تحياتى الى جميع أعضاء منتدانا الكريم و خصوصا الى وحوش الهوندا

حصلت لى مشكلة غريبة فى عربيتى (هوندا سيفيك 2005) كاسيت العربية أصلى فابريكة المشكلة هى انى الصبح اول ما فتحت باب العربية شميت ريحة شياط او ماس كهربى خفيف الريحة
من ناحية الطابلوه حاولت اكتشف مصدرها مقدرتش الريحةمركزة من ناحية التابلوة برضة لاحظت انى لما باخد مطب على الدائرى الراديو و الساعة يفصلوا (الشاشة تطفى) و يرجع يشتغل تانى ..
قررت اخد العربية للتوكيل علشان مش اى كهربائى يقدر يراجع على ضفيرة الهوندا غير حد متخصص و برضه علشان انا معرفش مكان حسنى الكهربائى اللى قد قدمة لينا العضو العزيز أحمد ايهاب ياريت لو مافيهاش انتهاك لقوانين المنتدى يقول لنا مكانة فين ومتشكر طبعا ليه

المهم يوم السبت اللى فات أخدت العربية و رحت التوكيل الصبح بدرى وبعد كدة تابعت العربيه من الشباك الزجاجى و العربية دخلت عند الكهربائى وبعد 5 دقائق لقيتهم خرجو العربية برة تانى ودخلوا عربية تانى مكانها من غير ما حد يكشف عليها نزلت اسئل الكهربائى قال لى عربيتك
هتاخد وقت طويل انما دى هتخلص علطول خرجت و سئلت المهندس قال لى احنا بنشتغل بالدور
قولت ماشى فوت مش عايز حد يزعل استنى حتى علشان يكشف براحتة
بعد كدة العربية دخلت و بدا الكهربائى يكشف و شغل الراديو و الكاسيت و السى دى ونده المهندس و بعد كدة لقيت المهندس بيشاور لى انزل الو شة نزلت و ركبت جنبب الكهربائى و قالى هو الكاسيت بيفصل فى المطبات قولت له ايوه هنا باه وبدا يخبط بقبضة ايدة فوق التابلوة بقوة كبيرة
وقالى الخبط دة باة اقوى ولا المطب اقوى اهو الكاسيت شغال و مبيفصلش اه انا طبعا قلت ازاى تخبط كدة على التابلوه كدة دا انا قدامك و بتخبط كدة امال لو لوحدك هتعمل اية دا انت فنى كهرباء مش سمكرى ازاى تخبط على التابلوة كدة انا مش عايز اصلى خلاص خرجت و طلبت انى اخد العربية و امشى و المهندس بيقولى متخافش دة حتى لو خبط عليها بشاكوش مش هيحصل حاجة
ألمهم انا قلت انا هامشى ارجوك طلع لى العربية راح المهندس دخل للكهربائى و كلمه و طلع قالى
ان تقريبا فى مشكلة فى زرار البو بتاع الكاسيت وان التوكيل مش بيصلح الكاسيت و لكن ممكن يستورد لى كاسيت لو انا عايز اشترى كاسيت جديد حاجة تحرق الدم فعلا علشان زرار البور عطلان اغير الكاسيت دة كاسيت الفبريكة قال لى حاول تصلحه برة قلت لة ياريت تخرج العربية علشان امشى و طبعا دفعت تمن الكشف وبعد ساعة ونص خرجت العربية ومشيت و انا مصمم انى اشتكى علشان التوكيل مش بس علشان تغيير الزيت ده علشان يحل المشكلات انا هاشتكى التوكيل فى الفطيم و فى شركة هوندا فى اليابان وانا أسف جدا علشان طولت على حضراتكم وشكرا لوقتكم الثمين