انا مطلع رخصتى فى اكتوبر 2005 و دافع 750 جنيه . بس كان طلبى اروح على التصوير من غير امتحانات و كلام من ده .

اللى حصل انى بعد ما دفعت الفلوس للراجل اللى عمل السبوبه الكبيره عليا . و انا عارف انها سبوبه كبيره . بس انا قلت دى مره فى العمر و عارف المشاكل اللى الناس بتقابلها فى الرخصه اول مره . . المهم بعد ما اتفقنا على اليوم اللى هاروح اتصور فيه . رحت . اقيتهم دخلونى على الامتحان بتاع السواقه . و قلت للراجل اللى معايا ما بعرفش اسوق و مش معايا عربيه اصلا . قاللى ما تقلقش . كله هيتظيط . المهم . لقيتهم بيدخلونى عربيه هيونداى صاحبها اصلا رفيع و مطلع الكرسى قدام و بقيت مش عارف ادخل فيها . اول ما دخلت فيها و لسه هاقفل الباب و انا قلقان مش عارف هاشغل العربيه ازاى . لانى مش متعلم سواقه اصلا لسه . لقيت المهندس بيقولى خلاص . و انا خارج من العربيه صاحبها بيقولى مبروك و بيضحك .


بصراحه على قد ما فرحت انى خدت الرخصه فى ساعتين زمن من غير دوشه . على قد ما زعلت حال البلد وصل لايه . و انا طبعا بالوم نفسى لانى باساهم فى اللى بيحصل . بس انا متاكد انى لو اتعلمت و رحت كنت هاسقط . الناس هناك كانت اللى داخلين رسمى من غير وسايط بتشد فى شعرها . و بنت هناك متوصى عليها خبطت كذا قمع و ما عرفتش ترجع لورا . و نجحت . . عادى جدا .

ليا صاحبى اتنصب عليه مرتين فى موضوع الرخصه و دفع 300 جنيه مرتين لشخصين مختلفين و ما حدش طلعله حاجه . . بصراحه الناس اللى هنا بتكلع رخصه غالبا محترفه جدا سواقه و لان اى حد بيلمس القمع بيسقط و بيتلككو على اى حاجه .

المهم انا طولت عليكو . بس فعلا ده يوم ما يتنسيش . كله اتكلف 800 جنيه بالورق .