الموضوع: مشكلة فى شاحن العربية (الولاعة)

ازيكم ياشباب.

اولا كل سنة وانتم طيبين , ليا حوالى سنتين مدخلتش على المنتدى :) واحشنى جدا :)

عندى مشكلة غريبة شوية وعاوز مساعدتكم.

انا معايا لوجان 2010 مانيوال, وجيبت من كام يوم MP3 اللى بيتوصل بالولاعة علشان الشحن لكن للاسف مشتغلش, الغريب انه شغال فى كل العربيات بتاعت اصحابى مع اختلاف انواعها (فيرنا لانوس بى ام), على فكرة الولاعة عندى شغالة زى الفل وبولع منها سجاير عادى جدا.

اللى مدايقنى جدا انى اشتريت موبايل سامسونج S3 واشتريت معاه car charger وبرضه نفس المشكلة شغال فى كل العربيات الى عربيتى :(

حد عنده المشكلة دية فى عربيته؟ حد عنده حلول للمشكلة دية؟؟

شكرا يارجالة.

طالما بتستعملها فى توليع السجاير ، يبقى فيه طفى سجاير تراكم من آثار التوليع عمل عازل ومنع أى حاجة تانية غير الولاعة انها تشتغل.
هات منديل ورق ولفه حوالين صابعك ، وخش بيه والعربية مبطلة ونضف فتحة الولاعة وكل ما المنديل يطلع اسود غيره لغاية ما يطلع نضيف ، هتلاقى الشاحن اشتغل.