الموضوع: فيديو عن حادث نيسان صني 2011- يرجي عمل تقييم

انت لما صورت الموتور مظهرش اوي من جوه؟
ياتري سليم ولا لا وياتري الفتيس حصله حاجه ولا لا؟

أول حاجة ألف حمدلله على سلامتك من الحادث الأليم ده وواضح ان اللي جوة العربية ربنا نجاه من كارثة


تاني حاجة علشان مش كل الناس هاتاخد بالها ان حضرتك حاطط الفيديو تحت في تعليقات الفيسبوك


ده لينك الفيديو:

Video-0027.mp4-سيد - YouTube


تالت حاجة ياريت حضرتك تشرح إيه اللي حصل بالظبط في العربية لأن حالتها مروعة وكل الأجزاء تقريباً تضررت:

1- مجموعة الرادياتير والتكييف بالكامل

2- مجموعة العفشة والمساعدين الأماميين

3- أخشى ما أخشاه ان الضرر يكون أصاب المحرك ساعتها العربية ممكن تعتبر Total Loss

4- الوسادة الهوائية الشمال ضربت

5- مجموعة العفشة والمساعدين الخلفيين

6- الكاوتش والجنوط الأربعة

7- ده غير بالطبع الأربع رفارف والإكصدامات واستعدال الصاج وتغيير الشنطة والكبوت

8- طقم الفوانيس الأمامية والخلفية بالكامل باستثناء فانوس ورا شمال !

9- الباقي أجزاء كهربية أو استهلاكية مش مكلفة بالطبع مقارنة بكل ما سبق


دي الأماكن الرئيسية اللي شفت مدى الضرر الجسيم اللي فيها , وتكلفتها هاتبقى غالية جداً بالمقارنة بسعر عربية جديدة , أعتقد الأعضاء ممكن يفيدوا حضرتك من واقع تكلفة الأماكن المتضررة

من ناحية مدى توافر الأجزاء المطلوبة حضرتك ممكن تلاقيها أو أغلبها في الحرفيين ويارب ماتكونش مضطر تغير في جوهر مكونات المحرك أو تجيب واحد جديد


تاني ألف حمدالله على سلامتك وياريت حضرتك توضحلنا إيه اللي حصل


وسؤال بسيط على الماشي : احنا في نهاية سنة 2012 والعربية لسة نمرها قديمة , هل ترخيصها ساري بالفعل وحقيقي؟

قدر الله وما شاء فعل الحمد لله أنك بخير وفداك أى حاجة واللى يجى فى الصاج فى داهية شوف حضرتك اولا حضرتك أبعد عن التوكيل فى موضوع الأصلاح حضرتك محتاج سمكرى أبن حلال يلم الموضوع ويقولك العربية محتاجة أيه وكل المشتريات حضرتك تجيبها بنفسك شوف فى التوفيقية أو الحرفيين وممكن أستيراد العربيات المتقطعة ممكن تسافر بورسعيد وتجيبلها حاجاتها كلها وتأخد معاك السمكرى وأنت بتشترى وإن شاء الله بسيطة وتتلم العربية فى أضيق الحدود وربنا يعوض عليك

الف حمد لله على سلامتك, وقدر الله وما شاء فعل, وياريت تقولنا ايه اللى حصل عشان يحصل فى العربيه كده

المشاركة الأصلية كتبت بواسطة the_air_devil

وسؤال بسيط على الماشي : احنا في نهاية سنة 2012 والعربية لسة نمرها قديمة , هل ترخيصها ساري بالفعل وحقيقي؟

النمر الجديده اتوقف استيرادها من ساعه الثوره, ومعادتش موجوده غير فى محافظات معينه اللى لسه فيها فائض, اما المحافظات اللى خلصت منها بتتوزع فيها النمر القديمه... انا عربيتى 2012 ملاكى السويس ونمرها قديمه