الموضوع: صني الجديدة - ماتزودش عن 80 أثناء العواصف

بسم الله الرحمن الرحيم


يارب الجميع يكونوا بخير , ويجنبنا شر الرياح العاتية دي ويرزقنا خيرها ... ويلطف بالغلابة اللي مالهمش بيوت ولا لاقيين بطاطين وأغطية في الجو القارس ده


إحساس جميل انك تكون طاير بطيارة شراعية , خصوصاً لو الجو حلو ولطيف والشمس طالعة وانت طاير فوق غابة ولا نهر أو شاطئ بحر ... لكن الإحساس ده بيتحول إلى قلق واضطراب وساعات قلبان معدة لو الجو اتغير وسرعة الهواء اشتدت ....

أهو ده بقى نفس اللي هايحصللك لو انت كنت سايق النيسان صني الجديدة على سرعة عالية وسط رياح سريعة ... خصوصاً لو طريقك مفتوح والهوا جايلك من كل اتجاه ... ولأن العربية وزنها بيخف مع زيادة السرعة (وهي خفيفة من الأساس علشان توفر بنزين) ... فعن تجربة مانصحش حد يزود عن سرعة 80 , ويتمسك بالدركسيون بشدة ويحافظ على اتجاهه وانه يفضل في حارته , العربية بتتأثر بشدة بسرعة الرياح


وعندي استفسار ياريت حد يفهمني ليه كدة بيحصل .... امبارح الهواء كان شديد والعربيات كلها بتتمرجح (مش بس النيسان بتاعتي) ... وتلاقي ناس ماشيين على 140 وأزيد رغم ان الطريق كان عليه تراب وضباب ومطر ورياح عاتية

هل هؤلاء القوم بلا عقل , أم بلا وعي , أم تحت تأثير المخدرات؟؟


إن كان الواحد فيهم واثق في قدرات عربيته ووسائل الأمان , فهي مش بتنفع فوق الـ 140 خالص


وان كان عمال يقول دي عربية ألماني عضمها ناشف وصاجها تقيل وماتتأثرش بحاجة , فصديقي الضابط اتوفى من كام يوم علشان كان راكب "مدرعة" واتقلبت في سيناء , رحمة الله عليه


وان كانت كشافات عربيته هالوجين أو زينون أو حتى آشعة تحت الحمراء ... فهي عمرها ماهاتوريك طفل صغير بيعدي الطريق قدامك وسط الشبورة , ولا هاتمنعك تلبس في عربية راكنة على جنب عطلانة وصاحبها بيحاول يصلحها


والأدهى من كدة الناس اللي بتاخد غرز ... ده الواحد بيحرك الدركسيون نص الحركة الطبيعية والهواء كان بيكمل الباقي ... مش قادر افهم ازاي اللاوعي اللي عنده شغال وبيقنعه انه ملك الطريق وعفريت وماحدش قده .... القانون قديم , وبيقوللك "السواقة مالهاش كبير" ... ونيجي في الآخر نلاقي أرواح راحت وأطفال بقوا يتامى والخبر ينزل يقوللك "بسبب السرعة الجنونية" ... طب ليه من الأول كدة؟



أرجو من الجميع توخي الحذر وتجنب التكبر والثقة الزايدة بعربياتهم ولو كانت مصفحة ومدرعة , ماحدش فينا قد انه يقابل ربنا وهو متسبب بنفسه في وفاته أو وفاة ناس تانيين بسبب الرعونة ... هانقول له إيه ساعتها؟



ربنا يسلم طرقنا جميعاً