بكره لما تخلص و تشتغل و تتجوز و تخلف و تقبض 2500 صافي في الشهر ان شاء
هتضحك يا جميل !
:B4_039::angel10:
يا باشا بالراحة على الراجل..........هو كمان معترض على فكرة
القصة بس أني سألت على متوسط المصاريف زي ما أنت شوفت و هو الوحيد اللى رد
و مع إعتراضي على بعض ما جاء فى رده من مصاريف زي مصاريف الأكل اليومية...........قولت برضه ناخد الرد بتاعه على سبيل المثال.
عموماً..........فيه حاجة أو أتنين من الحاجات اللى قالها أنا شايفها رفاهية........زي الجراج مثلاً.......و أحنا المفروض بنتكلم أن البلد تبقى فى حالة تقشف.....و المواطنين كذلك.
خليني بقى أسألك بما أنك متجوز زي حالاتي.......متوسط المصاريف فى رأيك للبنود اللى أنا قولتها كام ؟ و لو فيه بنود تانية نسيتها يا ريت تذكرها.....و نفترض حتى أن الراجل مدخل عياله مدرسة حكومة......مش خاصة.......شوف مصاريف الكتب و الكشاكيل و مرواح و رجوع و مصروف للعيال جنيه فى اليوم مع أنه ميجبش حاجة دلوقتي بس معلش...معندوش تكييفات...ولا سخانات كهرباء....عربية 128.....كده يعني.......ما أحنا أتفقنا أن الموضوع تقشف :)
علشان بس نوضح لأخوانا المناصرين للفكرة أن أقل متطلبات الحياة لأسرة صغيرة ماشية يا دوب على قدها بدون رفاهية بتتكلف كام.
يا باشا براحه عليا بس واضح جدا ان حضرتك قريت بس اخر مشاركتين ليا فى الموضوع لان اكيد لو كنت قريت مشاركاتى كلها مكنتش حترد عليا كده لانك كنت حتعرف انى معارض للموضوع جدا وقولت حلول ليه غير الضغط على الناس واتكلمت كلام كتير بس حضرتك فتحت اخر صفحه بس
وعلى العموم انا والله كنت بفترض ارقام ردا على ا/Ahmed A.Maksoud بس انما انا مش متجوز وخريج تجاره وحاليا شغال مع اخويا مؤقتا لانى مش لاقى شغل محترم وراكب كيا برايد مش bm ولا حاجه وانا والله بضحكلانى كنت بفترض ارقام وواخد الموضوع هزار لانى عارف اللى انا كاتبه مش واقعى ومع ذلك مش هيكفى وبعدين يا باشا واضح قوى لما بقول حيفضل 1500 جنيه فى السنه انى بتتريق على الواقع المؤلم
ومع ذلك حصل خير واتمنى حضرتك تقرا مشاركاتى فى الموضوع ومواضيعى كله علشان تتاكد انى بس كنت بفترض ارقام وانى اصلا معارض لاسلوب الحكومه :bye2:
وعلى فكره انا دخلى فى الشهر اكتر من 1500 جنيه ومش متجوز ويدوب بيكفونى لوحدى بعد لما بشيل جزء احوشه فاكيد لما اتجوز مش حيكفى ضعفهم حتى
وزى مقولت قبل كده كان الله فى عون المتجوزين والحمد لله على العزوبيه
بس هو ده قصدى اننا نفتح باب لمناقشه ميزانيه اسره متجوزه بعد محطينا افتراض بس
وشكرا يا باشا على توضيحك ل ا/Kareem.ElAraby لانه واضح ان فى سوء تفاهم بس :B4_444:
رجاله المنتدي و الاعضاء
واضح ان طريقه الكلام بانت عصبيه و فيها تنشنه
فانا بأعتذر لاي شخص تضايق أو حس انني هجومي بس الكلام اللي عندي بيبقي brain storming
فما بأصدق أكتبه بسرعه بأقرب صيغه ممكنه
اعتذاري ليكم مره تانيه
و انا قاري الموضوع من الاول علي فكره بس الردود انا بأسيب الناس عشان أعرف الناس و طريقه تفكيرها و دماغها
يياااااااااا رااااااااااااااجل
بقى كل ده و تطلع لسه مش متجوز ههههههههههههههههههه
طيب بص يا باشا...........علشان بس الموضوع يبقى fair شوية.........انا عاوز حد متجوز يشارك فيه.....علشان الأرقام تبقى اقرب للواقع بس مش أكتر.
