الموضوع: نسالكم الدعاء لوالد زميلنا علاء الشناوي

بشكركم جميعا على سؤالكم عن والدى الكريم
وببلغكم تحياته وشكره العميق على دعواتكم بالشفاء له
وربنا يبارك فيكم جميعا ويعافيكم ويبعد عنكم الأمراض .
والحمد لله رب العالمين الحاله أحسن من الأول كتير جدا وفى تحسن مستمر
وبعد أشعه الرنين المغناطيسى اللى عملناها اول امس الدكتور شافها وقالى الحمد لله رب العالمين
إننا إتصرفنا بسرعه وجينا المستشفى لأن الجلطه كانت فى مركز المخ يعنى بدون مصطلحات طبيه معقدة
حاجه كدة زى ضفيرة كهربا العربيه ولولا ستر ربنا الحمد لله رب العالمين كانت ممكن تعمل شلل رباعى .
لكن طبعا نبهنى إنه لازم يبطل تدخين فورا لأن دة فى خطر حقيقى على حياته .
لكن المشكله الكبيرة إن الوالد تقريبا بيدخن من أكتر من 50 سنه ومش قادر يبطل .
يعنى عاوز اقولكم اننا فى الكام يوم اللى فاتوا ولغايه اليوم وهو لا زال فى المستشفى
مش عارف طبعا يدخن وبالليل بتكون ليالى طويله معاة لأنه مش عارف ينام مش بسبب الألم بس لكن كمان بسبب عدم التدخين .

الدكتور قالى ممكن يكتب له خروج الجمعه اللى جايه .
لكن هو بيفضل إنه يكون تحت الملاحظه لغايه ما يطمن ان الأمور استقرت .

بشكركم شكر جزيل اخى وصديقى العزيز كريم منير على عمل الموضوع دة
و كل من سأل عنى تليفونيا او فى الموضوع دة او من تفضل بزيارتنا بالمستشفى .
وان شاء الله ارجع اشارك بعد خروج الوالد العزيز من المستشفى وخاصه انى مرافق له بالمستشفى .
يمكن اليوم بس جيت شغلى من كام ساعه لإنجاز بعض المهام سريعا وهرجع تانى المستشفى .

أخيرا .........

دايما وفى كل موقف بيحصل لى بتأكد إن نايل موتوز عيلتى التانيه وكل الموجودين هنا إخواتى
متشكر لكم جميعا .