وصلت شغلك النهاردة في وقت قد أيه ؟

**Samir Elshahawy** · 09-01-2013 09:47 AM

الاخوة و الاخوات الكرام

أسعد الله يومكم ووقاكم ووقانا من شر الطريق ...

النهاردة يوم غير طبيعي لطقس غير طبيعي و لكنه متوقع منذ أيام عندما حذرت الارصاد الجوية الاسبوع الماضي من طقس سئ و عاصف قد يستمر أسبوعا و علي الفور بادرت الادارة العامة للمرور بأطلاق التحذيرات لقادة السيارات و مستخدمي الطرق و لكن ..

علي الرغم من علم الجميع بهذه الموجة السيئة من الطقس ألأ أن الجميع لم يأخذ أحتياطاته :
1- قائدي السيارات لم يتخذوا أحتياطاتهم فنجد العديد من السيارات متوقفة علي جانب الطريق
2- العديد من الحوادث بسبب التهور و عدم اتباع الارشادات المرورية في مثل هذه الظروف
3- المحليات لم تأخذ أستعداداتها فغرقت الشوارع في شبر ميه و تعطلت الطرق

لذا فقد وصلت اليوم الي عملي في حوالي 45 دقيقة مع العلم أن المسافة من منزلي و حتي العمل لاتزيد عن 20 كم و أقطعها كل يوم في حوالي 15 دقيقة

ياتري أنت وصلت في وقت قد أيه ؟

**M.Elgergawy** · 09-01-2013 10:04 AM

كل يوم بوصل على 9 انهارده وصلت 9.40
بسبب المياه والشوارع اللى غرقانة
بلد بتغرق في شبر ميا

**mohamed_selim** · 09-01-2013 10:07 AM

النهارده لظروف خارجه عن ارادتى نزلت بدرى قبل الزحمه (نزلت على 8 30) و انا طبيعى بنزل 9 30 ... اخدت نفس الوقت بتاع الطبيعى على الرغم ان الدنيا نسبيا كانت فاضيه عن الطبيعى بس تجمعات الميه كانت مؤثره على الطرق .... حمدت ربنا انى نزلت بدرى بس قلقان على الولاد فى باص المدرسه و هم راجعين من التجمع لمدينة نصر !

**akmm** · 09-01-2013 10:59 AM

ساعه كامله من المعادى للتجمع وفى الطبيعى 40 دقيقه ولما تكون كمان زحمه .

**sanhory** · 09-01-2013 11:08 AM

ساعة و نص من المعادي لمصر الجديدة الحجاز

الطبيعي 45 دقيقة

**SAMEH_FOUAD** · 09-01-2013 11:14 AM

بنزل من البيت الصبح على 7:45 , الطبيعى وبوصل على 8:10 كدة

انهاردة نزلت فى نفس الميعاد ووصلت على الساعة 8:25 دقيقة يعنى العادى , هو بس عشان كان فية تجمع مياة فى اماكن كتير عشان كدة كان الطريق واقف شوية

طريق شغلى من دائرى الهرم الى وسط البلد

الحمد لله على كل حال انا فية ناس جاية الشغل عندنا الساعة 9 وربع

**Mohamed.Mohsen** · 09-01-2013 11:34 AM

كنت بخرج 7.40 واخد ثلث ساعة واوصل 8 وصلت 9 .من تقاطع اوتستراد المعادي مع الدائري الي دار القضاء في الاسعاف . بسبب تجمعات المياه .

**nagy wassef** · 09-01-2013 12:50 PM

نزلت 8:30 وصلت 10:00 من اول عباس للتجمع الخامس و استخدمت طريق السويس

ليه الشوارع مافيهاش تصريف؟ مع ان مافيش اكتر من البلاعات!!!!! و رغم اماكن تجمع المياه معروفة فى كل منطقة بقالها سنين؟ و حتى لو مفيش فلوس نظبط الكلام ده ليه مفيش عربيات بتطلع تشفط البحيرات ديه؟ ليه بيسيبوها كام يوم تنشف لوحدها؟؟؟؟ هو ده السؤال. و احييك على هذا الموضوع