استفسار بخصوص شراء ستروين ax

**Mustafa_21** · 11-01-2013 04:27 PM

السلام عليكم يا شباب
انا معايا فى حدود 22الف ودورت كتير على مواصفات معينة لاول عربية هاشتريها ولانى لسة جديد ماعنديش اى خبرة فى العربيات ولسة متعلم سواقة جديد فطبعا اخدت راى كل صحابى اللى معاهم عربيات وكلهم حظرونى منها ومن قطع غيارها وصيانتها ومشاكلها الكتير بس انا بصراحة عايز عربية شيك وصغيرة ملمومة يعنى وفيها تكييف و ماتورها كويس وفى حدود اللى معايا قلبت كل المواقع ومالقتش غير الستروين ax وكان المفروض انى اشترى عربية من شهرين ناس رشحولى الماروتى بس انا حاسس انها صغيرة ومافيهاش تكييف وانتوا عارفين بلدنا فى الصيف عاملة ازاى وانا عايز حاجة مميزة مش عارف اعمل ايه خايف اشتريها واندم على فكرة انا ساكن فى الجيزة وعرفت ان فيه قصاد القرية الفرعونية ميكانيكى اسمه عماد بتاع ستروين جنبه محل قطع غيار اسمه الفراعين بتاع ستروين برده لكن ماعرفش مستواهم ايه فى صيانة الستروين وفى اسعار قطع الغيار ياريت لو حد جربهم يقولى ايه رايه لان ساكن قريب منهم وده يفرق معايا كتير لو قررت اشتريها وياريت لو حد عنده اى نصيحة مايبخلش عليا لانى والله تعبت من التفكير ومش عارف اعمل ايه واسف جدا انى طولت عليكم

**amoooh2004** · 11-01-2013 11:08 PM

بص يا كبير انا معايا ax العربيه هايله عيبها الوحيد انها ضيقه من ورا شويه و لكن كاداء ممتازه و بتجري قطع الغيار موجوده عند ناس كتير سعرها طبعا مش زي ال128 بس بتعيش العربيه ديه مفيهاش ابلتين و كوندنسر و ديه ميزه مهمه يعني لما بتسخن ما بتهبلش و تبطل و ناعمه استهلاك بنزين قليل المهم حاله العربيه ترفعها في مكان كويس و تقيس كبس الموتور و تبص علي الصاج و تجرب التكييف و الي يقولك عايز شحن قوله لا نعتبره مش موجود يا اما تشحنه و نجرب
لو عزت اي حاجه قولي و انا اساعدك

**Mustafa_21** · 12-01-2013 07:21 PM

شكرا على ردك طب انت تعرف مكان مضمون ارفع فيه العربية ولا اخد معايا ميكانيكى وسمكرى واسف انى باتعبك معايا

**rotanamasoud** · 13-01-2013 08:55 PM

والله العربيه معايه من 3 سنين وفهمت كل حاجه فيها والحمد لله مندمتش يوم انى اشتريتها
بس مصر كده لما بترفع عربيه ملاهاش قيمه زى ال127 وتخسف بالستروين الارض