الموضوع: ♥ تعمل أية لمن تيجي (بنت حلوة) تقابل أبنك في البيت لوحدوا ؟

الحمد لله علي السلامه ابو تركي وعمره مقبوله باذن الله
متقلقش علي البرنس الصغير طالما ان سره مع والدته وبيحكلها علي كل اسراره
اهم حاجه ان انت تكون عارف الدنيا ماشيه معاه ازاي
علشان لو لا قدر الله حصلت اي مشكله تقدر تتدخل في الوقت المناسب
وربنا يباركلك في اولادك ويجعلهم قره عين لك

المشاركة الأصلية كتبت بواسطة y a r i s

حتى انتوا هتتصدموا اول ما تتخرجوا من جامعاتكم ان تالت تربيع الحجات الي خدتوها في الجامعة مالهاش اي تلاتين لازمة اللهم شهادة انك معاك شهادة .... فكاني لازم اصنع شهادة لابني انوا. متربي وعلى خلق في حين سوق العمل او المجتمع مش محتاج واد متربي خالص .

انا الحمد لله عندى بنتين وولد بس لسه الكبيره 8 سنين
ربنا يستر :)

ايه العيال دي يا اخوانا !!!!
دا انا اول مره كلمت بنت كان في الجامعه ..... و دلوقتي اتخرجت و اشتغلت و لا اجرؤ اني اكلم بنت قدام والدي او والدتي .....
.
بس انا في رايي انك متعرفش ابنك انك عرفت .... كفايه انه بيقول لوالدته ..
عشان يكون في عنده خوف منك .... بحيت وقت ما يغلط و عايز تقفش عليه ...
بس دا لا يمنع انك كل فتره تتابعه يعني تسال في المدرسه و كده ...

ربنا يخليلك تركي ويخليلك حبايب تركي ويتربوا ف عزك هههههههههههه
يااستاذي قول الحمدلله ع نعمة حب الناس لتركي فهذه النعمة يفتقدها بعض البشر
والدور الواجب عليك انك تشوف هو سره مع مين مع حضرتك ولا مع مامته واللي سره معاه هو اللى يجذب اطراف الحديث معه يعني يقوله ايه اخبار حياتك ايه مفيش جديد ف حياتك ولا ايه ده انت ملكش ف حاجة يابنى ، وهو هيرد ع طول وهيقول اللي جواه وكده يكون سره مع احد من والديه المهم انكم تحتوه عشان هو داخل ع فترة ثانوي ودي فترة تمرد الولاد وعايزين يحسوا برجولتهم وانهم مش يسمعوا كلام اهاليهم فانتم لازم تحتوه وتعاملوه بالراحة من غير شد
بالمناسبة هحكيلك ع حوار انا كنت ايام الثانوي كنت بزوغ من المدرسة من برة برة الوالد يوصلنى مكنتش ادخل المدرسة واطلع اروح لصاحبتي ف المدرسة اللي جنبي اخدها ونتفسح مرة عمي شافني وراح قال لابويا انه شافنى عند مدرسة البنات انا بقى روحت البيت عادي هكني راجع من المدرسة كيوم دراسي عادي
ابويا سئلني ايه اخبار الدراسة معاك النهاردة قولتله تمام رد وقالي والبنت اللى كانت معاك كانت تمام هي كمان ولا كان عندها مشاكل بتحلهلها انا بلمتله وحسيت اني مبلول بلل فظيع وقولت شكلي هتلطش لطشة لا يعلم بيها الا ربنا فرد وقالي يابني اعرف واتعرف بس المهم انك متوعدش ولا تظلم واهم شىء دراستك ولغاية وقتنا ناو الجملة دي انا فاكرها عشان عمر ماابويا كلمنى ف حياتي الشخصية ولما اتكلم اداني الجملتين دوول ومن ساعتها كنت ملتزم والتزويغ كان بيتم بعد امضاء الحضور عشان الغياب بقى كان ف تحسن يعني

المشاركة الأصلية كتبت بواسطة y a r i s

لا ابداً مش الكلام هو الي صعب لكن الحقيقة والواقع هو الي صعب
وعلشان كده انا مدايق ... احياناً كتير بقول. لا ولازم ابقى صارم مع ابني واربيه على الاخلاق الفضيلة والقيم الاصيلة لابعد مدى .... بس هو المفروض اجهز. واهيئ ابني للمجتمع وللدنيا الي هيطلع ليها ؛ وبقيت محتار بين اني اطلعوا واد مخربش مقطع السمكة وديلها وبين انوا يكون واد متربي وابن ناس .... فاكتشفت معادلة صعبة جداً لاني هبقى بالزبط زي جامعات ومعاهد مصر بتعلم. الطلبة حجات. في حين لمن يتخرج الطالب ما يلقيش اي حاجة من الي اتعلمها نفعاه في سوق العمل. !!!!

حتى انتوا هتتصدموا اول ما تتخرجوا من جامعاتكم ان تالت تربيع الحجات الي خدتوها في الجامعة مالهاش اي تلاتين لازمة اللهم شهادة انك معاك شهادة .... فكاني لازم اصنع شهادة لابني انوا. متربي وعلى خلق في حين سوق العمل او المجتمع مش محتاج واد متربي خالص .

لذلك بيبقى كل اب مننا في صراع نفسي وتسائل وبيبقى زي الي ماشي على الحبل وماسك عصاية بايديه ( في السيرك ) وعمال يوازن نفسوا من هنا وهنا ... منين مثلاً بقول. لابني ان دينا دين تسامح .... وحاول ديماً تتسامح مع الناس وتصبر وتحتسب ... ومنين موقف تاني اقولوا لأه كده غلط المفرووووض تاخود حقك بدراعك وتكون واد مخربش ومتخليش حد يعلم عليك انتا علم عليهم .

