كيفية عبور الملفات

**Strong** · 25-07-2008 03:47 PM

يا جماعة أنا عندي استفسار عن طريقة المشي في الملفات لأن في ملفات بتكون جامدة يعني منحنى 180 درجة ومش بتبان كويس للي ماشي في الطريق ومش حافظه ، وكنت فاكر نفسي أنا الوحيد اللي مش باعرف أعدي الملفات الجامدة على سرعة عالية ، لكن كل يوم بأشوف أي حد غريب عن المكان وبيعدي الملف سريع ومبيكنش عامل حسابه انه منحنى جامد بالاقي الدريكسيون انحرف منه يمين في شمال كإنه بيلعب على الطريق وانحرف ووقع في اي جنب من الطريق ، ده غير الحوادث كل يوم في الملفات اللي زي دي من أي حد مش حافظ الطريق ومش متوقع شدة المنحنى بتاع الملف

فعندي كام سؤال كده
1- ازاي اعرف من بعيد ان الملف ده جااامد ولازم اهدي فيه ؟؟ علشان غالبا بيكون في زرع أو شجر بيخفي منحنى الملف
2- لما يكون الملف رايح يمين هل امشي على يمين أم يسار الحارة المرورية اليمين بتاعتي علشان لو طلع منحنى جامد أعرف أعديه بأمان ؟
3- ايه انسب سرعة للمشي في المنحنى الجامد بدون انحراف السيارة عن الطريق
4- باشوف بعض الناس بس بيكونوا متمكنين في السواقة جداااااااااااا بيعدوا الملف ده على سرعة عالية جدا يعني فوق 120 كيلو في الساعة ومش عارف ازاي مش بيحصللهم حاجة وكإنهم ماشيين في طريق عادي

**noble911** · 25-07-2008 04:00 PM

التزم بالسرعة القانونية في الاماكن اللي متعرفهاش
ده احسن حل
المفروض الملفات تكون مزودة بوسائل تنبيه ضوئية للتحذير
بس مش في البلد دي
بالنسبة للسرعة ده بيتحكم فيها نوعية السيارة و ثباتها علي الطريق
انما السرعة القانونية هي الحل الوحيد
مش بس للملفات كمان للمطبات و الكسور و الطوب و الارصفة الافعوانية

ممكن تحسن ادائك في المنحنيات انك تلبس نظارة لو نظرك ضعيف و تظبط نور العربية و تقلب نوور كل فترة علشان تحس بالتغيرات في الطرق

**Adham** · 25-07-2008 04:24 PM

نفترض ان الملف يمين

قبل الملف تكون في اقصى يسار الطريق

و اول ما تخش الملف تبتدي تنحرف يمين معاه بس اكتر من الطريق شوية

وتوسطن ايدك بحيث و انت في نص الملف تماما تكون السيارة في اقصى يمين الطريق (يمين الحارة اليمين)

و في الخروج من الملف تسيب ايدك بحيث في اخر الملف السيارة تكون رجعت في اقصى يسار الطريق تاني

و بكدة انت بتفتح اقصى اتساع للقوس بتاع الملف

لو شفت سباقات سيارات زي فورميولا حاتلاقيهم بياخدوا الملف بالضبط بالشكل دة

فكرتني بمرة زمان كنت باشد مع بي ام 323 من شيراتون لالماظة عالدائري بهوندا سيفيك قديم بس متعدلة
مانفعنيش الا اني كنت باعرف اخد الملفات بتاعه الدائري بالشكل دة
و بتاع البي ام برغم انها اتقل و اثبت كان بيخش الملف عالضيق ورا مني فايضطر يهدي قوي علشان العربية تثبت معاه و عبال مايبتدي يجمع سرعتة ويحصلني تاني نكون دخلنا عالملف اللي بعده
و كان حايتجنن ازاي مش عارف يجيبني
هههههههههههههههههه

المشكلة كمان ان النور بيبقى قدام العربية فاوانت بتلف النور مش بيبقى بيلف مع العربية يوريك حدود الطريق
ودي حلها انك تركب اتنين فوج لايت قوي في طرف الاكصدام و تخليهم مفتوحين لبرة شوية بحيث تشوف حدود الطرق في الملفات

**Adham** · 25-07-2008 04:31 PM

و اهم شيء انك تاخد الملف بثقة وهدوء و ماتحركش الدركسيون جامد بحركة مفاجئة يعني لازم تسايس الدركسيون سنة سنة بدون حركة مفاجئة

و فية تعديلات معينة بتتعمل علشان تزود ثبات العربية في الملفات

اهمها انك توطي العربية و تنشف العفشة بتاعه العربية من ورا من السست و المساعدين

و تركب جنوط عريضة و بارزة لبرة شوية

و السبويلر و العتب برضة بيثب العربية في الملفات عالسرعات

**Nader** · 26-07-2008 02:47 AM

هو في ملف 180 درجة؟ :)

180 درجة يعني خط مستقيم :)

**tutankhamoun** · 26-07-2008 06:09 AM

المشاركة الأصلية كتبت بواسطة عزيز محمد

توضيح صغير جدا لأى حد ناوى ينفذ الكلام ده: إنك تكون ماشى فى الطريق لوحدك (يعنى بالليل متأخر أو الصبح بدرى أو الطريق فاضى)

لإن فيه ناس كتير قوى - ربنا يهديهم- بيعمل الكلام ده بغض النظر عن العربيات اللى داخلة الملف معاه وبالتالى يزنق عليهم وهو مش واخد باله - أو واخد ومطنش باعتباره صاحب الحق المطلق فى الطريق.

