الموضوع: بيجو 307 sw ولا هوندا سيفيك

طبعا هوندا سيفيك

1- تكنولوجيا أعلى بكتير
2- قوة المحرك أفضل وصوته ... صوت ايه ده مالوش صوت أصلا غير البيجو خاااااااااااااااااااااااا االص

3- أوفر بكتير في استهلاك الوقود من البيجو

4- قطع الغيار أرخص من البيجو مش كتير بس أرخص واللى أعرفه عن الفطيم ان قطع الغيار عنده متوفرة دايما يعني مافيش حاجة اسمها يبعت يجيبها لسة

5- الـ 307 خلاص نزل بعديها الـ 308

6- وانا واقف عند أحمد عمارة توكيل بيجو مصر القديمة بصلح حاجات في عربيتي الـ 505 كان عنده واحدة 307 SW وعلى قد ما كنت بحب العربية دي على قد ما اتضايقت من اللى شوفته فيها ... العربية كانت عمالة حادثة بسيطة من قدام بس خد عندك بقى الحاجات اللى باظت فيها .. تقريبا كل حاجة فيها لأن الموتور بتاعها محطوط في مساحة ضيقة جدا وفوّش أي خبطة مباشرة ... طرمبة الباور , الردياتير , صدر العربية كله هايتغير , الخبطة وصلت للموتور واثرت علية ده غير اللى انا ماعرفوش .. غير ان الإير باج فتح في كل حتة .. السقف , التابلوه , فرش الأبواب واخده تصليح لغاية ما كنت واقف عنده حوالي 40000 جنيه ولسة ماتعملش فيها حاجة .... كل ده عشان خبطة صغيرة جدا من قدام

7- المكيف في الهوندا ياباني .. يعني حاجة تانية خالص .. غير مكيفات البيجو اللى مش قد كده عن تجربة في القديم (ماعرفش الجديد فيها أخباره ايه)

8- وانا واقف عند عمارة لاقيته فاتح كذا فتيس اتوماتيك لعربيات 506 , 406 , 607 ... وبيصلح فيهم فبسأله ايه دا هية العربيات دي لحقت حاجة فيها تبوظ ؟؟!!! قالي آه فتيس البيجو الأتوماتيك الجديد ضعيف الى حد ما وقاللي كمان ان الـ ECU بتاعة البيجو بيحصل فيها حركة تخلي كل المعلومات اللى عليها تتمسح تماما وان الحركة دي بتحصل كتير قوي والـ ECU دي تمنها 10000 جنيه ولازم يبعتوا يجيبوها من فرنسا الأول .. فهما بياخدوها هيه هيه ويحاولوا ينزلوا عليها البرنامج بتاعها تاني من عندهم كمحاولة لتقليل نفقات التصليح على العميل