يجي يقول ألله مره بتقولي يا بابا. سامح ومره بتقولي خود حقك بدراعك .... فاطر اقولوا معليش يا ابني هيا الدنيا كدة حلات حلات هههههه

ففين مصداقية الاب قدام ابنوا .... بس اعمل ايه مجتمع ابن لزينة .... كان زمان مصر متقسمة مجتمعات على سبيل المثال فتلاقي الطبقة المتوسط في مكان و الطبقة الغنية في مكان والطبقة الفقيرة في مكان والبلطجية في مكان تاني .... حتى لو تفتكروا يقلك متروحش الحته الفلانية دي كلها بلطجية وقطاعين طرق وهتتثبت فيها .

النهردة معدش في معيار محدد وبقى المجتمع كباب مشكل .... وزبادي بالخلاط
والمفروض تبقى انسان ممثل. كي تنجح وتبقى غني مع الغني وفقير مع الفقير وتبقى بلطجي وقليل الادب مع البلطجي
طب قولولي انا كاب هعلم ابني ايه بس ياربي ... اعلموا دين وتربية من هنا. وشتيمه وقلت ادب من هنا .... ولا احط ابني في الخلاط واحط في الخلاط شوية تربية وادب. وشوية قلت ادب على شوية سفالة مع قليلاً من الاحترام واضربوا في الخلاط ... ههههههه اغلب زمايلي بكل صدق بيقولولي ياعزيزي احنا معدناش نربي دلوقتي احنا. بنحبس بناتنا ... ونطلق سراح شبابنا في الشارع والشارع والايام والليالي كفيلة تربي اي عيل !!!

وعلشان كده تلاقي نسبة كبيرررررررررررررة من العيال الي واقفه في الشراع مش متربية
حتى منهم زميل ليا كان بيتفاخر بتربية ابنوا الحميدة في الشغل .... لغايت ما مرة مرض وقلنا نروح نزوروا بعد الشغل ونشقر عليه. المهم مش عارفين انهي عمارة بيتهم فبنسئل عيل من الي كانوا واقفين. يبسبسوو لكل واحدة. فشرررر. الواد بتاع مولدي افلام فبقولوا حبيبي العمارة رقم ٢٧٠ فين لو سمحت. بصيت لقيت الواد قالي طب ولعلي الاول وانا اشوارلك على البيت هههههههههه. رحت منولوا الولاعه. وشورلي على البيت قالي عاوز مين فيه. قلتلوا عاوز استاذ فلان بصيت لقيتوا رمى السوجارة الي في ايدوا ومن لهوجتوا. بيقولي بابااااااا !!!

قلتلوا لأ ماما تعاله يا حلووو انتا ابن استاذ فلان. يازين الادب والاخلاق ههههههه
فبجد موضوع التربية مش سهل ولا بسيط لانك بمنتهى البساطة مش بتربي كلب ولا بتربي قطة ولا عندك حوض سمك هههههه .... انتا بتربي ذئاب مفترسة من اكلين اللحوم على شكل اطفال :)

وتحياتي ... واسف على الاطالة . :)

ياباشا مادام زرعت شجرة صح وبترويها صح خلاص مفيش رياح هتأثر فيها
وبالنسبة لحوار البنات كده كده هيكلم بنات حتى لو كنت قافل عليه لو مش ف الثانوي هيكون ف الكلية ولو مش ف الكلية هيكون ف الشغل فلازم تسيبه يكلم الطرف الاخر عشان مش يكون خايف من التحادث معه ودايما تقوله حط ربنا قدامك عشان كما تدين تدان وارفع حتة الضمير جواه عشان هو ده الرقيب بعد ربنا ع الانسان مش انت الرقيب عشان هو لو حب يعمل الغلط هيعمله ولو قافل عليه اربع ابواب فاحتويه احسن ماتمارس دور الشدة والتخويف

ياسيدي كل دا عادي ومش صح انك تبدء تكلمه في السن دا وتفتح عينه لأن اصلا شاكك ان ممكن تكون مجرد صداقه بريئة :d

وكمان مش صح تسخن عليه عشان الواد ميطلعش معقد ولا بيتكسف والقصص دي

::بس ع كل حال احنا كنا عيااااااااااااال طيبين اوي يا خال :d

الله يعينك ويقويك ويسترها معانا فى الايام الجايه ده
انا قرات طريقة الرسول الكريم في التربيه وما امرنا به
(لاعبهم فى سبع وعلمهم فى سبع وصاحبهم فى سبع ثم اطلق العنان)
بس فى كل الاحوال ماينفعش تبقى بيسس وتعدى الموضوع او تقبل ان البنات يجوا البيت لان انت عندك بنت ولما هى كمان تلاقى الموضوع بيسسسس يبقى هى كمان ممكن تعمل كده ويبقى كونسبت طبيعى بقى ماهو بابا عادى وماما كمان عادى من فيلم الباشا تلميذ
ففعلا ممكن تجذب معاه اطراف الحديث بكل هدوء وتوجهه للصح وعلى فكره لازم متابعه للمدرسه انا افتكر ان ابويا الله يرحمه كان بيعدى على فى الكليه وقال ايه كان جمبى هنا فقال يعدى على يمكن نروح سوا ومنها يتعرف على اصحابى رحمه الله عليه
بس صدقنى اهم حاجه انه يحبك وماتقفش عليه عشان يسمع منك وربنا معاك ومعانا لانك خلتنى ابدا افكر فى العيال من دلوقتى لما هيوصلوا للسن ده هعمل ايه خصوصا ان انا عندى توام يعنى هيظبطونى والله المستعان