الموضوع: مميزات وعيوب رينو ستيب واى

المشاركة الأصلية كتبت بواسطة amrelsha3er

السلام عليكم ورحمه الله اصدقائى الاعزاء المقتنين للاسد الفرنسى رينو عموما :)
مبدئيا الحمد لله رب العالمين على نعمته علينا جميعا باقتناء رينو وان شاء الله ربنا يدمها علينا نعمه ويكرمنا ويحفظنا من العين جميعا ويستر طريقنا ان شاء الله :) ندخل فى الموضوع بقى مطولش عليكم
الحمد لله عربتى ستيب واى2013 عملت بيها الف كيلو الى الان
مميزات العربيه
العربيه اكتر ميزه فيها انها عاليه عن الارض بفارق كويس جدا حملت فيها ربع طن من كم يوم ولا كانك حاطط فيها حاجه بصراحه انما اكيد فرق فى السحب طبعا ده اى عربيه كده من اهم المميزات برضو التوكيل القوى بصراحه كويس جدا ده من شهاده كزا حد انا لسه متعاملتش معاهم اوى لكن اتصلت بيهم اكتر من مره وبصراحه منتهى الاحترام والشفافيه والحمد لله قطع غيارها موجودها
ستيب واى ملفته للانظار طبعا يرجع لشكلها الثورى وكمالياتها وشغل النيكل اللى فيها والجنط بتاعها وبصراحه عربيه متكسفكش قدام اى حد حاجه يعنى (قيمه وسيمه)
ده بالنسبه للشكل الخارجى ااما بالنسبه للعربيه من الداخل فى ناس كتير تقول انها فقيره من الداخل انا مش شايف كده بصراحه تابلوها جميل وشيك ومتين مش زى الصينى ولا الكورى الصراحه من حيث الخامات ومايميزها اكتر الكاسيت بتاعها وشويه المميزات اللى فيه تقدر تعمل باير مع الموبايل وتشغل مزيكا الموبايل من خلال الكاسيت وطبعا استقبال مكالمات وارسالها عن طريق الكاسيت برضو بعد ماتعمل باير معاه طبعا دى حاجه تحسب للعربيه رغم الفئه السعريه دى كتر خيرهم انهم حاطين اوبشن كده بصراحه يميزها ايضا الفرش الداخلى شكله حلو جدا ومريح ويميزه انهم كاتبين ستيب واى على الكراسى كمان
الوسع الداخلى ممتاز كنبه واسعه مش ضيقه اللى ورا يعرف يقعد مرتاح والشنطه برضو جميله وواسعه وتقدر تشيل الرف بتاعها لو عاوزها تشيل معاك اكتر
الملتى فانكشن بتاعها جميل ومكانه شايفه حلو بصراحه بل احسن مايكون فى الطاره لان انت ايدك بتكون فى المكان دى على طول نفس الموضوع برضو للكلكس مش شايفهه عيب خالص انه فى دراع النور
نور العربيه واضح وضوح الشمس نورها قوى والعالى كمان بتاعها ماشاء الله بيجيب مسافه كبيره وبكل وضوح مع انى قريب هركب زينون ان شاء الله برضو
مجمل المميزات على الفئه السعريه دى طبعا حاجه تحفه جدا انك تركب عربيه بالسعر ده وفيها الاوبشن ده كله وبالشكل الجميل والعلو ده بصراحه الحمد لله على الاختيار مش ندمان الحمد لله
عيوب السياره
عشان اكون محايد ورغم المميزات الكتيره اكيد كل سياره فيها عيوب اللى خلا السيارات الالمانى فيها عيوب زى الباسات والجيتا
السياره بصراحه المفروض كان يكون العداد اكتر من 200 على الاقل 240 هو اى نعم الواحد عمره ماهيجيب ال200دول بس برضو ده بيفرق فى العربيه
العربيه مش عفيه كان المفروض يبقى الموتور اقوى من كده لانه 8صباب فقط المفروض يكون16صباب زى السانديرو الاوتو او اللوجان الاوتو بس نرجع ننقول لو عملو كده يبقى كله بقى زى بعضو لازم يميزو حاجه عن حاجه ده تلاحظه لو العربيه على منزل وانت طالع من السكون وجايب اولانى متحسش بقوه العربيه فى السحب اوى غير عربيات تانيه 1600 زيها بس ده موضوع بالنسبه لى يمكن التضغادى عنه
العربيه صوت موتور مش واطى ومش عالى اوى لنما لو ركزت معاه وطفيت الكاسيت هتحس بيه انه عالى وان شاء الله ناوى اسالهم فى الموضوع ده فى التوكيل عند الصيانه
دواسات عاليه نسبيا حاجه بسيطه مش مأررقه بس لو فى القاهره وزحمه صعبه ومع المانيوال رجبك هتتعب وتمل انما فى السواقه العاديه عادى زى اى مانيوال
بس بصراحه مش شايف اى عيوب تانى للعربيه وبمنتهى الامانه ده مالها وما عليها
وربنا يكرمك جميعا ونا عملت تقرير البسيط ده لان كزا حد بيسال عن العربيه والموضوعات عنها قليله لعل وعسى اكون سبب فى افاده اى حد ينوى الشراء ان شاء الله
وانا تحت امركم فى اى استفسار اى سؤال
تحياتى :)

