الموضوع: لو واحد فى الشارع شتمك تعمل ايه

المشاركة الأصلية كتبت بواسطة ahmed4000

مهى المشكلة لو معاك حد او مراتك وولادك
الواحد مبيبقاش عايز يتخانق علشان المواضيع متكبرش وبقى فى احتمال كبير يبقى معاه سلاح فى الاوقات المنيلة دى
وبرده مبيبقاش عايز يسكت ويتهزق قدام عيلته

دى مشاركة ليا فى موضوع قديم كنت بحكى فيها بعمل ايه مع الاساليب المختلفة فى التعامل.... بس ده عادة بيكون و انا سايق لان موضوع المشى فى الشارع ده نادر:

(و بما اننا فى منتدى سيارات..... انا معرفش انت لما لا قدر الله بتعمل حادثة بتتصرف ازاى..... بس هقولك انا بتصرف ازاى كتطبيق عملى على الكلام اللى انا كاتبه فوق كله...... الكام حادثة اللى حصلولى او اتسببت فيهم و بالذات اللى اتسببت فيهم..... كنت لما اللى قدامى بيركن اروح راكن على طول وراه.... و استناه ينزل اروح انا كمان نازل..... بس ايه مش اى نزلة..... بمنتهى الهدوء نزلة البرنس :) نضارتك الشمس هدومك النضيفة عربيتك اللى بتبرق من النضافة :) (و مش مهم الهدوم او العربية غالية و لا رخيصة المهم اللى هييجى بعد كده) و اروح قافل العربية و هو بيتفقد اللى حصل فى عربيته...... اروح مادد ايدى بالسلام عليه و قايله بمنتهى الهدوء..... حضرتك كويس؟ حمدا الله على السلامة..... و بعتذر عن خطأى و ابدى استعدادى لتحمل اى تكاليف تصليح او خلافه...... الكلام ده بيبقى مع النوع الهادئ اللى لسه مسخنش بسرعة و لسه ما حطش فى اعتباره انه نازل يتخانق حتى لو محصلش حاجة خالص فى عربيته......

هيفضل النوع الزبالة..... ده بقى قبل ما يحاول يهلل و يتمادى بروح قايله بلهجة حازمة...... و بدون اعتذارات حتى لانه بيبقى واضح انه ما يستاهلهاش...... بروح قايله اسمع..... شوف عايز ايه و هعملهولك...... او شوف عايز كام تمن للى حصل..... و لانه اصلا بيبقى كل غرضه الفلوس او رمى الزبالة اللى جواه و خلاص...... بيتلم لانه بيفهم كويس ان ديته عندى بتبقى شوية فلوس ياخدها و يغور فى داهية..... احيانا كتير تلاقيه بيتلم و يقعد يقولك انت عايزنى اقبل العوض مش شايف اللى انت عملته؟ لما بلاقيه هدى كده اهدى انا كمان اقوله شوف عايز ايه و ايه اللى يريحك و انا تحت امرك...... تلاقيه على طول اتلم اكتر و اكتر و غالبا يقولى طب خلاص حصل خير و ساعتها الموضوع بيتلم بسلام سلام و حصل خير و الكلام ده..... او ياخودله قرشين و يتكل على الله..... و هنا المثل بيقولك اللى تعرف ديته اقتله..... هو ده توبه و هى دى ديته..... شوية فلوس......)

اخر مرة حصلى الكلام ده كنت حكيت فى عربية واحد من ورا.... نزل بيبص و قابلته انا بالطريقة اللى كتبتها فوق..... لقيته بيقولى كده خبطتلى العربية؟ قولتله فين؟ بص ملقاش حاجة..... قولتله شوفت؟ ادينى انا اللى اتعورت اهه.... قاللى فين؟ قلتله مش عارف...... قعد يضحك و سلمنا على بعض و مشينا.....