استشارة في حادث على الدائري
السلام عليكم
انا عندي استشارة تأمينية وارجو ألاقي حد يرد عليا
الموضوع باختصار انا عملت حادثة من اسبوع تقريبا على الدائري
كنت ماشي في الحارة اللي في النص
وبعدين اتنقلت للحارة اليمين
وفجأة لقيت عربية نقل كبيرة (مقطورة) واقفة في الطريق (في الحارة اللي انا ماشي فيها)
وطبعا واقف ولا حاطت مثلث عاكس ولا حتى طوبة ولا كوتش قبل العرية علشان الناس تاخد بالها
وانا كنت ماشي على 120 تقريبا
طبعا الفرملة ما عملتش حاجة وحاولت اتجاوز وارجع للحارة اللي في النص
لكن للأسف مالحقتش وكان في عربيات كتير جنبي وخبط في المقطورة
وطبعا ربع العربية اليمين كله اتفرم والعربية لفت بيا وخبطت تاني بضهرها في المقطورة مرة تانية
المهم انو الحمد الله ماحدش حصلو حاجة وماحدش اتصاب
انا الحمد الله مأمن على العربية
وعملت محضر في الشرطة
لكن وانا بعمل المحضر اظابط قالي انو سواق النقل طبعا غلطان ولو عاوز اعملك محضر وترفع عليه قضية وتطلب تعويض ما فيش مشكلة
ولو عاوزني ممكن احبسهولك كمان
بس خلي بالك انو ممكن شركة التأمين تطول في اجراءات التعويض وتقلوك استنى لما نستعلم عن المقطورة والسواق وممكن شركة التأمين هيا اللي تطالب سواق النقل بتعويض والموضوع هيطول
وقالي انت عارف اد ايه شركات التأمين بتتلكك على أي حاجة وبتماطل في الاجراءات
وممكن كمان تطلعك انت اللي غلطان وتقولك مالكش تعويض ولا حاجة
انا قلتلو مش عاوز حاجة من السواق وانا الحمد الله مأمن على العربية ومش عاوز أذية لحد
فقالي انو كده لازم نغير الكلام في المحضر عن اللي حصل ونكتب حاجة تانية خالصة علشان اعملهالك ضد مجول
فقلتلو ماشي
فكتب المحضر انو انا كنت ماشي على الدائري (بسرعة 80 تقريبا ) وفجأة انحرفت عليا مقطورة من جهة اليمين وفرملت المقطورة بشدة مما ادى لاصطدامي الجزء الامامي الايمن من السيارة بالجزء الخلفي بالمقطورة ثم انحرفت بي السيارة ولفت واصطدمت مرة اخرى بالمقطورة
وفرت المقطورة هاربة ولم اتعرف على ارقامها
كل الكلام اللي في المحضر كان الظابط هوا اللي كتبه بدون كلمة واحدة مني كخدمة ليا يعني وانو هوا عمل كذا محضر بالطريقة دي علشان شركات التأمين وتلاعبها بالناس.
طبعا علمت بلاغ حادث في شركة التأمين وارفقت المحضر وكتبت وصف الحادث زي ما هوا في المحضر (وعملت مقايسة في التوكيل وقال انو العربية هلاك كلي علشان تكلفة الاصلاح هتعدي 90 أالف ... والعربية كلها اصلا بـ 100 الف وفعلا مندوب التأمين راح ورفض الاصلاح بس لسه معرفش كتب ايه في التقرير بس غالبا هتكون هلاك كلي)
انا سؤالي هو: هل دلوقتي مبلغ التعويض اللي هاخده من الشركة مش من حقي؟ (اكل اموال الناس بالباطل)
انا بسأل كده علشان سببين:
الاول:في بند من بنود وثيقة التأمين بيقول
لا يغطي هذا التأمين ما يلي:
مخالفة المشترك او السائق المرخص له التعليمات والارشادت الصادرة من ادارة المرور في الحالات التالية: السرعة الزائدة عن السرعة المقررة داخل المدن وخارجها - السير عكس الاتجاه - الوقوف في الممنوع.
وطبعا انا كنت ماشي على 120 كم لكن في المحضر اتكتب 80 كم
الثاني : في بند من بنود وثيقة التأمين بيقول
من التزامات المشترك عند وقوع حادث عدم تقديم اي اقرار بالمسؤولية او عرض او وعد او تنازل
او تصالح مع اي شخص كان او دفع اي مبلغ بدون موافقة كتابية من الشركة.
دلوقتي بقى انا مش عارف هوا انا اللي غلطان ولا سواق النقل ولا احنا الاتنين (علما اني ماكنتش بجري علشان اسابق حد ولا علشان العب بالعربية ... انا كان عندي معاد مع ناس لازم اقابلهم وكنت متأخر في الوقت)
وهل كان غلط اني اتنازل عن تحميل سواق المقطورة خطأ الوقوف في الطريق وكنت المفروض اكتب اسمه في المحضر علشان شركة التأمين تقاضيه لانو ده حقها طالما هيا هتعوضني انا؟
وهل كده من حقي التعويض ولا لأ ؟
وهل دي شروط فعلا تطبق ولا دي مجرد دباجات بتتكتب وخلاص ولا حجات بتتلكك بيها شركات التأمين علان ما تعوضش الناس؟
انا سؤالي من ناحة دينية مش من ناحية قانونية
ارجو حد يرد عليا لانو الموضوع ده مسبب لي قلق شديد وبصراحة مش عارف اعمل ايه
هل آخد فلوس التأمين؟
ولا دي هتكون فلوس حرام وما اخدش حاجة من التأمين وابيع العربية كحطام واستعوض ربنا فيها ؟
ولا اعمل ايه ؟
شكرا