الموضوع: محتاج اشترى لوجان 2013اتوماتيك ومحتاج تنصحونى اعمل اية

أهلا بحضرتك يافندم.

بالنسبة للأفيو (طبعا بتكلم على الأفيو الحديثة المتقفلة محلي، راحت أيام الأفيو الكوري خلاص)، بناء على إللي بقرأه عنها ومقارنات قريتها على المنتدي ده وغيره ... فأنا شايف إنك مش محتاج تقارن بينهم، شيل الأفيو من دماغك خالص، والله أعلم. عربية كتير إشتكى من حجات كتير فيها ومنصور أسمع وأقرأ إنه توكيل متعب ومش تمام.

نيجي للوجان الأوتو، مشفتش ولا سمعت أي شكوى من موتورها تحديدا وموتورها شغال في اللوجان mcv أوتو من زمان والداستر كمان، ويقال إنه موتور ميجان ٢ بتعيدل طفيف.

نقط ضعف اللوجان الأوتو تتلخص في:
- مكان الكلاكس (هتتعود عليه)
- أماكن زراير الزجاج الكهرباء (الموضوع نسبي، فيه ناس متزاولة وناس عادي، وبرضه هتتعود عليها)
- منطقة وسط التابلوه إللي فيها مفاتيح التكيف ..إلخ بيوصلها حراره من الدفاية بتاعة صالون العربية وفيه ناس بتحس بالحرارة دي جنب الرجل اليمين عند واسة البنزين (لها كذا حل أبسطهم قول للتوكيل في أول زيارة وهيحطولك قطعة عزل حراري تمنع وصول الحرارة للقدم)
- الكاوتش إللي نازله بيه نوعية متواضعة ويفضل تغيره أول لما الظروف تسمح (مشكلتة تتلخص في إنه بيزحف شوية مع الفرامل المفاجئة القوية، صوته عالي، بيلم ظلط) لكن مش كارثة للدرجة.
- الفتيس ناس قالت فيه نتشة بين الغيارات، لأ هو بس النقلات محسوسة لو إنت قارص بنزين سنه زيادة، أعتقد أي فتيس أوتو أربع نقلات قديم شوية في التكنولوجي هيبقى كده (بإختصار مفيش مشكلة أصلا).

العربية صفقة رابحة بكل المقاييس في فئتها، توافر قطع الغيار في تزايد مستمر خارج التوكيل وأسعارها في تحسن وداخل التوكيل تقريبا كله موجود. التوكيل من أفضل التوكيلات في مصر من حيث الخدمة بس ده بيتفاوت حسب الفرع. سعر إعادة البيع أصبح ممتاز بالمقارنة مع أي حاجة فرنساوي أو أوروبي عامة. من وجهة نظري الشخصية، تساوي كل جنيه مدفوع فيها.

بالنسبة للحجز، قولنا إنت منين عشان الناس تعرف تفيدك، بس إعمل حسابك ممكن تنتظر شوية على الإستلام حسب المكان إللي هتشتري منه ولو حظك حلو ممكن تستلم فوري.

مبروك بإذن الله.

المشاركة الأصلية كتبت بواسطة mohamed salem1

متشكر اوى يا استاذ احمد اشرف

على العموم انا من المنوفية فلو فية صالة عرض قريبة منى فى طنطا مثلا

والاحسن يكون فى القاهرة لانى ببقى موجود فى القاهرة كتير جدا

واية هو احسن معرض للوكيل

ولو فية حد يقدر يفيدنى فى الاجراءات مع بنك ناصر الاجتماعى اكون شاكر جدا لية

منين من المنوفيه يا أستاذ محمد ؟؟

و دى قايمة بفروع المعارض

EIM Network & Dealers

من الباجور نفسها ؟؟؟ أنا أصلا من الباجور لكن مقيم فى شبين الكوم من سنين

معلشى حظك كده ... معرفتش تشوف العربية كويس ...

العربيتيتن زى بعض بالظبط
الموضوع يرجع ليك إنت عايزها سيدان و لا هاتشباك