عفشجى فورد كويس وقطع غيار أستيراد

**ffff** · 06-12-2012 01:02 AM

معايا فيستا 79 موتور 1100 تقريبا كده هتحتاج حاجات فى العفشة ممكن توصل لجانبين كاملين....
عاوز حد كويس أستيراد أجبهم منه ويبقى مضمون .....وعايز حد كويس يركبهم بس طبعا أروحلو الأول يشخص ويقولى عايز إيه بالظبط.........
أنا روحت لقطب الصنايعية اللى عندو مكسلين يبصو حتى على العفشة هو قالى تشترى الجامبين كاملين..........قولتلة طيب بص الأول بدل ما أشترى حاجات وتكون سليمة.....قالى لا أشترى الجنبين المساعدين + السوستتين + المقصين.......انا بثق فيهم بس عايز حد تانى يبص على العربية عشان أطمن وأتأكد قبل ما أشترى...........
ومن الأخر مصنعية تركيب الليلة دى كلها وأهم نظافة التركيب عند قطب ولا أحمد فرج ولا حمدى ولا عفشجى متخصص
على فكرة أنا بحترم قطب عشان هو ترشيح صديق عزيز جوزيف وأنا كل لما أروح أقولهم أنا جاى من طرف جوزيف بس أخر مرة وللامانة قطب ماكنش موجود.......ظبط تكيهات فقط + تنظيف بوجيهات الصنايعى قالى 50 جنية روحت دافع 30 والموضوع ماخدش 5 دقايق وماحستش بفرق وصوت الموتور لسه عالى بس كان فى رعشة اول ما بدور واختفت والسحب بقى أحسن....
يلا مستنى الردود من الخبراء.......وشكرا

**egytamer** · 07-12-2012 01:13 AM

بص الصنايعية ارتياح نفسي وحظ ممكن صنايعي متوسط بس بظبطلك حجات في العربية فترتاحلو نفسيا وتحب التعامل معاة
انا عن نفسي مبحبش اتعامل مع صنايعي يقولي الاحسن نغير ويريح دماغو لا الصنيعي الشاطر الي يصلح الحاجة الي ممكن تتصلح ويوفرلي فلوسي لاني جايب عربية مستعملة ورايح لصنيعي علشان فلوسي محدودة ولو متيسر كنت جبت زيرو ورحت التوكيل وريحت دماغي.
انا برتاح للتعامل مع احمد فرج ليا معاة مواقف كتير حسيت انو فاهم وشاطر وامين ودا رئي وتجربتي الخاصة
حاول تشوف حد يكشفلك علي العفشة ويقلك اية سليم خسارة تغيرو واية ممكن يمشيك فترة من غير مياثر واة بايظ ولازم يتغير .
ونصيحة بلاش مساعدين استيراد خليك في الجديد احسن في kyb و ساكس وبلشتين والثلاثة كويسن.
والله اعلي واعلم

**aYaBooY** · 08-12-2012 02:44 PM

الاول مفيش عفشة استيراد بتعيش سيبك من الموضوع ده
ثانيا المساعدين يجو جداد الاستيراد صلاحية 10 ايام على الاكثر
ثالثا انت معندكش اي حاجة في العفشة معقدة بل بالعكس عفشة الـ 1100 بسيطة جدا
انت محتاج تقول الاول انت بتحس بايه بالظبط في العفشة و نشوف انت هاتحتاج ايه
موضوع التكيهات هو بيظبط العربية في المشي و الدوارة و صوت العربية مابيوطاش هو اصلا صوت مواتير الفيستا صوت بايخ و ده العادي

**ffff** · 09-12-2012 03:40 PM

شكرا جدا ل egytamer و جوزيف لردهم المفيد....
هو فعلا الصنايعى أرتياح نفسى وانا أتعاملت مع قطب ومرتحلة بس مش عاججبنى شوية الصنايعية اللى عندو.....وهو كشف على العفشة بالنظر فقط وقالى تشترى جانبين كاملين وقالى أستيراد.....بس بصراحة هاروح لواحد أو 2 كمان وأسمع كلمتهم برضه.....غالبا هاعمل زيارة لحمدى وأحمد فرج.........ولو فى حد فى صقر قريش هى كلها صنايعية يبقى أقرب عشان انا من المعادى أساسا وكل الناس الكويسين بعيد عنى.....
...
بص يا جوزيف أولا العربية فجأة فى يوم هبطت من ناحية اليمين بصيت لقيت الرفرف اليمين كبس على العجلة خالص بس مش بيحك فيها يعنى والعربية ماشية عادى فأستنتجت أن السوستة أتكسرت وقولت أجيب سوستين وبس فمش عارف ليه أغير معاهم مساعدين.....فى المشى العربية بتعوم وفى المطبات ولو الشارع متكسر بحس بمصايب جوه العربية يعنى كل الصدمات بتدخل عندى جوه.........حتى لو مطب هوائى باحس بيه جدا.........وفى الاخر لحظى السىء أو لأهمالى مش عارف سمعت طقطة ناحية اليمين فى الملفات فغالبا الكوبلن كمان فى مشاكل ......والعربية بتحدف سنة يمين برضه.........ادى كل الأعراض.......
انا عاوز عنوان أحمد فرج بالتفصيل عنى وصف الطريق لو سمحتو
وجوزيف بستأذنك لو يوم فاضى أعدى عليك وتركب العربية وتدينى المشورة برضه......وشكرا للجميع

**aYaBooY** · 13-12-2012 01:28 PM

بص عاوز تكلمني في اي وقت مفيش مشكلة و لو كنت مشغول هابقي اقولك تتصل امتى عادي خالص
لو انت من المعادي عاوز اقولك على سر الفيستا عفشة بسيطة جدا يعني لو تعرف اي عفشجى كويس ممكن تروحلة يكشف عليها عادي جدا
بس علشان توفر المشاوير في الفك خليك عند حد بتاع فورد علشان لو وقفت على حاجة بسيطة ممكن تلاقيها عنده او يعرف يجيبهالك بسرعة
انت محتاج تجيب سوستة استيراد او جديدة و محتاج تجيب مساعدين جداد ( مسمعش موضوع الاستيراد ) علشان اكيد المساعد الي يوصل السوستة انها تتكسر و يخلي العربية تعوم يبقي خلاص فنش
نقطة تانية في العومان ده انت كدة محتاج تغير طقم جلب مقصات
و بما انك بتحس بمصايب في الحتت المكسرة يبقي محتاج بيض مقص كمان ( اوعى تجيب تركي يفضل الجلب الاصلى و البيض يكون نوع اوروبي محترم )
و علشان موضوع العومان و التكسير معا يبقي ممكن تلاقي مشكلة بيض الاسكاترا و التيش فممكن تكون جايبهم احطياتي و اتفق مع البياع انك ممكن ترجعهم لو مركبوش
و بما انك هاتفتح يبقي تغير جلب الميزان علشان اكيد اتهروا من وصفك للعفشة
لو هاتفتح الموضوع ده يبقي تخلي في حساباتك انك ممكن تلاقي البلى بتاع العجل فيه حاجة او صلايب الكوبلن
و لو عندك مشكلة في الكبالن يبقي تغير الاتنين مع بعض