انا عاوز اشتري ساجا بصراحة قرأت عن امكانيات العربية وعجبتني بس البحث اللي عملته سواء علي النت او الناس كله بيقول العربية ممتازة بس التوكيل المعاملة والخدمة سيئة وقطع الغيار مش متوفرة فكنت عاوز استشيركم
ايه رأيكم هل الكلام ده صح ولا في أمل
عرض للطباعة
انا عاوز اشتري ساجا بصراحة قرأت عن امكانيات العربية وعجبتني بس البحث اللي عملته سواء علي النت او الناس كله بيقول العربية ممتازة بس التوكيل المعاملة والخدمة سيئة وقطع الغيار مش متوفرة فكنت عاوز استشيركم
ايه رأيكم هل الكلام ده صح ولا في أمل
بص خش قسم نيسان اللي بيقولوا عليه من احسن التوكيلات في مصر
هتلاقي الناس بتعاني مع التوكيل في موضوع قطع الغيار وكمان سمعت شكاوي علي خفيف من العربيات الهيونداي الموديلات الجديدة وقريب ليا معاه كورولا الجديدة اتركنت تلات اسابيع في التوكيل عشان قطعة غيار صغيره في الفتيس.
الخلاصة اغلب التوكيلات عندها نفس المشاكل وخلي بالك انت في مصر :)
نصيحة عامة ماتشتريش موديل عربية مش منتشر
النصيحة العامة دي يا أستاذ وليد لو كانت مشيت على الهيونداي و الكيا زمان مكناش ركبناهم و لا شوفناهم في السوق .
لو النصيحة العامة دي أتطبقت على الياباني اللي المصريين مكنوش يعرفوا عنه حاجة مكناش ركبنا تويوتا و ميتسوبيشي ..... الخ .
النصيحة الأفضل ....... ما نركبش حاجة مجهولة .
الجين 2 في 2006 مكنش حد يعرف عنها حاجة
و لولا الناس اللي أشترتها ....... مكنش بقى في جين 2 في مصر .
و لو كل الناس مشيت على الكلام ده ....... فيه شركات كتيرة مش هاتطلع و لا هاتشوف النور .
نصيحة لأي مقبل على شراء أي حاجة
ما تشتريش حاجة مجهولة ...... مش عارف أصلها و فصلها .
أشتري اللي معروف و له قطع غيار .
أما بقى موضوع اعادة البيع بيختلف من واحد للتاني .
و بينطبق على عربيات كتيرة قوي
زي السوباورا ....... و المازدا .......... الفولفو ......... البروتون ........... الخ .
اعمل استخارة وتوكل على الله
شوف انت عاوز تشتري ايه وعاجبك واشتريه.
كلامك مظبوط بس ليه الراجل يجرب فى نفسه وبعدين يتبهدل عشان قطع غيار ومايعرفش يبيع العربية بسهولة صح احنا الزمن حكم علينا ان احنا مانجربش لان العربيات غالية سيب بلاد تانية تجرب لكن الراجل مش هايبقى دافع كل فلوسه وتقوله جرب ... انا مع كلامك بس مش فى مصر الكلام دة للشعوب الاكثر رفاهية
انا ابتديت افكر في اللوجان كبديل بعد الكلام ده هاروح ابص عليهم هما الاثنين في المعرض واصلي استخارة وربنا يقدم الخير
اللوجان اظن انها افضل
في الانتشار والصيانه واللاتساع وقطع الغيار
الساجا نادره الوجود في الشارع
أنا مقلتش للراجل يجرب .
أنا بقوله ما تشتريش حاجة مجهولة ....
البروتون متجربة بالفعل ..... و كل اللي أنا قلته بالحرف ....... ما يشتريش حاجة مجهولة .
كون حضرتك مش عارف عن العربية معلومات كتيرة أو مش مجربها ... ده مش معناه أن اللي بيشتري بيجرب في نفسه .
على العموم .... حصل خير وواضح أن حضرتك مفهمتش وجهة نظري .
اللوجان عربية ممتازة .
أتكل على الله .
و أوعى تشتري البروتون و أنت عندك ذرة شك .......
لو عندك ذرة شك واحدة ........... أشتري اللوجان و خليك في المنتشر .
إنما لو حابب الساجا .
السيارة ممتازة و متجربة .... موتورها هو نفسه اللي في الجين 2 و البرسونا و الواجا و لكن على 1300
بس قبل ما تتخذ قرار لشراء الساجا ....... لازم يكون عن أقتناع تام 100 % .
قبل ما أشتري الجين 2 سمعت كلام كتير ...... و كلام سلبي جدا (و ناس أصلا ما ركبتش العربية أساسا )
و لكن بأقتناع تام و حب في السيارة .
توكلت على الله و أشتريت العربية ........... و ربنا مخيبش ظني و السيارة طلعت ممتازة
(ساعتها كنت بجرب إلى حد كبير )
و لكن دلوقتي .... مرحلة النجربة أنتهت .......... و أحنا دلوقتي عندنا في مصر فوق 20 ألف عربية بروتون بتجري في شوارع مصر .
يعني التجربة موجودة و كبيرة على كميات و أعداد مش قليلة .
فلازم مرة تانية لو عايز الساجا ......... تكون مقتنع 100 % .
غير كدا .
الللوجان عربية حلوة و توكل على الله و أشتريها .
البروتون ماركة متجربه لكن مشكلتها بالنسبة للساجا سعر اعادة بيع وعدم انتشار ودة بالنسبة لل ساجا لكن لو ناوي على ال جين تو توكل على الله