الموضوع: عاوز انضف دورة التبريد

زي ما قال الأعضاء..ممكن تلاقي خروم بعد التنظيف والتغيير لمياه خضراء

بس لو ناوي عشان الحر ومتوقع النتائج إنك ممكن تحتاج تغير ردياتير لو قديم وظهر فيه خروم وممكن تحتاج تغير طرمبة مياه كمان - ده في حالة ان الدنيا عندك صعبة اوي والمياه بني من الصدا ومبهدل الدنيا

لو ناوي ممكن تعمل الاتي:

1- تفتح طبة الردياتير وتفك خرطوم القربة تنزل كل المياه القديمة
وكمان تنفخ في خرطوم القربة عشان علي قد كما تقدر تنزل المياه اللي في بلوك الموتور

2- بعدها ترجع تملي مياه حنفية لو انت مش بتستخدم مياه خضرا في الاساس..لو بتستخدم مياه خضرا والموضوع مش متبهدل اوي عندك..هات مياه خضرا اي كلام للتنظيف فقط

3- تدور العربية لو العربية كانت سخنة و تملي مياه حنفية في الردياتير والقربة وتدور وتزود مياه لو محتاجة تزويد وتديها بنزين شوية لحد مال العربية تسخن والمراوح تشتغل عشان تبقي دورة المياه مشيت في الموتور وخدت المياه القديمة قدامها

4- تطفي العربية وتنزل المياه تاني من الردياتيروالقربة وتنفخ في خرطوم القربة

5- كرر العملية دي لحد ما المياه تنزل نضيفة

6- زود مياه عادية بقي وحط عليه منظف دورة تبريد او فلاش للردياتير...لو فيه فلاش كبير 4 ليتر مثلا بيتحط لوحده يبقي علي حسب النوع واقرا طريقة الاستخدام عليه

7- دور العربية وزود بنزين لحد ما تسخن لحد مثلا ربع ساعة بعد ما تسخن وانت مزود بنزين عشان الدورة كلها تنضف

8- بطل العربية ونزل المياه تاني واقفل طبة المياه كويس وقفل القربة بالخرطوم بتاعها كويس وهات مياه خضرا نوع نضيف موبيل او ايادا الاسباني وحطها في الردياتير

خلي بالك...لما تزود مياه بعد ما نزلت المياه كلها...لازم تدور العربية عشان وش السلندر ميتاثرش ولا الردياتير

لو اي حد له اضافة او تعديل يتفضل مشكورا