احدى نقاط الضعف الامنى فى النترا 2012 (قصة ونصيحة)
اولا اتمنى تتقبلونى زائر خفيف عليكو من قسم البريللليانس
من غير ما اطول عليكو
القصة ابتدت امبارح لما اعز اصدقائى بلغنى بسرقة عربيتو الهيونداى النترا 2012 المفتاح العادى
طبعا نفسيتو زى الزفت والنهارده رحتلو علشان قالى ان فى ناس معارفو كلمولو رتبة فى مدرية امن الجيزة و هيروح علشان يتكلم معاه
و احنا رايحين جه لاخوه تليفون من اللى سرق العربية لأن كان فيها السى فى بتاع اخوه و ابتدت المساومة
ومن هنا لهنا وصلنا ل 20 الف جنيه والمفروض هنرد عليهم بعدها ب 5 ساعات
مفيش نص ساعة وجار صاحبى اتصل بيه وقالو ان فى 2 امناء شرطة جولو البيت من قسم الشيخ زايد و ان العربية لقوها وقالو انو ادى الامين رقم تليفونو
طبعا صاحبى اتجنن و بقى يتشقلب جمبى و مفيش دقيقة و اتصل بيه الامين و قالو ان عربيتو فى قسم العمرانيه و ادالو رقم تليفون امين شرطة هناك
كلمو قالو ايوة يا باشا عربيتك موجوده تعالى استلمها وبعد كده هتروح قسم الشيخ زايد تعمل محضر علشان ملف العربية ينزل تانى فى المرور وهتكلم سيادة العقيد ...... وادالو رقموا
طبعا اتصلنا بمعارفنا من الشرطة وكلهم استعجبو ان احنا هنستلم العربية من غير نيابة او فحص للعربية
وقلنا نروح ونشوف
رحنا القسم و سألنا فى النوبتجية قالولنا اطلعو فوق طلعنا لقينا امين شرطة طبعا من خطفتنا نسنا اسم الامين ادنالو الرقم طلع يعرفو وقال اه ده الامين فولانى و ادنالو رقم العقيد وطلع عارفو بردو
المهم اتصل الامين ده بالامين اللى كلمنا فى الاول خالص وجه بموتسيكل على القسم وخدنا وروحنا للعربية
كانت مركونة فى شارع خاتم المرسلين
التراب عليها كتير مع انها بقالها يومين بس والزجاج مكسور بتاع السائق ومتسابة كده
ولقينا 2 امناء تانين واقفين جمبها
قالو انهم فصلو البطارية
المهم وصلنا البطارية وصاحبى جه يدور مدارتش مع انها النور التابلوه نور
راح يشوف كهربائى لانهم قالو جايز الحرامى شال فيوزات منها وقالولو ان فى كهربائى هنا و شاورولو على مكانو
المهم صاحبى راح و اخوه جرب يدور فدارت معاه
اتصلنا بيه فجه تانى
وطبعا الامناء بعد ما اخدو الف جنيه (حلاوة) مشينا...
و احنا بنصلح الازاز بصيت على الكونتاكت و هنا اتصدمت
الرقبة اللى حوالين الطارة متثبتة بمصمارين صليبة و القواعد بتاعتهم ضعيفة جدااااااااااااااااا لانهم مكسورين وطالعين بالمسامير
يعنى لو مفك عادة اضرب فى الفرق اللى بين الجزء اللى فوق و اللى تحت من فوق كل مسمار هتتكسر بسهولة لان البلاستيك ردىء جداااااااااااااااااا زى لعب الاطفال
وطبعن لما يتفكو او يتكسرو سهل اوى العربية تدور بالسلكتين....
الغريب فى الموضوع انهم حتى مطلبوش يشوفو رخصة العربية ولا اتأكدو ان احنا اصحابها
الحرامى اللى دور بسلكتين ليه وصلهم تانى بالكونتاكت
الزجاج المكسور لسه على الكرسى
مش مغطى العربية وسايبها واقفة عكس فى شارع عمومى
لدرجة ان الكهربائى كان عارفها وقال لصاحبى الهيونداى المسروقة اللى هناك ده انا اللى سارقها وضحك ومرضاش يجى
العربية تقريبا متحركتش من مكانها من ساعت ما اتخدت...
دلوقتى انا و صاحبى لقينا الغاز كتير مقدرناش نحلها كلها بس انا كان ليا رأى مش هقولو وحابب اسمع تفسيركو
وفى النهاية نصيحتى لكل ملاك هذه السيارة اللى بجد زعلت انها تكون فيها نقطة ضعف بالشكل ده:-
1-سوجر الدركسيون وهو فى الوضع المعتدل علشان تدارى الفرق اللى عند المسمارين لان النقطتين دول هما اللى هتتكسر منهم بسهولة
2-استخدم قفل الحماية على الدركسيون
3-اعمل مفتاح فصل كهرباء وخبيه وتعرفش حد بوجودو و اعملها عند كهربائى موثوق فيه او كهربائى من بعيد عنك قوى
4-لو فى امكانية ركب جهاز التتبع
5- وده اهم حاجة اطلبو من الوكيل يغيرها بواحده محترمة ويصنعوها مخصوص او جمعوا بعض و اعملوها عند واحد بتاع فيبر يصبهالكو تكون متينة وتتكسرش و غيرو المسامير بمسامير اللى هى بتكون من جوة على شكل مثلث وا خماسى تقريبا اسمها الانكيه لان الحراميه لما هيلاقى حاجة مختلفة هيسبها مش هيعافر فيها
وفى النهاية الحامى هو الله
اتمنى اكون افدتكو وكنش طولت عليكو