الموضوع: محتاج مساعدة السيريون اتخبطت و هي واقفة ( تاني ! لأ تالت .. مبقتش أعد ! )

يعني انا لو مكانكوا كنت زهقت بصراحة من القراية عن الموضوع ده
العربية اتخبطت و هي واقفة للمرة التالتة علي التوالي خلال 10 ايام .. بس المرة دي خبطة جامدة شوية

بدون الدخول في تفاصيل تحرق الدم
انا محتاج مساعدة في اني ارجع العربية زي الأول لأنها اتشلفطت بجد و انا صعبان عليا العربية مكملتش سنة

المرة دي الإكصدام الخلفي اتفك من ناحية اليمين و اتعوج و الكارتيرة اتخلعت و الدلاية وقعت .. انا عملتهم أي كلام كدة يمشيني بس طبعا حاسس انه ممكن يتفك في أي لحظة و انا ماشي لأن تقريباَ الكلبسات إتكسرت .. كدة لازم الإكصدام يتغير و الكارتيرة ؟

عندي مشكلتين .. انا مأمن تبع محترفي حرقة الدم الجمعية المصرية للتأمين .. اللي طلعوا عيني عشان اغير مراية الكليو اللي اتكسرت و عملوها برة التوكيل .. هل بقي هيقعدوا يقولولي هنصلحلك الإكصدام الحالي و مش محتاج و مش عارف ايه .. و انا بصراحة اعصابي بايظة الأسبوع ده كله و مش حمل خناقة تانية تظهرلي في الأسبوع المهبب ده .. لو صمموا يعملوها برة التوكيل اعمل ايه

تاني حاجة التوكيل هيعملي الموضوع ده امتي و في قد ايه .. يعني حيحدفوني في معاد كمان شهر و يقولولي تعالي استلم كمان شهر كمان و الاكصدام مش موجود و الجو ده ولا ايه ؟ لأن انا مينفعش بأي شكل من الأشكال اتعطل فترة كبيرة لأن كدة حاجات كتير اوي هتتلخبط .

كمان .. اعمل الخبطات التانية بالمرة ولا لأ ؟
فيه خطين عميقين كان عملهم توك توك في العربية و قالولي في التوكيل دي لازم تتسمكر و الباب و الرف رف يترشوا .. و فيه حاجات تانية ترييحات كدة تترد عادي

معلش انا داوشكم بالعربية بس مش بمزاجي و الله