+100000000000000000000000000000

في أي بلد محترم ............ و بقول محترم

فيها حارات
و الكل في حارته
داخل في ملف ............ ماشي مستقيم
بتبقى في حارتك
و لما تكون داخل ملف
لازم ............. لازم ...............لازم ..................لازم
القانون بيجبرك أنك تهدي لعدة أسباب
منها أنك تقدر تأخد الملف مظبوط من غير ما تعرض نفسك للخطر و تزنق اللي جنبك و تعرض الطريق كله للخطر لو العربية قلبت منك أو لفت حوالين نفسها في الملف

و المصيبة لو الطريق رايح جاي
و أنت مألتزمتش بحارتك زي كتيييييييييييييييييييييير في مصر ما بيعملوا
هاتبص تلاقي نفسك داخل في وش اللي جاي في وشك
و تروحوا لابسين في بعض
ده ده على أساس أنكوا أنتوا الأثنين مش عايزين تهدوا في الملف و تأخدوا بطريقة توسيع الزاوية
............... و تحيا مصر .................. و تحيا مصر ................. و تحيا مصر

*******************

----------------------------------------------------------------

مرة كنت بأخد ملف و مش شايف اللي جاي في وشي
نزلت سرعتي تقريبا على 60 و ألتزمت بحارتي اليمين و كنت في طريق رايح جاي
و كل مرة أدخل الطريق ده
ألاقي أفندي جاي مش عايز يهدي ............. و داخل على حارتي
لدرجة أني كذا مرة كنت هالبس في فيهم
و حسبي الله و نعم الوكيل ............ حسبي الله و نعم الوكيل
حسبي الله و نعم الوكيل ............. حسبي الله و نعم الوكيل

أيه ده ........... أحنا جايين من الفضاء ............ أحنا مش بشر عاديين
أنا زهقت و طهقت ..................... يارب أرحمنا يارب

أرجوا أن محدش يزعل مني .............. أحنا بنتناقش

_______________________
تم التعديل بواسطة
مشرف القســــــــــــم التعليمي

**Strong** · 26-07-2008 10:53 AM

المشاركة الأصلية كتبت بواسطة Nader

هو في ملف 180 درجة؟ :)

180 درجة يعني خط مستقيم :)

180 درجة يعني خط مستقيم أو منحنى طابق على نفسه ، يعني تبقى ماشي على طول وتلاقي الطريق كاسر جامد يمين أو شمال وهتشوف الطريق اللي جيت منه جنبك على اليمين أو الشمال على حسب الملف

90 درجة يعني ملف بزاوية قائمة ودي سهلة حتى لو على سرعة زي ملفات الشوارع العادية
وممكن نسأل حد في هندسة علشان يصحح المعلومة لو في غلط

، أنا كنت علمي رياضيات بس نسيتها كلها

**Adham** · 26-07-2008 11:25 AM

المشاركة الأصلية كتبت بواسطة Nader

هو في ملف 180 درجة؟ :)

180 درجة يعني خط مستقيم :)

صباح الفل نادر حبيبي ازيك

180 درجة يبقى يو تيرن U-Turn مش ملف ههههههههه

**Adham** · 26-07-2008 11:29 AM

نسيت اقول حاجة كمان, لازم تحسب السرعه اللي تقدر بيها تاخد الملف دة, و لو القرار انك تهدي يبقى تهدي قبل الملف مش و انت داخل الملف, يعني تهدي و العربية لسة ماشية في خط مستقيم مش بعد ماتخش الملف و تكسر الدركسيون, و لما تخش الملف لو العربية كبالن يبقى تحمل رجلك عالبنزين شوية, تدوس بنزين شوية و دة مهم جدا لأنك حاتلاقي ان سنة البنزين دي بتخللي العجل الامامي يشد العربية معاك في اتجاة الملف و بالتالي يسحب العربية بسهولة و يلمها معاك

و لو العربية دفع خلفي على كردان يبقى ماتدوسش بنزين خالص لأن دة حايخلييها تعوم منك و ممكن تلف من ورا

و موضوع تسقيط النقلات برضة بينفع جدا بس تسقط النقلة برضة قبل الملف مش لما تدخل في دوران الملف