أول تقرير بالصور والفيديو لكاسيت Adrian AD-M9

**mous6fa** · 29-12-2012 12:08 AM

السلام عليكم ورحمة الله وبركاته

النهاردة طقت ف دماغى إنى أنزل أشترى كاسيت جديد للعربية من التوفيقية بعد ما نويت على Sony Xplod DSX–A30 بس مع الأسف مكانش موجود عند الأرخص وأرخصهم وكان سعره قبل الفصال 470 جنيه ... المهم فجأة وانا عند أرخصهم لقيت ناس كتير داخلة تجرب أجهزة كاسيت Adrian صيني وعاجبهم أووووى ... فبصيت بصة ع إمكانياته وبصراحة عجبني أنا كمان خصوصا إن الخرج بتاعه 4X25W يعني أقوى من الماتسوبيشي MC81 اللى الخرج بتاعه 4X7W فقط.

المهم لقيت إن كل الأجهزة نفس الإمكانيات بس الفرق ف الشكل الخارجي فقط ... وأستقريت والحمدلله على موديل AD-M9 ... أما المفاجأة بقى إن سعر الكاسيت 180 جنيه بسسسسسس ... أتكلت ع الله وأشتريته ورجعت ركبته ف العربية ع السماعات الأربعة بتاعة الفابريقة اللى فيها ... وبصراحة بسم الله ما شاء الله بجد – أداء ممتاز جداااااااا ومكنتش متوقع إن كاسيت بالسعر ده يكون بالشياكة والأداء ده ... الكاسيت خلاني أصرف نظر عن فكرة إن أجيب هيديونت أصلية ... يعني 180 جنيه كاسيت + 20 جنيه تركيب عملت إحياااء لسيستم الصوت ف العربية بعد الكاسيت العقيم البدائى اللى كان فيها لما أشترتها.
عاوز أقول كام ملاحظة : أولا أنا كان عندي ف العربية القديمة كاسيت GT500Uسونى مع طقمين Xplod وبالتالي أكيد هحس بالفرق بين العدة اللى كانت عندي والكاسيت الصيني .. ولكن سبحان الله محستش بفرق كبير للدرجة دي .. بالعكس أنا مش متخيل إن الجهاز يطلع بالإمكانيات والصوت الجبار ده.

ثانيا أنا حبيت أعمل التقرير ده بعد ما لقيت كل الناس عمالة تشكر ف الكاسيت الـ MC81اللى أكتشفت أن الخرج بتاعه يادوبك 7W وبالتالي مفيش اى وجه مقارنة بينه وبين الأدريان اللى الخرج بتاعه 25W .

ويارب التقرير والصور والفيديو اللى أستعرضت فيه الأوبشنز بتاعة الجهاز يكون مفيد للجميع .

المواصفات الفنية :

اللوحة الأمامية للكاسيت قابلة للخلع زي أى كاسيت من الماركات العالية.
شاشة LCD بإضاءة وكتابة زرقاء.
إيكولايزر جاهز الإعداد ( بوب – روك – كلاسيك – الخ ... )
قوة الـ Output 4 X 25
RCA
راديو AM\FM مع حفظ 30 محطة.
AUX \ USB \ SD Card \ MMC Card
RMS Power 18W
ريموت كونترول.

ودلوقتي أسيبكم مع الصور والفيديو اللى جودته متوسطة شوية عشان بكاميرا الموبايل .

Adrian AD-M9 Review - YouTube

**midooo_119** · 29-12-2012 03:04 AM

ماشاءا لله الف مبروك لكن خلينا نكلم بصراحه الكاسيت الماركه بيبقى اغلى عشان اكتر اعتمادية و اوبشن اعلى و اكيد فيه فرق فالصوت
مبروك مرة تانية

**mous6fa** · 29-12-2012 06:24 AM

الله يبارك فيكم يا جماعة ... أكيد طبعا بكل تأكيد أنا مش بقارن الجهاز ده بالأجهزة المعروفة اللى ماركاتها عالية زي السونى والبايونيير وخلافه ... بس كل الفكرة إن الجهاز ده من وجهة نظري الشخصية هو أفضل إختيار لأي شخص عاوز جهاز رخيص وأداء محترم وخصوصا إن الخرج بتاعه عالي عكس معظم الأجهزة الصيني + ضمان سنة + أكتشفت إن الجهاز لما بتقفل الكونتاكت وترجع تاني تدور العربية بيشتغل من نفس النقطة اللى قفلت عندها ... يعني لو مشغل أغنية طويلة أو سورة قرأنية هتلاقيه بعد ما تدور العربية بيشتغل من نفس النقطة اللى وقفت عندها ومش هيبدأ التراك من أول وجديد ... ومتهيألي ناس كتير جدااا ف المنتدى كانت فارقة معاهم اوووي النقطة دي ف الأجهزة الصيني مع ملاحظة أنك طبعا مش هتشيل الفلاشة أو الكارت من الكاسيت لإنك لو شيلتها وحطيتها فأكيد هيبدأ من جديد :)

**S O P H O S** · 29-12-2012 07:16 AM

يا باشا فعلا مش مهم ماركة كبيرة او غالي جدا
المهم يبقي كويس ويؤدي كل طلباتك منه
ومدام اداء ما شاء الله عليه وكويس يبقي ثفقة رابحة علي سعره
ومبروك مرة تانية ..