العربيه بتبطل (مشكله تم حلها)
السلام عليكم
كان عندى زمان مشكله مع حساس كان بيخلى العربيه تبرجل وتبطل ومخنوقه على طول فى المشى وتم حلها فى الموضوع ده بشراء الحساس
http://www.nilemotors.net/Nile/282081-a.html
سعر الحساس 70 جنيه استيراد ومسالتش عليه جديد وتركيبه ماخدشى 5 دقايق والعربيه اتظبطت وكنت عشات اجربها كنت بمشى بسرعه مثلا 80 وبعدين ادوس فرامل وانا معشق الغيار وعند مثلا 30 اروح ممور من غير ما ادوس دبرياج وكانت العربيه بتبطل معايا بنسبه 100% لما بعمل الحركه دى المهم انها بقت تمام ومبتبطلشى
ربنا كرمنا بعربيه فولكس للشغل بتاعى ولانى كنت معظم المشاوير كنت بخلصها بالابيزا فكانت على طول بتمشى يوميا المهم انها اتركنت باليومين ومعملتشى فى شهر اكتر من 20 كيلو وعلى فترات وفى وسط البلد
لاحظت ان الموضوع بتاع التبطيل رجع تانى بنسبه 50% يعنى ساعات بتبطل وساعات لا
كل افكارى اتجهت للحساس وكنت خايف ليطلع هو السبب واشترى واحد تانى فعملت عبيط عن المشكله لمده اسبوع ولانى حاليا الوضع تغير وبقيت بستخدمها بمعدل 20 كم يوميا جوه البلد حسيت بالمشكله اكتر
المهم اتوكلت على الله وحضرت العده وبدات الشغل
الخطوات
1- فكيت العمه من الاربع مسامير وشيلتها بره
2- فكيت واير البوابه
3- لقيت البوابه مهببه بنسبه 40% طبعا اول مره نضفتها كانت سوده http://www.nilemotors.net/Nile/267500-a.html
4- نضفت البوابه تنضيف جاف بحته قماشه نضيفه وهى فى مكانها وكنت بفتح البوابه بايدى وامد صوابعى جواها بحته القماشه ونضفت بنسبه كبيره نقدر نقول انها بقت مهببه بنسبه 10% للاماكن اللى معرفتش اوصلها
5- فكيت فيشه الحساس ونضفتها تنضيف جاف بحته القماشه اياها
6- دورت العربيه من غير الحساس والعمه مفكوكه وكان صوتها وحش شويه وفضلت ازود بنزين براحه لحد ما سخنت والشكمان جاب ميه نقيه
7- ركبت العمه ومشيت بيها شويه تقريبا نص ساعه وطبعا كان صوت المكنه فارق سنه كان عالى وخشن شويه
8- ركبت فيشه الحساس تانى وطلعت اجرب الحركه اياها مع حبه ضغط على المكنه ووقفه بعدها
النتيجه
1- الموضوع اتحل زى كانى لسه جايب الحساس
2- الميه اللى بتتبخر من الشكمان بقت نضيفه مفيهاش هباب
3- الصوت اتظبط بعد تنضيف البوابه فى اول الدواره بعد ما كان فى هزه كده بسيطه
الدروس المستفاده
1- العربيات دى بتحب المشى اكتر من الركنه
2- النضافه الدوريه مع الصيانات بتعمل المعجزات
3- اى حاجه بتعملها فى العربيه بتحس بيها فورا
دمتم بخير :)