النهارده باذنك يا رب
نزلت وديت احمد الأمتحان
و احنا فى السكه بقله انتوا بكره اجازه على اساس بكرة الأتنين
قاللى لأ
النهارده و بكرة امتحانات
و اكتشفت ان النهارده السبت
قلت يعنى هاروح
اروح المرور و انا و نصيبى و اللى يحصل يحصل
الرخصه خلصانه من 8/2012

كنت قدام المرور 7.45
ثانى عربية هناك و اول عربية فى الصف
و بما انى عارف الدنيا ماشية ازاى
اشتريت ورق الفحص ب 35 جنيه من بره
عشان الخزنه لسه مقفوله
و الفحص بيبدأ بدرى
و صورت البطاقه و الرخصه
و جبت شهادة بيانات لنيابة المرور
و عملت التأمين الأجبارى ب 35 جنيه
كل ده قبل ما يبدأ الفحص
و جه مهندس الفحص و طلع حبيبى قوى وجارى كمان
ايه اللى جايبك
هافحص
راح منادى عم على بتاع البصمه و قاله خد البصمه
خد البصمتين و رضيته عشان راجل حبيبى
و طلع العربية بره خالص

و اديت لبتاع الطفاية اللى فيه القسمه محبة عشان الطفاية كده كده سارية

الظريف بيقوللى جاى تفحص طيب اغسل العربية
اديها حتى فوطه
دى شكلها معفن
قلتله ده الموجود
ايه النظام
قاللى ماشى بس متعملشى كده تانى

و طلعت على شباك 13
ناديت رجب العسكرى كانت 8.30 الصبح
عملى شهادة البيانات عشان معايا صورة الرخصه بتاعت المالك الأول
و ادهانى طلعت على النيابه
و دى كانت الورطه الكبيره
ليه بقى
معمولى مخالفه عجب
اخد فيها سجن مش غرامه
اقتحام كمين
و الهروب بسيارة بدون لوحات
و التعدى على افراد الشرطه

و كلام كبير
لقيت بتاع النيابه بيقوللى خش لرئيس النيابه
لقيته بيقوللى المخالفه دى
قلتله : يا باشا بالمنطق العربيية من غير لوحات اللى عملت كده و الرخصه فى جيبى و ضربت الظباط و العساكر و الأمنا :b4_444:
و سابونى امشى
ده يبقى كمين قلل مش كمين شرطه

قاللى طيب استنى بره
المخالفه كانت فى المعادى
الراجل المحترم اتصل بيهم جاب صورة المحضر و المخالفه
لاقاها عربية كروز سودا
و انا اوبل حمراء اللون

راح منادينى تانى
قاللى انت ربنا بيحبك ان المحضر مضعشى
و شالها من على الشاشه
و ادانى شهادة المخالفات " لايوجد "
براءة يا رجاله

و كان فى مخالفتين ردار بس عدى عليهم 3 سنين فسقطوا و الحمد لله عشان انا كنت باجدد فى المواعيد

نزلت على شباك التجديد كان امر الدفع جاهز
دخلت دفعت 280 جنيه
بالرغم ان الرخصه انتهت من 4 شهور
مدفعونيش 1/3 ضريبه اضافى
و الحمد لله

دفعت و كشت على البطاقه
معليش احكام
و دخل الكمبيوتر
و خدت الرخصه بتاريخ فحص 2016
وكانت الساعه تمام الحادية عشر و الربع بتوقيت القاهرة
التكلف الأجمالية بالسلطات و البابا غنوج 500 جنيه
و تفضلوا بقبول فائق الأحترام

تقرير
محمد الطنانى