؟ ده التليين ده عاملى رعب اصلا:biggrin24:

اقتباس:

---

المشاركة الأصلية كتبت بواسطة tetto1982

الف مبروك وربنا يكفيك شرها و يباركلك فيها
و عايزين نعرف اخبارها بعد التليين ان شاء الله
و االف مبروك

---

ان شاء الله اخلص التليين واقول ايه النظام

اقتباس:

---

المشاركة الأصلية كتبت بواسطة fahd_628

الف مبرووووووووووك

و لازم تبقى تغير النقلات كتيير و تمشى على كل نقلة شوية علشان تليين الفتيس

---

طب كويس مكنتش اعرف الموضوع ده شكرا اوى :) بس لازم اوى الموضوع ده عشان انا اصلا ساكن فى منطقة زحمة فاخرى اول وتانى وتالت :oops:

اقتباس:

---

المشاركة الأصلية كتبت بواسطة semihuman

سؤال
تقدر تقولنا هل الماتور ناعم و لالا؟ مقارنه بالفيرنا
ولو مركبتش الفيرنا قولنا حتي ناعم بنعوه ايه؟

---

لا مقدرش احكم بصراحة انا ركبت الفيرنا مجرد قعدت فيها وكده مسقتش ولا حتى مشيت بيها او كان جنبى حد سايقها .. اللى اقدر اقوله كمقارنة بين الفيرنا واللوجان ان اللوجان من جوه اكبر واوسع واريح بكتير .. بس الفيرنا تتفوق فى حتة اماكن الزراير واشكالها والسى دى بتاعها Rockstar نضيف بينما اللوجان انا بافكر اغير السى دى كاسيت بتاعها .. والشنطة العربيتين شنطتهم حلوة جدا وخاصة اللوجان ممكن تحط فيها شخص او اتنين اصلا ..

اقتباس:

---

المشاركة الأصلية كتبت بواسطة alfa_we

الف مبروك عليك العربية
على فكرة اللون الى انت مختاره احلى لون فيها

بس انا عندى سوال بخصوص موضوع التلين
هو لما افرمل مرة واحدة دا فيه غلط على العربية الى بتكون فى مرحلة التلين :Lighten:
على فكرة الكلام دا قريته هنا فى المنتدى

---

اه موضوع الفرامل ده انا عندى ملحوظة فيه .. لما بافرمل باسمع صوت غريب بعد مالعربية تقف ومفيش اى حاجة فى الشنطة مثلا او فى اى مكان فى العربية ممكن يعمل الصوت ده ..

اقتباس:

---

المشاركة الأصلية كتبت بواسطة mo7amed_omara

الف مبروك يا باشا ربنا يباركلك فيها ويديك خيرها ويكفيك شرها

---

الله يبارك فى حضرتك شكرا وان شاء الله خير :thinking:

اقتباس:

---

الف مبرووووك وربنا يباركلك فيها

العربية معقولة بس شكلها بس هو اللى مش ولا بد وتقفيلها اى كلام بس ايه موضوع الكلاكس مش فى الدريكسيون دى غريبة امال هو فين
متهايألى انه لو فعلا مش فى الدريكسيون تبقى حاجة مزعجة جدا ويبقى ده غباء من اللى صممها بصراحة

---

الكلاكس فى دراع الاشارات ومكانه معقول على فكرة مش وحش للدرجة وخدش وقت عشان احفظ مكانه .. موضوع الشكل ده مسألة ازواق كل واحد بيحب حاجة غير التانى انا شخصيا العربية عاجبانى اه مش تحفة بس شكلها حلو مش بطال :cool:

اقتباس:

---

معظم العربيات الفرنساوى كلاكسها فى دراع المساحة او دراع الاشارات ، بيكون على شكل زرار فى طرف الداراع بينضغط لجوه، شوية وبتتعود عليه

---

تمام :thumbsup:

اقتباس:

---

الف الف مبروك

---

الله يبارك فى حضرتك شكرا :)

----------------------------------------

دلوقتى انا نزلت لفيت بيها امبارح شوية يعنى نص ساعة مثلا .. العربية سخنت بطريقة انا شايفها مش طبيعية شوية .. يعنى البودى بتاع العربية كان مولع .. فتحت الكابوت وشى اتلسع ما الهواء اللى طالع .. رغم ان العربية مؤشر الحرارة كان مدى 4 شرط من اصل 9 فمش عارف بقى دى مشكلة ولا ده عادى

وكمان فى صوت زنة "تك تك تك تك تك تك تك تك تك" والعربية واقفة وانا "ممورها" والموتور داير .. الصوت ده بيقل شوية اما ادوس دبرياج وانا واقف من غير مانقل او حاجة بس يرجع يزيد تانى اما اشيل رجلى من عالدبرياج .. بينما بيختفى خالص وانا ماشى .. فمش عارف برضه ايه الموضوع ده انا مليش اوى فى العربيات للدرجة اللى تخلينى اعرف :oops:

والسى دى كاسيت ما شاء الله اللهم لا حسد مبيشغلش ولا سى دى لا اوديو ولا Mp3 وده معتقدش انه عيب منى لأنى الحمد لله عارف كويس ايه الفرق ما بين الاسطوانات دى وبتتعمل ازاى فمتأكد انه عيب من الكاسيت نفسه

غير كده العربية كويسة الحمد لله وشغالة وخلصت 25 كيلو من الالف بتوع التليين .. يعنى نقصلى 975 كيلو ان شاء الله :fool::fool::wheelchair:

وفى كمان مشكلة اسف تقلت عليكم :(

العربية اما بافرمل فرملة محترمة يعنى بادوس عالفرامل بالراحة اهدى وبعدين اقف باسمع صوت غريب كان حاجتبين خبطوا فى بعض او حاجة حكت فى حاجة تانية .. الكلام ده سواء كنت ماشى بسرعة وهديت ووقفت او كنت ماشى بالراحة اصلا ووقفت بس لما ابقى ماشى واهدى بس من غير ماقف الصوت ده مبيطلعش .. يا ترى ايه المشكلة دى؟! :(

على فكره كل اللى قلتو دا بيختفى بعد اول الف كيلوخصوصا الصوت بتاع الدبرياج
انما انا عندى العربيه مفيهاش مشكلة السخونه دى خالص بالاضافه لموضوع السى دى
انا عندى بيشغل اوديو بس مش ام بى ثرى هو بيهنج كتير انما ناوى اقوللهم فالتوكيل

ايه حكاية الكاسيت دا يا جماعة ؟
انتوا كدة قلقتونى بجد

اقتباس:

---

المشاركة الأصلية كتبت بواسطة alfa_we

ايه حكاية الكاسيت دا يا جماعة ؟
انتوا كدة قلقتونى بجد

---

المواضيع اللى قريتها فى المنتدى بتقول ان فى مشكلة فى كاسيت العربية .. معظم الناس بتقول الكاسيت بيعلق "بيهنج" بعد 4 او 5 تراكات .. فى ناس قالت سخونية ووديها التوكيل وهم هيظبطوها وكده .. انا عنجى مبيشغلش اى سى دى وان شاء الله هوديها للناس قريب :)