معلش يا شريف باشا لسوء الظن في حقيقة موضوع اسبيرانزا محروقة
كنت امبارح في الزفت التوكيل بتاع جسر السويس وشوفت أسود يوم مر عليا في حياتي امبارح ومش هاقول دلوقتي ليه لأني معنديش رغبة في الكتابة حالياً
المهم لأني عارف إن الناس مستنية تعرف موضوع العربية المحروقة دا صح ولا فبركة من شريف المصري ..
أولاً باعتذر لشريف عن سوء الظن في إن الموضوع متفبرك
ثانياً بعد محاولات مضنية من اللف والدوران هناك عرفت إن العربية كانت موجودة فعلاً في الدور التاني
بس طبعاً هما مانعين الدخول للورشة واتخانقت امبارح أكثر من مرة مع موظف الأمن بسب منع الدخول دا
المهم عرفت إن العربية اتحرقت بسبب إن شخص ما من معارف صاحب العربية حط مفتاح فوق علبة الفيوزات (لمن لا يعلم علبة فيوزات الاسبيرانزا موجودة فوق البطارية وتحت الكبوت مباشرة)
المهم صاحبنا حط المفتاح وقفل الكبوت اللي بدوره ضغط على المفتاح وأدي لتوصيل تيار كهربائي من خلال المفتاح مُحدثاً شرر مما أدى لحدوث الحريق (الله وحده يعلم مدى صحة هذه الرواية)
طيب إيه الحل اللي اتعمل:
قال اتصلحت في المصنع ورجعت زي الأول وكان نص التكلفة على صاحبها لثبوت الإهمال والنص على المصنع
وقاللي إنه استلمها يوم السبت
دي كانت رواية أحد الأشخاص واللي قالهالي بعد ما أخد 10 جنيه وسيجارة مارلبورو
ياريت بقى لو صاحب العربية بنفسه يظهر ويبان ويقولنا إيه الموضوع بالظبط