معرض لبيع السيارات بالتقسيط

**mohamed** · 26-06-2007 09:03 AM

حد يعرف معرض بيبيع سيارات بالتقسيط بدون فائدة على القسط ؟ بمعنى ان المعرض يبيع العربية اللى ب 60الف ب 69 الف على 4سنوات مثلا وميزودش فائدة على القسط ؟؟

**أبو_حمزة** · 26-06-2007 09:12 AM

أظن البرجسى بيعمل كده
بس بيزود 15% عن كل سنه
و مش أكتر من سنتين

كل الناس اللى بتعمل الموضوع ده بتزود السعر و الفايده جدا
تحس انهم بيقولوا لك "انت مش عايز حلال. طب ادفع بأه"
ربنا يهدينا جيعا للصواب

**Nile Heart** · 26-06-2007 09:19 AM

نفسى افهم المنطق بتاعكوا
يعنى بدون فايده ع القسط وفى نفس الوقت ال 60 بقوا 69!! ماهوا الفرق ده فايده!

**أبو_حمزة** · 26-06-2007 11:24 AM

مسألة الفوايد والشراء بالقسط دى فيها كلام كتير
وفى ناس ربنا يبارك لهم بيتحروا الحلال
انا معاك ان الموضوع شكله هوا هوا وان اللى بيتعمل تغيير شكلى عشان الزبون اللى خايف يقع فى الربا
بس برضه لازم نحاسب من الحرام المشتبه
نسأل الله العفو و العافية لنا جميعا

**mohamed** · 26-06-2007 11:51 AM

الفكرة كلها ان انت لما بتتاخر فى سداد قسط بيتحسب عليه فوايد لكن فى المعرض ده مبيتحسبش المشكله ان واحد قالى عليه بس نسيت اسمه وعنوانه .. طيب البرجسى ده فيين؟؟

**AhmedElsayed** · 26-06-2007 11:57 AM

يجماعة طيب مافى بنوك بتعمل كده
يعنى ماشية اسلامى
منهم ناصر، والتمويل السعودى، وفيصل

ربنا يوفقك للحلال ان شاء الله ويباركلك على نيتك الطيبة

واللى بيسالوا عن ايه الفرق ماهى فايدة برده؟
حقولهم ده بيع وشرا وهو بيقولك حبعهالك اغلى من السوق لو حتدفع اجل مش فورى وده حلال
وحنرجع للاية الكريمة تانى لما الناس من 1400 سنة سالوا نفس السؤال هو ايه الفرق بين الفايدة والبيع والشرا
فرد عليهم الله
"ذلك بأنهم قالوا إنما البيع مثل الربا وأحل الله البيع وحرم الربا"
يعنى ربنا عز فى جلاله بيقولهم لا فى فرق

**Nile Heart** · 26-06-2007 12:34 PM

معنى الكلام ده ان ال 60 اللى هايبقوا 69 دول مش شرط انهم يندفعوا على اقساط متساويه ولا فى مواعيد منتظمه ولا اى حاجه! هوه ليه ياخد 69 فى خلال ال 4 سنين مثلاوبس ؟ صح؟

يعنى انا اديله الف جنيه اول شهر وأنام 4 سنين وبعدين ممكن ادفع ال 68 الباقييين دول بعد 4 سنين!

دى حاجه ظريفه اوى :) قلتولى مين بقى بيعملها؟

**أبو عبدالله** · 26-06-2007 12:34 PM

جزاك الله خيرا الجزاك يا أخ أحمد وربنا يوفقنا لما يحبه ويرضاه

**hussein** · 26-06-2007 07:34 PM

توكيل دايهاتسو اللى فى المعادى بيعمل تقسيط مباشر من غير تأمين كمان على العربيه لو انت عاوز
وبيقسط جميع العربيات ماعدا الاسكودا واللنسر وبفايده 10 %
والعربيات الديهاتسو بفايدة 8%
وربنا يجعل كل معاملاتنا حلال ان شاء الله

**AhmedElsayed** · 27-06-2007 09:17 AM

لا يا اخ نايل هارت فى الاغلب بيتدفع برده بصورة شهرية بس بتبقى الزيادة فى تمن العربية نفسها كانه تاجر جملة اشترى حاجة بسعر وبيبعهالك بسعر اعلى وكمان علشان مش حتدفع فورى فكل الفقهاء اتفقوا على انك ممكن تدفع زيادة اذا كنت حتدفع بالاجل لان مش معقولة نظلم التاجر ونقعد فلوسه من غير ميشغلها

لكن الحرام انك تاخد فلوس من بنك ويقولك هما 60 الف ترجعهوملى 70 الف

فعلشان كده لو البنك هو اللى باعلك العربية (يعنى كانت باسمه وبعدين نقلها باسمك فكده يبقى بيع وشرا لكن حتدفع اجل
وممكن البنك يوكلك انك انت اللى تختار العربية والمعرض بنفسك وتستلم حتى وهو يدفع للمعرض، لان البنك معندوش الخبرة الكافية

لكن لو ادالك فلوس وقسطها عليك وانت روحت اشتريت بيها عربية فده يبقى حرام وربا صريح

الخلاصة ان فى عدة بنوك بتطبق الطريقة دى ممكن تتعامل معاها