نفسي اشتري ونش !! او عربية مصفحة
السلام عليكم ورحمة الله وبركاته
بصراحة الموضوع زاد عن حده جدا ,, الواحد بقى بيكره اليوم اللى بينزل فيه بالعربية بيروح اي مشوار
من اللى راكن في نص الشارع وسايب عربيته ولا فارقة معاه ان الشارع يبقى متعطل !! ومن المكروباصات اللى تقف فجاءة في اي حتة في وسط الشارع يركب وينزل ناس
ومن الموتوسيكلات الصييني اللى ماتفهمش بيجيو منين وماشيين ازاي !! ولا عربيات النقل والاتوبيسات اللى بيبقى واخدها بالدراع نظام يا توسع يا هتتخبط !!!
ومن ومن ومن ومن ...
فعلا والله العظيم بقى نفسي اشتري ونش او عربية مصفحة وادخل في اي واحد راكن صف تاني ومعطل الطريق
نفسي اجيب ونش وادخل بيه في اي مكروباص بيقف في نص الشارع مع ان يمينه فاضي وممكن يقف براحته على جمب
نفسي اجيب ونش وادخل بيه في اي اتوبيس او ترلا واخدينها بلطجة وماشيين بالدراع
نفسي اجيب ونش وادخل بيه في التكاتك كلهم بدوء استنثناءات
نفسي اجيب ونش وادخل بيه في اي حد بيركن صف تاني ويعشق عربيته ويعطل مصالح الناس بسببه
نفسي اجيب ونش وادخل بيه في اي سواق تاكسي بيقف فجاءة لمجرد ان حد شاورله بدون حتى مايبص اذا كان فيه عربيات وراه ولا لاء
نفسي اجيب ونش وادخل بيه في كل عربيات النقل والترلات اللى ماشيين على الدايري بدون اي مبالاة
نفسي اجيب ونش وادخل بيه في كل المكروباصات والاتوبيسات اللى واخدين السواقة عافية ويرمي عليك ياتوسع يا تتخبط
نفسي اجيب ونش واولعه في المرور والظباط اللى بسبب اهمالهم لشغلهم وصلنا للى احنا فيه
كل يوم الدنيا عمالة تزحم اكتر من الاول وتبوظ اكتر ماهي بايظة !! المشوار اللى المفروض تروحه في نص ساعة بيتارح في ساعتين تلاتة
وتلاقي السبب مكروباص واقف بيحمل في نص الشارع !! تاكسي واحد شاورله قام واقف
اتوبيس جاي من اقصى اليمين لاقصى الشمال عشان ياخد U-turn
بتبقى حاجة تحرق الدم لما تلاقي مكروباص وقف فجاءة في نص الشارع عشان يركب زبون مع ان اليمين فاضي !!!!!!!!!! بيبقى هاين عليا انزل اولع فيه
تبقى ماشي في شارع زي المحروس شارع العشرين وتلاقيه واقف !! تبص قدام تلاقي مكروباص واقف في نص الشارع بيحمل !!!! يعني خلاص مابقاش عندنا اي احساس ولا اي مبالاة يا اخي اركن على جمب وحمل براحتك
ياترى كام واحد فينا نفسه يشتري ونش ؟؟؟ كام واحد فينا بشكل يومي بيقابل مواقف تحرق الدم ؟؟
ياترى كل البني ادميين في كل العالم نفسهم يشترو ونش برضوا ؟؟ ولا احنا البلد الوحيدة اللى بيحصل فيها المهازل دي ؟؟
ياترى كل البني ادميين دمهم بيتحرق في كل مرة بيسوق فيها ؟؟
ياترى كل الناس برضوا بتنزل قبل شغلها بساعتين تلاتة عشان مش ضامنة ليكون في مكروباص موقف الطريق !! ولا اتوبيس واقف بيحمل في نص الشارع !! ولا عربية من ايام هتشبسوت عطلت في نص الطريق ؟
ياترى في حل ؟؟ هل ممكن في يوم من الايام نلاقي الدنيا اتظبطت ؟
لك الله يا مصر
حسبي الله ونعم الوكيل