الموضوع: تنضيف البوابه خطوات ونتائج

السلام عليكم

الدوافع:
من كام يوم لما كنت بنخرب فى العربيه بتاعتى واللى كتبت تفاصيلها هنا
http://www.nilemotors.net/Nile/266923-a.html
والنتيجه ان العربيه بتبطل وبدخن بغباء وفى زباله زى الزفت كده نازله من الشكمان ومبرجله والسحب فى الضياع

المراجع:
عملت موضوع فى نايل موتورز وكان اللى هو برضه الموضوع اللى فوق وكانت النتائج بضروره تنضيف البوابه ومجيش جنب التى بى اس خالص وده كان من المهندس ايهاب والمهندس محمد سيد

الادوات:
1- علبه wd40
2- حته قماشه نضيفه لونها ابيض
3- مفك عاده
4- مفتاح الاتكيه
5- مفك صليبه

الخطوات :
1- فكيت كابلات البطاريه
2- فكيت العمه بمفك صليبه من الاربع مسامير اللى مترقمين من 1 الى 4 وشيلتها بره بالفلتر بس بعد ما شيلت خرطوم الفايص اللى جى من الموتور
3- فكيت الاربع مسامير الالانكيه اللى ماسكين البوابه بحذر ورفع سلكه الارضى وفك فيشه التى بى اس وتاكدت ان الجوان اللى تحتها ثابت ومفيش احتمال انه يقع
4- غطيت المدخل تحت البوابه وفيشه التى بى اس بحته قماشه نضيفه
5- فضلت انضف الهباب المتراكم على البوابه بقماشه نضيفه بدون اى تدخل سائل
6- رشيت WD4 جوه البوابه وعلى السوسته وسبته دقيقه وبعدين نضفته بالقماشه واستخدمت المفك العاده فى تنضيف الاماكن الضيقه وازاله الطبقه المتراكمه داخل البوابه بسن المفك بس بعد ما غطيته بالقماشه
7- تجفيف البوابه جيدا والتاكد ان السوسته تعمل بكفاءه وتلميعها قدر المستطاع
8- تنضيف الفتحه اللى تحت البوابه ولقيت فيها شحم متعاص بهباب على زفت اسود وتنضيفها كان جاف من غير wd40
9- تركيب البوابه واعاده الفيش وتثبيتها والتقريط على المسامير ميكونشى جامد عشان القاعده بلاستيك وممكن تضر

النتيجه :
العربيه مادارتشى من اول مره بس دارت من المره التانيه بسهوله
اول ما دورت العربيه الار بى ام على عن كل مره وبعد كده بدء يوطى سنه سنه
العربيه مخرجتشى اى روايح مع الحرق لانى نضفت كل نقطه منظف رشتها
العربيه تعمل بشكل جيد بس لسه باره وعشان ااترموستات اللى فى الكوعه مش موجود اضطريت استنى شويه عشان تسخن شويه
الدخنه السوده اتمنعت خالص والموتور بينزل ميه لونها طبيعى ومفيش ولا زفت ولا قطران
العربيه رجعت ما شاء الله زى الاول واحسن والحرق بقى تمام ولما طلعت اجرب بغض النظر عن الفجوه اللى فى نص الار بى ام العربيه كانت ما شاء الله عايز تطير من على الارض ومحصلشى انى جبت بيها الرابع لانى ببقى مضطر افرمل عشان الطريق بيقفل

الملاحظات :
-انا جربت انى ارفع كابلات البطاريه عشان اعمل ريسيت للاخطاء زى ما قاللى المهندس ايهاب بس مفيش حاجه اتغيرت ولما سألت اخويا قاللى انك لازم تسيبها نص ساعه لو هى زى الهوندا
-وانا بفك مسامير البوابه لقيت اتنين منهم شبه مفكوكين فقلبى وقع فى رجلى لانى افتكرتهم مفوتين
-البوابه دى اول مره تتنضف لان مفيش فيها اثار لاى خرابيش او فرشاه سلك
-كان عندى الافيز اللى قافل على خرطوم البنزين اللى جاى من ورا واللى داخل على الرشاشات بيهرب ومع ضغط الطرمبه بلاقى البنزين بيسرب وانا غيرته وانا شغال

السؤال بقى :
ممكن يكون ده كان عيب نضافه بس مش اكتر ولا ممكن يكون اى سبب تانى من اللى انا قايلهم دول ليها يد فى الموضوع ده

شكر واجب :
المهندس ايهاب والمهندس محمد سيد

الصور بعد التنضيف عشان بصراحه الموبايل كان ممكن يتف عليا لو كنت مسكته وانا ماسك البوابه وهى وسخه بس الخلقه البيضا هتبين حالته قبل التنضيف











ودى الصور بعد ما ركب فى العربيه والصوره دى والعربيه دايره سامعين الصوت اتحسن ازاى







اسف على الاطاله