المشاركة الأصلية كتبت بواسطة wael-mohamed
شوف يا باشا انا معايا فلوانس 2012 بقالها تقريبا دلوقتي 10 شهور والي لاحظته كالتالي :
1- العيوب من وجهة نظري انا اوقد تكون عندي بس مش عارف :
* موضوع عوامةالبنزين ده ظهر عندي هيه مش بتعطل ولكن بتقرا غلط وغيروها في التوكيل فورا من غير كلام
* الطارة فعلا بتقشر وبيغيروها في التوكيل انا لسه مغيرتش بتعاتي بس انا شوفت واحدة متغيرة ومتهيالي غيرو المتيريال وبرضه من غير كلام ( توكيل محترم )
* السحب في البداية مش جامد قوي بس علشان هيه عربية عائلية مش بتاعت خمسات وخلافه بس على السرعات العالية فوق الممتازة وبعد متعدي ال5000 كيلو العربية بتفرق جامد حتى في الطلعة
* فلتر التكييف بيتلف بسرعة وبيقولوا في التوكيل لازم تغيره بس هوه حسب الاستعمال وعلى العموم بتوع الميكانيكيون العرب وهمه مركز خدمة معتمد نضفوهولي وبقى 100/100
* ساعات بسمع صوت تزييق في العفشة بس الصوت بيروح بعد تربيط العفشة في الصيانات وسيادتك عارف الطرق المصرية طبعا
2- المميزات :
فلا حدث ولا حرج
* العربية شيك جدا من برة ومن جوة وفخمة جدا ( انا بتكلم على الفئة الثالثة علشان بتختلف من جوة )
* العفشة طرية جدا ومريحة وثباتها فوق الممتاز
* التكييف كويس جدا مع ان في ناس بتقول انه مش زي الكوري والياباني بس انا شايفه ممتاز
* الكماليات الداخلية والخارجية كثيرة وجميلة جدا
* العربية تقيلة على الطريق وسحبها حلو جدا على السرعات العالية
* الصاج بتاع العربية تقيل ومحمل ومصفحة من تحت بالكامل ودي ميزة مش في الكوري والياباني
* بالنسبة للاعتمادية فانا اثق في العربيات الاوروبي جدا وكان معايا رينو كليو 2002 قعدت معايا 10 سنين عمراها موقفتني في الشارع او عرضتني لموقف سخيف وعلى راي الاخ العزيز الي قال ان المحافظة على اي سيارة يرفع من الاعتمادية الخاصة بها
*الضمان 3 سنوات او 100 الف كيلو وده يطمن
* التوكيل ناس محترمة جدا ويعترفوا بالخطاء وبيعدلوا من غير فصال
* اخيرا العربية واسعة من الداخل والكراسي مريحة جدا والشنطة واسعة كمان
ارجوا ان اكون غطيت معظم استفسارات سيادتك وده من واقع استعمالي للعربية حتى الان .
ونسيت عيب جامد جدا ( ان العربية بتتحسد بسرعة جدا ) فربنا يديك خيرها ويكفيك شرها