كيف تتحكم في الاضاءه بالنسبه لجميع الاوقات indoor / outdoor portrait هام جدا

**hany63** · 13-01-2013 02:26 PM

مساء الخير

في الموضوع السابق شرحت القواعد العامه لتصوير البورتريه وطبعا القواعد دي ثابته في كل الاوقات بس لازم نعرف ازاي نتعامل مع الاضاءه عموما سواء كانت طبيعيه المصدر يعني في ضوء الشمس او صناعيه المصدر زي اضاءه الغرف و امتى استخدم الفلاش عموما

الاضاءه الطبيعيه -الاوت دور

يفضل التصوير في الصباح الباكر و قبل الغروب بساعه عشان هنا مصدر الضوء (الشمس) مابيكونش عمودي على الوجه و بالتالي بيطلع الوجه بدون ظلال او ضوء زايد
ولو اضطرينا نصور في وسط النهار يبقى نختار مكان ضل بجوار مبنى او تحت شجره مثلا و هنا الصوره برضه هتطلع كويسه بس يراعى ان عدسة الكاميرا ما تكونش مواجهه للشمس

طب نفرض اننا و اقفين في مكان ما فيهوش ضل خلاص قفلت يعني
النتيجه هنا ان وجه الشخص هيكون عليه زي ظل غير منتظم و هنا نفتح الفلاش رغم ان الضوء جامد جدا بس وظيفة الفلاش هنا انه هيملا الاماكن اللي اضاءتها ضعيفه على الوجه نتيجة الظلال و بنسمي وظيفة الفلاش هنا fill in flash

التصوير بالاماكن المغلقه عن طريق الاضاءه الصناعيه

هنفترض انك رايح عيد ميلاد بالكاميرا و كله يوسع و قعدت تصور
هل انت لما بتنزل الصور بتكون راضي؟ لو لأ هقول لك السبب انك ما اتعاملتش مع ظروف الاضاءه بطريقه احترافيه
اولا كده من حيث المبدأ الاضاءه الصناعيه اقل بكتير من الطبيعيه و لو صورت بنفس اعدادات الكاميرا في الاوت دور الصباحي فالصوره هتطلع سوده عشان كمية الضوء الداخله للعدسه قليله يبقى ايه الحل؟
الحل طبعا انك تفتح الفلاش بس لازم تخلي بالك انك ما تبقاش قريب قوي من الشخص عشان سببين اولا انك هتعميه و لازم هيغمض ثانيا لو وراه حيطه هتلقى خياله انطبع عليها
وفيه مدرسه في التصوير ما بتحبش للاسباب دي استعمال الفلاش اساسا بس لازم يكون معاه كاميرا شبه احترافيه عشان ياخد نتيجه كويسه عن طريق التحكم في حاجه اسمها حساسية الكاميرا للضوء ال ISO
بس عشان نعلي الايزو درجة جودة الصوره لازم تقل بدرجه معينه و الدرجه دي بتبقى قليله في الكاميرات الاحترافيه و عاليه في الكاميرات العاديه لدرجة انهم لما بيقارنوا بين كاميرا و التانيه اول حاجه بيشفوها جودة الصوره في الايزو العالي

نرجع تاني لموضوع الفلاش و واضح طبعا ان الفلاش اللي في الكاميرا مش هيدي نتيجه هايله في كل الظروف طب ايه الحل

مفيش غير انك لو بتحضر حفلات كتير ومعاك كاميرا DSLR غير انك تجيب فلاش خارجي و تركبه فوق الكاميرا و ده شكله

طب ييجي حد يسألني و يقول لي (حلوه الحته دي) طب انت عملت ايه جديد يعني
ارد و اقول له ان الفلاش ده المدى بتاعه عالي بيغطي في المتوسط 30 متر مقارنه بالتلاته متر بتوع الفلاش الغلبان اللي على الكاميرا فتقدر تقف بعيد و تعمل زووم و الفلاش يضرب من غير ما يضايق اللي بيتصور زائد ان بيتركب له حاجه اسمها ديفيوزر عشان تشتيت الضوء في كل اتجاه

و كمان فيه ميزه انه على مفصلات فتقدر تغير في الاتجاه بتاعه فتخليه يضرب في سقف الغرفه فينعكس على الشخص من فوق فبكده نضمن اضاءه ناعمه مش حاده و مافيش ظل ورا الشخص ولون بشره طبيعي و مافيش حاجه زغللت عينه

اتمنى ان الموضوع يعجبكم و مستني اسئله كتيره عشان نتناقش فيها و الكل يستفيد

**S O P H O S** · 13-01-2013 10:10 PM

تسلم ايدك ..

**Waleed_Fathy** · 15-01-2013 03:05 AM

ما شاء الله ربنا يبارك فيك علي مجهودك

**Karim_Monir** · 26-01-2013 05:26 PM

موضوع جميل جدا فعلا وتسلم ايدك

**hany63** · 29-01-2013 12:25 AM

المشاركة الأصلية كتبت بواسطة m_marwan

كالعاده متألق :)

يا فندم ده بس حضرتك اللي انسان مجامل
متشكر لذوقك

**kar!m** · 06-02-2013 02:51 PM

شكرا يا باشا على الموضوع الهايل ده.

طيب دلوقتي أنا فعلا عندي المشكلة دي في الكاميرا البوينت أند شوت .. و لما بيكون في اضاءة ورا الشخص يطلع الشخص غامق.

لو شغلت فلاش .. الشخص بيطلع منور .. بس هو بس اللي باين و اللي وراه غامق.

لو زودت الأيزو .. الصورة بيطلع فيها نويز كتير .. الأيزو عندي اخره 400 على فكرة :-)

تقريبا كده لازم slr

**hany63** · 06-02-2013 05:52 PM

حاول و انت بتضرب الفلاش انك تكون واقف بعيد نسبيا و اعمل optical zoom عشان الاضاءه ماتكونش عاليه اوي على الشخص و الخلفيه تبقى كويسه
و يفضل انك لما تيجي تصور تكون نفس الاضاءه اللي واصله على الشخص تساوي اضاءة الباك جراوند
وطبعا ال dslr حلاوتها ان الايزو لو ١٦٠٠ يمكن بيعادل ايزو ٢٠٠ في الكاميرا الصغيره و بتديلك اللي انت عايزه بس لازم تكون فاهم في التصوير و الا هتبقى زي قلتها