محدش يقلق من المساحة الداخلية للياريس الجديدة !

**Ahmod** · 18-12-2012 06:27 PM

السلام عليكم ورحمة الله وبركاته

طبعا اغلبنا تابع نزول الياريس الجديدة الهاتش باك للمعارض

العربية من وجهة نظري ممتازة ونازلة باوبشنز وكماليات مناسبة جدا

وسعرها يعتبر معقول بالنسبة لاول فئة مانويل ب 109 الاف واول فئة اتوماتيك 117 الاف

سعرهم مقارنة بالاوبشنز والكماليات اللى فيهم يعتبر منافس جدا

بإستنثاء الفئة الاخيرة اللى ب 142 الاف هي دي اللى وسعت حبتين تالتة

العربية كان عيبها ومشكلتها انها ضيقة جدا ولا تصلح للاستخدام العائلي

وفعلا لما ركبتها اضيق بشكل ملحوظ من الياريس القديمة !!

لكن محدش يقلق من الموضوع ده نهائيا لان دي طبيعة الياريس الهاتشباك

قعدت اسرش شوية في النت على الياريس الهاتشباك القديمة وكذلك اتذكر اني شفتها قبل كدة في معرض على كورنيش المعادي

وفعلا اكتشفت ان طبيعة الياريس الهاتشباك انها تكون ضيقة !!

مش بس كدة !! ده الياريس الهاتشباك الجديدة اوسع من الهاتشباك القديمة !!!!!!

وده معناه ان السيدان الجديدة هتكون اوسع من السيدان القديمة

يعني اللى مضايقه موضوع المساحة الداخلية يستنى نزول فئة السيدان

لكن للاسف سالت عليها في التوكيل ماحدش عنده علم لسه هتنزل امتى !!!!

**S O P H O S** · 19-12-2012 12:49 AM

بعيدا عن اخر فئة خلينا فأول ثلاثة فئات
ايه بقي يفرقها عن الريو ؟؟؟؟؟؟؟

**د.اشرف هنداوى** · 19-12-2012 01:07 AM

يعني هي ضيقة فعلا - طيب ازاي ما حدش يقلق ؟

من عنوان الموضوع كنت فاكر ان حضرتك جربتها و لقيتها معقولة مش ضيقة

تحياتي

**Ahmod** · 19-12-2012 01:32 AM

المشاركة الأصلية كتبت بواسطة MohammedAladel

يعنى حضرتك شايف إن عربية أوتو 1300 بالحجم دا بسعرها دا منافس جدا ؟؟

لو هنسعر العربيات بناء على قوة الماتور

فانا لازم اوضح لحضرتك انها اوتو 1.33 vvti بقوة 100 حصان يعني كتسارع وقوة ماتور افضل من الكيا الريو اللى 1.4

بالنسبة للسعر فعند حضرتك البيكانتو اللى مافيهاش الكماليات اللى موجودة في اول فئة مانويل في الياريس وصلت ل 90 الاف !! ؟ منتظر التويوتا تبقى بكام ؟

العربية سعرها كاوبشنز وكماليات ومقارنة بسعر السوق معقول خصوصا اول فئتين

يعني انا شايف لو هتقارنها بالريو هتلاقيها افضل في نقاط كتير

اما اعلى فئة فيها اللى ب 141 فانا معاك ان دي ماينفعش حد يفكر فيها لانها دخلت بالسعر ده في فئة تانية خالص

المشاركة الأصلية كتبت بواسطة S O P H O S

بعيدا عن اخر فئة خلينا فأول ثلاثة فئات
ايه بقي يفرقها عن الريو ؟؟؟؟؟؟؟

+11111111

المشاركة الأصلية كتبت بواسطة د.اشرف هنداوى

يعني هي ضيقة فعلا - طيب ازاي ما حدش يقلق ؟

من عنوان الموضوع كنت فاكر ان حضرتك جربتها و لقيتها معقولة مش ضيقة

تحياتي

هي ضيقة فعلا !! لكن انا قصدي ان محدش يقلق لسبب

ان الناس كانت فاكرة ان الياريس الجديدة نازلة ضيقة !! فانا حبيت اوضح ان ااساسا الياريس الهاتشباك من طبيعيتها حجمها صغير سواء الجديدة او القديمة

بالتالي السيدان هتبقى نازلة بحجم معقول ويمكن هتكون اوسع كمان من السيدان الحالية

عشان اللى كان ناوي يشتري ورجع في كلامه عشان المساحة الداخلية ممكن يستنى شوية لحد ماتنزل النسخة السيدان