حاضر ، حالاً ، ماشي ، ممكن كمان شوية
دي ردودي اللي دايماً برد بيها على أولادي أو جوزي لما يطلبوا منى حاجة ، أنا حاسة إني شالي شابلن وسط الجري بين الشغل وضغوطه ، والمدرسة لأبني ، وشئون البيت ، والمذاكرة ، وطلباتهم .
ساعات بفقد أعصابي وساعات بفقد عقلي كمان
حاسة دايماً بتوتر وقلق وعصبية وبصتنع البرود ودا لإرضاء الجميع ( أولادي ، أهلي ، زوجي وأهله ، ) وطبعاً الحفاظ على مظهري .
روتيني اليومي :-
* أصحا بدري وأشغل الغسالة ( 3 مرات في الأسبوع ) وأجهز سندوتشات المدرسة ، وأحضر الشاء بلبن والنسكافيه .
* بعدها أصحي أبني يلبس ويصلي وينزل للباص المتوجه إلى المدرسة
* أنشر الغسيل وألبس وأروح شغلي أنا وزوجي كلاً إلى عمله .
* يومي طويل في الشغل ( من الساعة 9 إلى الساعة 6)
* أتحرك من الساعة 6 بعد العمل إلى محل ( اللحوم أو الفراخ أو السمك ) علشان مش بحب اللحوم مثلجة علشان مش تفقد فيتاميناتها والحمد لله السوق في طريق عودتي .
* أدخل المنزل – ( زوجي ما زال بالعمل ) – أدخل بملابسي على المطبخ لتشغيل الكاتيل لتجهيز مياة ( الأرز أو المكرونة أو الفراخ أو اللحمة ) .
* أغير ملابس وأرجع تاني للمطبخ خلال هذه الدقائق أسلم على أبني وأأكله أكله بايته ، وأجلسه على مكتبه لعمل الواجبات المدرسية بدون متابعة جيدة .
* خلال المطبخ والواجبات المدرسية – ألم الغسيل وأنظف غرفة أبني ( لجلوسه فيها وحده منذ ماجيئه من المدرسة دون متابعة )
* أنتهي من الغداء على الساعة التاسعة ويكون أبني أنتهى من واجباته وأستسلم للنوم أمام التليفزيون ، وسوف يأكل غداءه ثاني يوم لأنه شبعان .
* يأتي زوجي الساعة العاشرة تقريباً أو بعدها بقليل أو كتير .
* أجهز الأكل نتعشى ونتحاور قليلاً خلال مشاهدة التليفاز وأنام .
* يبدأ يوم جديد بنفس مسلسله .
* طبعاً لم أذكر كل التفاصيل ولكن أغلبها
* وكمان لم أذكر الحالات الإضطرارية ( ميكانيكي أو دكتور أو مجاملة )
إحساس بأن الحياة رتيبة وبين الشغل والبيت بس
ما فيش إستمتاع بالحياة خاالص
وبعد دا كله حاسة بل متأكدة أني مقصرة في حاجات كتير على سبيل المثال وليس الحصر :
عندي نادي كل علاقتي به أني بدفع كل أول سنة وبنروحه قليلاً جداً ( بعض أيام الجمع ) .
لا يمارس أبني بأي رياضة رغم توافر المكان لكن عدم توافر الزمان .
عدم قيامي الليل أو قراءة القرآن كما يجب .
عدم خروجي مع أهلي أو أصحابي ، ولو عملت كدة يوم أجازتي – الأسبوع ينهار – لأنه في يوم أجازتي التنظيف الشامل للبيت وشراء الإحتياجات الأساسية ما عدا اللحوم .
شعوري بالملل دا جديد – طول عمري بعمل كل دا وعمري ما قولت آه
ما فيش اللي يحفزني أنجز أعمالي المعتادة
فاقدة الشعور بالمتعة بعد القيام بأي شئ أو فرحة بعد إنجاز أي عمل .
ختاماً : يا رب متكنوش أتخنقتوا مني ، وياريت تشاركوني بكتابة روتين يومكم ، وعايزة أسألكم عن رأيكم في يومي ؟ وطبعاً بصراحة ومش هزعل- بس بشروط – أوعوا حد فيكم يطلب مني أسيب الشغل لأني مضطرة ، ولو حد هيقول نظمي وقتك يقول لي إزاي ؟
وأوعى حد يقول لي أتمشي شوية أو ألعبي رياضة ، ولو مصمم يقرر لي أمتى ؟
توقيع : أختكم