مش عارف ليه يا عمرو كل ما ابعد بتفكيرى عن العربية دي واقرر انى اجيب البريليانس كروس (اللى عجبانى جدا برضوا) اقرا تعليقاتك عن العربية دي ترجعني افكر فيها تانى بكلامك عنها..والله انا قبل ما اقرا موضوعك ده كنت مقرر اول الشهر انى ادفع عربون الكروس وكلامك عن العربية خليت دماغي تلعب تانى...ولو حصل وكان ليا نصيب فى العربية دي هتبقى انت من الاسباب الرئيسية فى انى اقتنيها.جزاك الله كل خير على افادتك وطريقة عرضك القيمة.

[QUOTE=rasboten;3874707794]تقرير وافى ومحترم وانا كنت ناوى اعمل تقرير زيك لكن بعد ما قريت التقرير بتاعك لقيتك كاتب كل اللى كنت هقوله كانك قريت افكارى بالذات فى موضوع قوه الموتور والماتى فنكشن والفرش والارتفاع بس احب اضيف على كلامك عيب معرفش انت اخدت بالك منه ولا لا ان صوت البنزين وهو بيتحرك فى التانك وانت مفول واضح جدا فى الكابينه وانت بتركن او لسه طالع ودى حاجه مش ظريفه ومشت دماغى على ماعرفت الصوت جاى منين[/QUOTE

باشا انا شايف فى بياناتك انك كنت راكب نوبيرا قبل الستيب واي..فكنت عايز اعرف منك حسيت بفرق جامد بين العربيتين ولا مش اوي..وممكن توضحلى الفروق بالظبط...لان انا برضوا معايا نوبيرا وبفكر جديا فى الستيب واي.

[QUOTE=rasboten;3874708040]

المشاركة الأصلية كتبت بواسطة m_galal_elgalaly

بص يا باشا انا بعت النوبيرا اللى معايا لانها للاسف اتبصلى فيها. بمعنى ان انا كان معايا نوبيرا حاله نادره 2008 وكنت اما بركبها بحس انى ملك الطريق من الثبات والقوه والذى منه لكن ولاد الحلا بقى والحمد لله بصولى فيها وقعدو يساومونى بيع..... بيع.....بيع لحد ما فتحت بقها بدون اسباب والله يعنى الاقيها مسربه زيت على الارض واكشف الاقى مفيش تسريب وخد بقى حاجات من دى كتير لحد ما زهقت وبعتها واللى اشتراها كل يوم يكلمنى ويقولى الله يباركلك دى مفهاش غلطه.
المهم من ناحيه الموتور والقوه فى التسارع النوبيرا تكسب بفارق قوى . ومن حيث الثبات الاتنين ما شاء الله ثبات محترم ومن حيث الاوبشن النوبيرا ازاز امامى وخلفى كهربا ومرايات كهربا اما الستيب ازاز امامى كهربا بس ومرايات مانيوال لكن الستيب فيها ايموبلايزر وفرامل مانعه للانزلاق وجنوط سبور وكاسيت فيه بلوتوث وتحكم من الطاره .ومن حيث الوسع الاتنين زى بعض وان كانت كراسى النوبيرا الامامى اريح وكراسى الستيب الخلفى اريح كتير. صوت الموتور فى الاتنين عالى واستهلاك البنزين فى النوبيرا اعلى شويه لكن ده عشان قوه الموتور.الصاج فى النوبيرا يكسب . الخلاصه لو النوبيرا اللى معاك فايقه يبقى متفرطش فيها الا اما تتاكد انك اخدت خيرها لانها عربيه اصيله وتساوى كل قرش اتدفع فيها اما لو فتحت بقها يبقى الزيرو احسن وساعتها هات ستيب واى او لوجان اوتوماتيك لان الناس بتشكر فيها وانا تحت امرك فى اى استفسار اخر.

ربنا يكرمك..بس انا النوبيرا اللى معايا موديل 2001 يعنى بقالها 12 سنة + انها عاملة دلوقتى 380000 كيلو يعنى موتورها خلاص استوي..عشان كدة انا عايز اجيب عربية زيرو وتكون فى حدود 80 او 85 الف جنيه بالكتير وشايف ان السانديرو ستيب واي هي والبريليانس كروس افضلهم .