هل البنوك الاجنبية مضمونة

**ahmed_m_ashraf** · 17-01-2013 08:57 PM

أنا بتعامل مع كريدي أجريكول من 2008 سواء حساب أو كارت إئتمان.
معاملتهم محترمة والبنك رايق تروح تخلص على طول مش تقعد طول اليوم زي الأهلي عشان تخلص حاجة.
الإنترنت البنكي ممتاز إطلاع على الحسابات وتحويل ودفع الغيزا ... إلخ ولو ليك كذا حساب أو حساب وكارت زي مثلا بتدير كله من نفس الحساب ع النت.

بفكر أجرب hsbc ناس كتير بتشكر فيه برضة. بس أرجع أقول ليه وأنا مرتاح في كريدي.

**dede_dodo88** · 18-01-2013 02:18 AM

هو على حسب أنت محتاج البنك في أيه!!
بس هو المفروض أن فلوس المودعين في البنوك يضمنها البنك المركزي.. بس اللي منضمنوش أن البلد نفسها تفلس و ساعتها يبقى في كلام تاني..
كل البنوك المصرية تخضع لتعليمات المركزي بإستثناء البنك العربي الدولي aib
مش هيفرق كتير بنك وطني عن أجنبي غير في مستوى الخدمة.. لكن كأسعار فوائد للأدخار أو الأقترض البنوك الوطنية بتبقى أفضل شوية..
مش كل البنوك الأجنبية كويسة في مصر.. يعني سيتي و باركليز تعبانين تعبانين يعني..
البنوك الفرنسية خلاص بتتباع دلوقتي.. يعني nsgb أتباع لـqnp القطري, و bnp أتباع و كريدي أجريكول في الطريق.. بيريوس كده كده بنك بيخسر و كان هيتباع من قبل أحداث 25 يناير لستاندرد تشارترد بس الصفقة أتلغت..
Hsbc من أقوى البنوك الأجنبية أو البنوك عموماً في مصر.. بس لو بتدور على عائد كويس لمدخراتك فمتفكرش فيه + أنك تفتح حساب فيه دلوقتي فالموضوع مبقاش سهل و ليه متطلبات معينة..
Cib متوحش في السوق و ناس كتير أوي بتفضل تتعامل معاه.. يعني هو متوازن بين خدمة مش بطالة و فوائد معقولة..

**damasry** · 18-01-2013 02:35 AM

hsbc زى كل البنوك عامل ليميت على السحب اليومى للدولار بحد اقصى 10 الاف دولار والجنيه اعتقد مفيش حد اقصى دلوقتى.

والانترنيت البنكى تقدر تدير بيه حسابك اونلاين، يعنى لو ليك كذا حساب بكنى او حساب واحد تقدر:
1- تحول بين حساباتك اونلاين مجانا
2- تحول لحساب hsbc تانى فى مصر (لازم تفعل خدمة التحويل لحسابات اخرى فى البنك)
3- تقدر تدفع بيه فواتير الانترنيت والموبايل والتليفون الارضى والكهرباء وكذا حاجة كمان اونلاين
4- تدفع الفيزا بتاعتك لو عندك فى حسابك فيزا

دول اللى اعرفهم لحد دلوقتى واعتقد ممكن يكون فى خدمات تانية للإنترنيت البنكى

بجانب إن فى فروع للبنك بتفتح لحد 7 و8 مساء وفيه فروع بتفتح طول الاسبوع حتى الجمعة والسبت ولحد 8 مساء.