انا والهواء وعم حسين بتاع الدش في الدور الحداشر
السلام عليكم ورحمه الله
من كام يوم كدة الدش عندي طار من شوية هوا جامدين
انا بقالي 10 سنين بتعامل مع محل كبير في المنطقة ومريحني جدا
تعالي ركب يركب
تعالي شيل يشيل
ابعتلي كذا ماشي
ناس محترفة ومعظمهم كانو شغالين في ART وفاهمين وحافظين التركيب بدون رسيفرات ولا شاشات ولا كلام من ده
المهم انا كنت مشتري طبق متر مع الرسيفر الجديد وركنته قولت اطلعه اركبه
لقيت جنب البيت محل صغير فاتح دش
واقف فيه شاب صغير بتاع 22 سنة
قولت اشجعه بلاش المحل الكبير واهو يسترزق ده تركيب طبق
تعالي يابني ركب كذا
في الدور الكام يا بيه
السطح هايكون الحداشر
حدااااااااااااااشر !!!!
هو انت هاتطلع على رجلك ما في اسانسير
ايوة يا بيه وبتاع
ويوافق الباشمهندس على مضض
جاب شنطتة وجاي معايا
هاتحتاج جبس ولا اسمنت ؟
اه
قد ايه ؟
معرفش شوية كدة
نعععععععم
هات xyz
طب خد فلوس هات
لاء هات انت يا بيه
!!!!!!!!!!!!!!!!!!!!!!!
خد الفلوس وراح جاب الحاجة ومتضرر قوي
طلعت معاه
عايز حاجة تاني ؟؟
اه خليك واقف نورلي بالكشاف
يا صبر ايوب جررررررررر
نسيت اقولكم انه كان بيندغ لبانة بطريقة مستفزة جدا
وحاطط سماعات الهيدفون في ودانة الاتنين ومعليهم والصوت واصلي وعشان اكلمة لازم اشيلة سماعه ويرجع يحطها تاني
بيسمع بالقرش كله باين عليه
فهمته اني عايز كذا وكذا وان العمارة الجديدة اللي طلعت جنبي قفلت ارسال النايل سات
وكل الاطباق اللي حوالينا دي اصحابها سابوها عشان مابقتش تلقط واشترو اطباق جديدة وبيحطوها ورا
هو صمم يحطها قدام
يابني مش هاتنفع
يا باشا ده شغلي
سيبته يعجن والجو تلج وموقفني جنبه
وبعد كدة مفيش اشارة
يا حبيبي ماقولتلك من الاول
قالي هاكمل الصبح
قولتلة تكمل ايه الصبح
قالي اصلي اتشائمت من الطبق ده وسايب المحل لوحدة هاجي الصبح على رواقة واهو دلوقتي اجيب زبونين تانيين
قولتلة انا واقف جنبك بقالي ساعتين
قعد يقول كلام مالوش اي لازمة
طبعا كنت هارمية من الحداشر وسبحان من مسك ايدي وهو نازل من باب السلم كنت هازقووولوووة من على باب السطوح :-)
قرفت من الحوار والنهاردة معدي من على قدام المحل بتاعي اللي عارفة والدنياا تلج وهوا عنيف وبتمطر
قولتلة لما الدينا تروق ابعتلي حد يركب عشان حصل كذا كذا
لقيت واحد بيرد عليا في المحل مش اقل من 50 سنة والله
هو حضرتك رايح مشوار ؟
لاء مروح
طب اجي معاك اركبلك
في الجو دة يا حاج ؟؟
اه وايه يعني
وصفتلة العمارة علي مادخلت العربية الجراج حصلني
وريني باب السطح بس ومكان الطبق وعايز ايه
الواد كان بوظ الاستاند نزل جاب واحد من المحل والمحل بعيد لوحدة
وطلع ركب واشتغل ونط عالسطح التاني والجو مبطلش مطر وهو شغال مالوش دعوة
ضلمة وهواء عنيف ومطر وهو شغال
يا سبحان الله
ناس قد ايه بتخاف على رزقها
والتاني ابو لبانة وهيدفون يقولي اتشائمت ويبوظلي استاند وعدسة كلفوني 50 جنيه غير الوقت وده عندي اهم
والتاني مقاليش هات اي حاجة وخد مية من عند البوابة من تحت ولا قالي هات مفتاح الاسانسير وطالع نازل عالسلم
50 سنة
وابن 22 سنة مش عايز يتعب
خلص ونزل وقالي
كله تمام وبص على الدش بتاعك
لاقط كل القنوات ظبط حاجات من عندي وقالي سلام
طب اقعد اتغدي
لاء كدة جبرت ام العيال مستنياني
لا قوة الا بالله
عشان عملت معروف وقولت انفع الجار وفاتح محل جديد يسترزق ؟؟
معلش كله عند المولي بس كان ليا نصيب مع عم حسين بتاع الدش :-)
طولت عليكم بس حبيت انقلكم غيظي :-(