الموضوع: سؤال لجميع ملاك الاوكتافيا a4

المشاركة الأصلية كتبت بواسطة crazydeepman

تسلملي يا زعيم الامه هوا ده انا عايز حد مجرب قبليها عشان يعرف يفرق وياسلام لو نوبيرا ده انت عز الطلب بس بردوا عايزك تقولي السحب و الجري انت بتقول بتجيب 200 كم طب هوا كانت بتموت منك؟ وطب الاستهلاك للبنزين عامل ايه كل ده بالمقارنه بالنوبيرا ايه ظروفه؟ معلش يا جدعان اعذروني اصلي قريت ان خرجها 100 حصان وانا شايف بنظرتي المتواضعه انها عربيه تقيله و الموتور ده مش حيسعفها وانا معايا نوبيرا اروبي ماتورها الله واكبر عليه 107 حصان وطبعا مش في تقل الاوكتافيا فحاسس انها طياره بس انا عايز اقولك حاجه والله بامانه انا النوبيرا بجمع بيها سرعات وانا مطمن لثباتها والله عربيه محترمه في نظرتي المتواضعه بس معرفش المصري كده برضوا ولا ايه

بص يا باشا هى العربيه ممكن تكون بطيئة فى الطلعه بتاعتها شويه مش بطه يعنى بس هى تقيله لانها فعلا وزنها تقيل العربيه فاضيه بس كده وزنها حوالى طن و 200 كيلو تخيل بقى لو فيه اربع او خمس اشخاص راكبين فيها شوف انت الموتور بتاع العربيه بيولد عزم قد ايه علشان يجر التقل ده كله فالعربيه هاتلاقيها مثلا بطيئه فى اول غيارين بس لما تجيب التالت هاتلاقى العربيه بتجرى بعد كده لوحدها انا بتكلم طبعا على الاوتوماتيك انما المنيوال بقى انت حر دوس بنزين و اقلب الغيار بس انت كده بتحرق بنزين بزياده
بالنسبه لاستهلاك البنزين انا عن نفسى شايف انها موفره
بالنسبه لاستهلاك الكيلو متر بتاع العربيه ماتخافش من ان العربيه تبقى عامله 150 ولا 200 الف كيلو الكلام ده تقولو على عربيه كورى ولا ماليزى انما العربيه دى لما تبقى عامله 150 الف اعرف ان الموتور ده لسه بيلين ( لسه بخيره قصدى ) العربيه موتورها هايعمل معاك 500 الف و هاتلاقيها لسه كفائة عاليه و عن تجربه انا عربيتى عامله 157 الف و لما اقول لحد كده بيتخض فى الاول و بعد ما يركبها مايصدقش ... الكيلو متر ده قليل على سكودا عموما اركب و انت مطمأن بس انا هانصحك بحاجه ان فيه ناس ممكن تلاقيها مهمله فى العربيات عموما فانت تتفق مع صاحبها انك هاتاخد العربيه الوكيل و تكشف عليها لو فيها حاجه ماتشتريهاش و لو مافيهاش يبقى اتكل على الله و حط فيها فلوسك و ماتخافس هاتسوق بكل مليم انت دفعته و هاتعرف ان النوبيرا اللى انت زعلان عليها دى توك توك جنب سكودا و هاتشوف الثبات و الامان الصح فى سكودا
انا بقلك كده لانى سوقت الاتنين و عارفهم
بص علشان ترتاح برضو لو فيه حد من اصحابك عنده سكودا اركبها و جربها معاه و اطلع بيها على طريق تعرف تجرى عليه و اتفرج على العربيه اولا مش هاتسمعلها صوت ثانيا العربيه بعد الغيار الثانى بتجرى الثبات بتاع العربيه جامد جدا جنب النوبيرا و هاتلاقى فى الشاشه معدل لاستهلاك البنزين وشوف استهلاك البنزيزن و انت سايق عند سرعم 100 كم / ساعه هاتلاقيه عامل 6.6 لتر لكل 100 كم و هاتلاقى شاشه تانيه فيها متوسط الاستهلاك لكل 100 كم و شوفه كام هاتلاقيه برضو قليل جدا

باختصار ياباشا العربيه دى من انضف العربيات اللى نزلت مصر لدرجه ان اللى نزلها لو كان عارف انها نضيفه ماكانش نزلها كان قالك خساره العربيه دى تمشى فى الطرق المنتنه دى
على العموم ان شاء الله هاتلاقى فلوسك فى العربيه دى