الموضوع: غلطة ميكانيكي في ربط طبة الزيت كلفني ...

زيت شل الترا 10 الاف كيلوا ماكملش الفين كيلوا اترمى على الارض
القصة بدأت لما عامل البنزينة قالي وهو بيغير الزيت ان الطبة عايزة تتغير ابقى غيرها لما تغير زيت المرة الجاية
وبالفعل وانا بغير زيت بعدها قولت للميكانكي على الطبة وكان الخراط قافل في يومها ، فجاب زي مفك الاووظ كدا وقعد يلف في مكان فتحة الطبة وركب الطبة الجديدة وقالي خلاص انساها
مشيت من عنده وتاني يوم تقريبا الاقي زيت تحت العربية ، اروح اي مشوار واسيب العربية شوية واحركها الاقي زيت
روحت لميكانيكي جنبي قالي الطبة مكانتش مربوطة كويس وقرطتلك عليها
كام يوم تاني والاقي فيه بقع زيت بس نسبة ضئيلة جدا تكاد تكون ملحوظة
روحت للميكانيكي تاني قالي لما تيجي تغير زيت ابقى اركبلك وردة وصامولة ، وغيره يقولي لف خيط !
ومن ساعتها وانا بقيت اقيس الزيت كل يومين خصوصا بعد اما شوفت مشاركة لاخونا كريم بيقول ان عامود الكامة اتكسر عنده في الكورسا بسبب نقصان الزيت
ومن حوالي اسبوع وانا تحت العربية بركب لمبة فوج لاقيت في نشع زيت على الماكنة من تحت ، فاستغربت انه يكون من الطبة لأنها تحتها بشوية ، فقولت مابدهاش بقى اروح لميكانيكي يشوفلي النشع ده جاي منين
فروحت لـ أحمد بوله قالي لازم نفك الكارتيرا وتروح لخراط يعملها طبة جديدة ، والزيت اللي نشع دا بسبب ساعة الزيت عايزة تتغير
واطمنت للحل دا اكتر وخلصت الحمد لله وبصيت على القياس كذا مرة وتحت العربية مالاقتش فيه نقص او تسريب

ميكانيكي الوظ فتحة الطبة زيادة عن اللزوم كلفني 225 جنيه وزيت الترا بـ 215 تقريبا اتكب على الارض !

من الدروس المستفادة في الموضوع ده
- بعد تغير الزيت تابع قياس الزيت وشوف فيه زيت تحت العربية ولا لأ ولو كل حاجة تمام يبقى تابع كل اسبوع الزيت والمية
- كل فترة صغيرة بص على جسم العربية من تحت وشوف فيه مشاكل ولا لأ
في الأول ماكنتش بفهم حاجة خالص لما بابص بس لما كنت بتابع مع الصنايعية كنت بتعلم منهم وكمان كنت ساعات انزل معاه تحت العربية واشوفه بيعمل ايه
- عاجبني اوي صاحب ورشة يلف بنفسه على كل عربية ويشوف ايه المشكلة وساعات كتير بيتشغل بايده خصوصا في أول ما العربية تدخل الورشة ، وكمان كل عربية يطلع يجربها بنفسه بس تقريبا كدا مصنعيته غالية وده اللي ضايقني

- 125 جنيه زيت شل الأصفر
- 10 جنيه سيليكون حراري
- 65 جنيه مصنعية بعد فصال
- 25 جنيه طبة وخراطة من عند مختار الخراط