اقتباس المشاركة الأصلية كتبت بواسطة hosini2000 مشاهدة المشاركة
هذه المشاركة أكتبها بعد قرارا مني بالمقاطعة كنت واخده بعد حظري على الموقع لأني كتبت كلمة عن الجمارك التي تذهب لجمال و علاء (فاكرينهم ؟)
اليوم دخلت كمشاهد (كعادتي) لاجد هذا الموضوع ..و بصراحة استفزني جدا جدا ..ما استفزني هوالردود و -اعذروني- الولولة على القرار و ان لم يخل الموضوع من مشاركات جيدة ..
بصوا يا جماعة : الله الله ع الجد و الجد الله الله عليه..
الدعم اللي جزء كبير منه بيروح للمحروقات يروح ليه لناس عندها عربيات بينما في ناس مش لاقية تاكل و كلنا بنشتكي من مستوى التعليم و الصحة و الطرق ..مش الأولى بيه صحة و تعليم و طرق و عيش ؟ و لا الفسح و التنطيط و الساباقات و الخمسات ؟
مبارك سابلنا (كلنا) البلد خربانة ..وادامنا طريق من اتنين : يا كل واحد ياخد حتة من اللحاف على قد قوته و جبروته و بالتالي ناس كتير تبرد ..يا إما كلنا نتغطى باللحاف نفسه ..و اللي معاه يستحمل شوية علشان اللي مامعاهوش ..
لكن البلد تبقى في الحالة دي و يسيبوا البنزين أسعاره كده و يتهرب و يتباع في السوق السودا و لا حتى تستهلكه ناس مش محتاجة و أجانب و شباب خارج يتفسح و ناس بتركب عربية لواحدها ..كل هذا السرف و في ناس عايشة في المقابر و ناس بتستلف علشان تعلم عيالها و ناس مش لاقية حق الرغيف و لا الدوا ..

اللي راكب عربية و زعلان انه مش هايعرف يروح مصيف : مش مكسوف من نفسك ؟ مش حاسس ان كلامك فيه حاجة غلط و مش شايف ألوف في البرد ده مش لاقيين غطا و لا اكل و لا دوا ؟

اللي راكب عربية و شايف ان ال5 لتر هايخلصوا في الزحمة : اركب مواصلات ..
انزلوا من عروشكم شوية و اركبوا مع الناس ..عاوزين مصر تنهض ازاي و احنا مالناش شغلة غير التريقة و النقد الباطل و تكسير المجاديف ؟
عاوزين البلد تنهض ازاي و احنا مش عاوزين نتخلى عن أي حاجة و لا نضحي بأي حاجة ؟
و ليه حضرتك حكمت على الناس اللى معترضة انها كل همها المصيف و التخميس و السباقات ؟

معظم المعترضين مش معترضين على القرار فى حد ذاته.........بس معترضين على توقيته اللى بيتزامن مع قرار زيادة الضرايب على السلع المختلفة.

أحنا مش عاوزين أنهم يرجعوا فى قرار رفع الدعم........بس على الأقل نشوف رد فعل يتناسب من الحكومة على أساس انها عاوزة تنهض هي كمان.......ولا الشعب هينهض لوحده ؟

لما يكون الإنفاق الحكومي على الرفاهيات ببذخ و تيجي الحكومة تفرض ضرايب على الشعب و ترفع دعم البنزين طبيعي أن الناس تعترض.

و علشان تطالب الناس أنها تنزل من عروشها........يبقى برضه المفروض يكون فيه وسائل مواصلات أدمية علشان الواحد يعرف يركبها........و اللى بقوله أنها تكون أدمية مش حاجة فاخرة يعني.

أرفع الدعم عن البنزين بس شيل الجمارك أو بمعنى أصح قللها زي الدول التانية لأن السبب الأصلي فى الجمارك العالية هو أن كان فيه دعم بنزين..........علشان كده تلاقي الجمارك على العربيات فوق ال 1600 بيوصل ل 200% و أكتر.......علشان يشجعوا الناس تركب 1600 و أقل علشان إستهلاك البنزين المدعم............بس بما أن الدعم هيترفع يبقى الجمارك تقل.

أبتدي أشتغل على مختلف الخدمات و البنية التحتية........مش عاوزين نشوف نتايج السنة الجاية لا اللى بعدها..........بس نشوف ناس بتشتغل و عاوزة تعمل حاجة......و فى الأخر نشوف نتيجة.

تقبل تحياتي.