ارتفاع سعر القشقاى مع عدم تحديد موعد الاستلام !!

**Ahmed_Rahem** · 14-01-2013 05:16 PM

ولا صدمة ولا حاجة، انت الى مش واخد على اسعار العربيات لما الدولار يبتدى يلعب بالجنية بعمل معاة كدة
وفى الاخر احنا بناخد كدة

**Land_Cruiser** · 14-01-2013 06:53 PM

الواحد ما بقاش يستغرب من اى حاجه طول ما كل واحد بيعمل اللى هو عايزه. على فكره اكيد مستوردين العربيات فرحانين بأزمة الدولار دى. هيلاقوا مكسب فين اكتر من كده و الحجه هى سعر الدولار. طيب ما القاشقاى اللى ب ١٧٥ الف هى اللى ب ٢٠٠ الف بس مركبين فيها شويه كماليات من هنا فى مصر مش جايه من بلادها كده و انا متوقع هتكون صينى و شويه هتبوظ و بعدين موضوع الديفندرات ده ممنوع فى المرور إلا لو كانت العربيه جايه من بلادها كده و مكتوب فى ورق الافراج بتاعها علشان ينفع تتثبت فى الرخصه فى حين انها جايه من انجلترا بدونهم يبقى هتتثبت ازاى ؟؟

**Sehsss** · 14-01-2013 08:18 PM

طيب خدوا دي بالمناسبة، واحد زميلي في الشغل عاوز صني الشكل القديم (مانيوال) 2013، قولتله نجيبهالك من أوتو إيجبت وأصبر شوية وكده قاللي لا يا عم شوفهالي بالأوفر برايس بكام، يا ابني بلاش، قاللي لأ شوف بس، كلمت المعرض اللي جبت منه عربيتي في مدينة نصر، تتخيلوا قاللي كام، (الأوتو بدون abs بـ 102 ألف، والمانيوال بـ 93 ألفا) هو قبل ما يقوللي كده (اللي في المعرض) كان صاحبي لكن بعد السعر اللي قالهولي ده اتغابيت عليه في التليفون جامد وتقريبا خسرنا بعض، وزميلي طبعا قاللي لأ شكرا شوفلي أوتو إيجبت، وفعلا أوتو إيجبت أفضل موزع لنيسان ومهما حصل هايفضلوا الأفضل.. تحياتي

**Mohab555** · 14-01-2013 11:29 PM

10 شهور !!! ليه دى لو هتلف كل موانى العالم قبل ما تيجى مصر مش هتبقه بعد المده دى !! والله حرام

**Ahmed.TV** · 16-01-2013 12:40 AM

الفكرة م ش فكرة انها حتلف فى الموانى كلها
الفكرة اولا .. عشان يعطوا لنفسهم مهلة ويقدروا يسلموا الناس اللى كانوا حاجزين من فترة .. يعنى اللى كان حاجز فى شهر 9 او 10 او 11 او 12 .. ويسملوا الناس المتاخرة

واللى بيحجز دلوقتى هو اللى بيقولوله 10 شهور ولو جت قبل كدا ممكن يستلم

وكمان اللى سمعته عشان فترة الشتاء عوامل الجو احيانا السفن بتوقف .. وده كان عامل

ولو حد سالنى قالى ما احيانا بيحجزوا كام عربية .. عشان يسلموها تسليم فورى بس بسعر اعلى .. حقولكم ان ده غلط اكيد .. بس حقولكم تفكير الموزع ليه بيبيع باوفر برايس .. عشان وجد ان الناس بتشترى من بره العربية باوفر برايس .. فقال ليه مكسبش انا .. وده مجال البيزنس .. المهم .. فبيحط شوية رفاهيات للعربية عشان مش يخلى العميل يدفع اوفر برايس من غير ما ياخد حاجة حتى لو الحاجات اللى حطتها دى رخيصة من وجهة نطرنا

وعلى فكرة الاكسسورز اللى بيركبوها اغلبها اصلية .. والديفندارات اللى بيجبوها البلاستيك دى مش رخيصة

والعربية الاصلية فاضية من غير اى كماليات .. بيبعها بسعرها الاصلى من غير اوفر برايس

لان لو بعها باوفر برايس من غير اى تزويد فى الكماليات .. هنا بقا ممكن نشتكيه

ده كان توضيح من اللى اعرفه

تحياتى للجميع

**م. حاتم السباعي** · 16-01-2013 01:20 AM

يا ما شاء الله

دا انا علي كده بقيت من اصحاب الاملاك بقي هههههههههههههههه

بجد هتوصل ل 200 الف طيب يعني مزعلش علي ال 186 الف اللي اتدفعو فيها بقي و الحمد لله بقالها بتاع 9 شهور اهه

يا رب ترخص خلي الاحباب كلهم يركبوها

و يرزقهم بالاحسن منها الف مره يا رب