و أنا مش هكتب أرقام من نفسي علشان بقالي 3 سنين برة مصر و أكيد الدنيا أتغيرت فيهم كتير.
و بالنسبة لموضوع ليه أحرمه من كل ده.........أنا مش بحرمه......بس بنفترض مع بعض أنه معندهوش أى نوع من أنواع الرفاهية غير العربية ال 128........اللى برضه غيره مش لاقيها....يعني بنفترض حالة شبه مثالية لواحد في وضعه........مع أن أنت لو جيت للواقع.......هتلاقيه يا بيدفع قسط عربية يا بيدفع أيجار شقة إن مكنش الأتنين مع بعض.
انا مع القرار بس تدريجيا بمعني 150 لتر في الشهر قليل لناس كتير ممكن تبتدي برقم أكبر و بعد 6 شهور تنزل بالرقم بعد ما الناس تشوف تاثير ايجابي للقرار و الحكومه المفترض تكون في منتهي الشفافيه و تشرح فوائد الموضوع و الفلوس اللي هتتوفر هتروح فين و يبقي في خطه زمنيه نشوف بيها اصلاحات حقيقيه في مجال التعليم و الصحه و طبعا وسائل المواصلات العامه و الطرق - يبقي
1- يبدأ برقم كبير شويه و ليكن 250 لتر مع تغييرها ل 150 لتر بعد 6 شهور
2- المبلغ المتوفر هيتم بيه في البدايه اصلاح شبكه الموصلات العامه لانها هتبقي البديل لاي حد عايز يوفر و دة احد اهداف المشروع الرئيسيه انه يعالج مشكلة المرور كمان
3- يجب توضيح وضعيه السيارات القديمه ال 2000 سي سي
4- توضيح التحسين اللي هيطرأ علي الصحه و التعليم و تكون اهداف حقيقيه مش مجرد مكافأت للعاملين و دورات تدريبيه و ملايين علي الارض و خلاص
5- النزول التدريجي بالشريحه الجمركيه لان من اهداف المشروع برضة هو رفع تكلفه تشغيل السيارات مع خفض ثمنها يبقي اللي هيشتري عربيه هيبقي عارف انه هيصرف عليها كتير حتي لو اشتراها رخيصه
القرار ضروري للاسباب التاليه
1- اي دعم في الدنيا يجب ان يصل لمستحقيه و لازم يكون ليه قيمه قصوي لانه بشكله الحالي معناه كل ما تمشي بالعربيه اكتر كل ما هتستفاد بالدعم اكتر و نفس المنطق علي الكهربا و المياه و كل الخدمات بمعني لو انا واحد بمشي 5000 او 6000 كيلو في الشهر فدة مش ذنب مواطن تاني بيتحرك بالعربيه للمشاوير الضروريه
2- الصحه و التعليم هما ركيزة اي دوله و تحسينهم اهم بكتير من دعم الطاقه
3- انفاق الدعم علي الموصلات العامه و الطرق اهم من صرفه علي البنزين لان المواصلات العامه هي وسيله انتقال الفئات الاكثر فقرا يعني المستحقه للدعم اكتر
في الاخر يجب دراسه القرار كويس جدااااااااا و توضيحه للراي العام بوضوح و عدم ترك فرصه للاعلام الغبي انه ينقل صورة تانيه و ياريت ميكونشي زي قرار غلق المحلات و تقدر الدوله علي تنفيذه